ކާފިއު އިއުލާންކޮށްފައިވާ ގަޑިތަކުގައި މަގުމައްޗަށް ނިކުންނަ ފަރާތްތައް ޖޫރިމަނާކުރާނެކަމަށް މޯލްޑިވިސް ޕޮލިސް ސާރވިސްއިން ބުނެފިއެވެ.

ބުރާސްފަތި ދުވަހުން ފެށިގެން ހަވީރު ފަހަކުން ރޭގަނޑު އަށަކަށް ވަކިގޮތެއް އަންގަންދެން މާލެ، ހުޅުމާލެ، ވިލިމާލެ ސަރަހައްދުގައި ބޭރަށް ނިކުމެ އުޅުމާއި އުޅަނދުތައް ދުއްވުން އެޗްޕީއޭއިން ވަނީ މަނާކޮށްފަ އެވެ.

ބުދަ ދުވަހުގެރޭ ދަރުބާރުގޭގައި ގާއިމްކޮށްފައިވާ ނޭޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ސުޕްރިންޓެންޑެންޓް އޮފް ޕޮލިސް އަހުމަދު ސަމީރު މުހައްމަދު ވިދާޅުވީ، ކާފިއު އިއުލާންކޮށްފައިވާ ވަގުތު ބޭރުގައި އުޅޭ ފަރާތްތަކަށް ފިޔަވަޅު އަޅާނެކަމަށެވެ. އެގޮތުން އެންމެ ފުރަތަމަ ނަސޭހަތް ދޭނެކަމަށާއި ތަކުރާރުވާކަމުގައިވާނަމަ އެ ފަރާތެއް ޖޫރީމައިނާކުރާނެކަމަށެވެ.

ސަމީރު ވިދާޅުވީ ހުއްދަ އޮންނަ ފަރާތްތަކަށް ފުލުހުން ހާއްސަ ސްޓިކާއެއް ދޫކުރަމުންގެންދާނެ ކަމަށެވެ. އެ ސްޓިކާ ނެތްނަމަ ފިޔަވަޅުއަޅާނެކަމަށް އޭނާ ވިދާޅުވި އެވެ.

ބުރާސްފަތި ދުވަހުން ފެށިގެން ކޮންމެ ދުވަހެއްގެ ހަވީރު 5:00 އިން ރޭގަނޑު 8:00 އަށް އެއްގަމު އުޅަނދުފަހަރު ދުއްވުމާއި މަގުމަތީގައި މީހުން އުޅުމާއި، ޕަބްލިކް ޓްރާންސްޕޯޓް (ބަހާއި ފެރީ) ގެ ހިދުމަތް ހުއްޓައިލަން އަންގާ ކަމަށެވެ. ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރް ވަނީ އެ ވަގުތުތައް ފިޔަވައި އެހެން ވަގުތުތަކުގައި، އެއްފަހަރާ ތިން މީހުންނަށް ވުރެ ގިނަ މީހުން މަގުމަތީގައި އެއްވެ އުޅުން ހުއްޓައިލުމަށް އަންގާފައެވެ.