ކޮވިޑް-19 ދެނެގަތުމަށް ޗައިނާއިން އުފައްދާ ޓެސްޓް ކިޓްތަކާ، ބައްޔާ ދެކޮޅަށް މަސައްކަތްކުރާ މީހުން ބޭނުންކުރުމަށް އުފައްދާ މާސްކްތަކުގެ ކޮލިޓީ ނެތްކަމަށް ބުނާ މައްސަލަތަކެއް ޔޫރަޕުން ފެންމަތިވެއްޖެއެވެ.

ތުރުކީވިލާތާއި، ނެދަލެންޑްސް އަދި މިބަލި ޔޫރަޕުން އެންމެ ބޮޑަށް ފެތުރިފައިވާ އެއް ޤައުމުތަކަމަށްވާ ސްޕެއިންގެ ޞިއްޙީ އޮފިޝަލުން ވަނީ ޗައިނާ އިން ގެނައި ޓެސްޓް ކިޓްތަކުގެ އިތުބާރު ނެތް މައްސަލައާއި، ޗައިނާއިން ގެނައި މާސްކްތައް ޑަބްލިޔު.އެޗް.އޯ ގެ މިންގަނޑުތަކަށް ނުފެތޭކަމަށް ބުނެ، މައްސަލަ ފެންމަތިކޮށްފައެވެ.

ބީބީސީއިން ރިޕޯޓުކޮށްފައިވާ ގޮތުގައި މިދިޔަ ހޮނިހިރު ދުވަހު ނެދަލެންޑްސްގެ ހެލްތު މިނިސްޓްރީއިން ވަނީ މިދިޔަ މަހުގެ 21 ވަނަ ދުވަހު ޗައިނާއިން ގެނެސް، ހޮސްޕިޓަލްތަކުގައި ބޭނުންކުރުމަށް ދޫކޮށްފައިވާ 6 ލައްކަ ފޭސް މާސްކް އެތަންތަނުން ނަގާފައެވެ. މި މާސްކްތައް ނަގާފައިވަނީ އެބޭނުންކުރާ ޑޮކްޓަރުންނާއި ނަރުހުންގެ މޫނުގެ ޝޭޕަށް ފިޓް ނުވުމުންނާއި، އޭގެ ފިލްޓަރ ރަނގަޅަށް މަސައްކަތް ނުކުރުމުގެ ސަބަބުންނެވެ. ރަނގަޅަށް މަސައްކަތް ނުކުރިނަމަވެސް އެމާސްކްތަކާއެކު ކޮލިޓީ ސެޓްފިކެޓް އޮތްކަމަށް ނެދަލެންޑްސްގެ ހެލްތު މިނިސްޓްރީއިން ކަންބޮޑުވުމާއެކު ފާހަގަކުރިއެވެ.

ސްޕެއިނުންވެސް ވަނީ ޗައިނާއިން ގެނައި ޓެސްޓް ކިޓްތަކުގެ ބޮޑު ބައެއް ރަނގަޅަށް މަސައްކަތް ނުކުރާ މައްސަލަ ފެންމަތިކޮށްފައެވެ. ޗައިނާގެ ޝެންޒެން ބަޔޯއީޒީ ބަޔޯޓެކްނޮލޮޖީ ކުންފުނިން ލައްކައަކަށްވުރެ ގިނަ ޓެސްޓް ކިޓްތައް ގެނައިފަހުން، އޭގެ ތެރެއިން ބޮޑު ބައެއް މަސައްކަތް ނުކުރާކަން އެނގުނުކަމަށް ސްޕެއިނުން ހާމަކުރިއެވެ. މިކަމާ ގުޅިގެން ޗައިނާއިން ބުނީ އެކުންފުންޏަކީ މެޑިކަލް ސާމާނު އުފައްދާ ވިއްކުމުގެ ހުއްދަ އޮންނަ ބައެއް ނޫންކަމަށެވެ.

މީގެ އިތުރުން ތުރުކީވިލާތުންވެސް ވަނީ ޗައިނާއިން ގެންނަ ޓެސްޓް ކިޓްތަކުގައި މައްސަލަ ހުންނަކަން ފާހަގަކޮށްފައެވެ. އެހެންނަމަވެސް ޗައިނާއިން ގެނައި 3 ލައްކައަށްވުރެ ގިނަ ޓެސްޓްކިޓްތައް ރަނގަޅުކަމަށްވެސް ތުރުކީއިން ވަނީ ބުނެފައެވެ.