ގިނަ ފާރާތްތަކެއް ދަނޑުވެރިކަމުގެ ސިނާއަތަށް ނިކުންނަންޖެހޭކަމަށާއި، ހައްދާ ހުރިހާ ތަކެތި އެސްޓީއޯ އިން ގަންނާނެކަމަށް އެސްޓީއޯގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެއެވެ.

އަމްރު ވިދާޅުވީ، ކާނާގެ ޔަގީންކަމަކީ ހަމައެކަނި އާބާދީއަށް އެކަށޭނެވަރަށް 5 މަހެއްގެ ކާޑުގެ ބާވަތްތައް އިމްޕޯޓުކުރުން ނޫންކަމަށާއި މިއަދު ދިމާވެފައިވާ ހާލަތުން ރާއްޖޭގެ އިގްތިސާދު ފުޅާކޮށް ވަކި ދާއިރާއަށް ބަރޯސާވެފައި އޮންނަ އޮތުން ކުޑަކުރުމުގެ މުހިންމުކަން ބޮޑަށް އެނގިގެންދާކަމަށެވެ.

އަމްރު ވިދާޅުވީ، މިފަދަ ދަނޑިވަޅުގައި އެންމެ އިސްކަމެއް ދޭންވި އެއްކަމަކީ އެގައުމެއްގެ ތެރޭގައި އުފެއްދުންތެރިކަން އިތުރުކުރުން ކަމަށާއި އެގޮތުން ރާއްޖޭގައި ދަނޑުވެރިކަމުގެ ސިނާއަތް އިހުނަށް ވުރެން ފުޅާކުރަންޖެހޭކަމަށެވެ.

ދިވެހިންގެ ކާބޯތަކެތީގެ ޔަގީންކަން ސީދާ ގުޅިފައިވަނީ ދަނޑުވެރިކަމަށްކަމަށާއި ދަނޑުވެރިންނަށް އާމްދަނީ ލިބޭނޭ އިގްތިސާދީ މަސައްކަތްތަކެއް ހިންގަންޖެހޭކަމަށް އަމްރު ވިދާޅުވިއެވެ. އަދި ދަނޑުވެރިން ހައްދާ ހުރިހާ ތަކެތި އެސްޓީއޯއިން ގަންނާނެކަމުގެ ޔަޤީންކަން އަރުވާކަމަށާއި އޮންލައިންކޮށް ނަމަވެސް ވަގުތަށް އެ ތަކެއްޗަށް ވާ ފައިސާ ޖަމާކުރާނެކަމަށެވެ.

އެސްޓީއޯގައި ބޭއްވި ނޫސްވެރިންގެ ބައްދަލުވުމުގައި މެނޭޖިން ޑިރެކްޓަރ ހުސެއިން އަމްރު އިތުރަށް ވިދާޅުވީ ދަނޑުވެރިން ހައްދާ ތަކެތި ހެއްދުމުގެ ކުރިން އެ ތަކެތި ގަންނާނެ އަގު އެސްޓީއޯ އިން ހާމަކުރާނެ ކަމަށެވެ. އޭރުން ދަނޑުވެރިން ތަކެތި ހައްދާއިރު، ލިބޭނެ އާމްދަނީވެސް އެނގެން އޮންނާނެ ކަމަށް އަމްރު ވިދާޅުވި އެވެ.