ދިވެހިރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ބޭންކުތަކަށް ދޫކުރާ ބޭރު ފައިސާގެ މިންވަރު ކުރިއަށްވުރެ އިތުރުކޮށްފިއެވެ.

ބޭންކުތަކަށް ބޭރު ފައިސާ ދޫކުރުން އިތުރުކޮށްފައި މިވަނީ، ކޮވިޑް-19 އާ ގުޅިގެން ރާއްޖެއަށް ދިމާވެފައިވާ އިޤުތިޞާދީ ހީނަރުކަމުން އަރައިގަތުމަށް ކަމަށް އެމްއެމްއޭއިން ބުނެއެވެ.

ރާއްޖެއަށް ދިމާވެފައިވާ އިޤުތިޞާދީ ހީނަރުކަމުން އަރައިގަތުމަށާއި، ރައްޔިތުންނާއި ވިޔަފާރިވެރިންނަށް ދިމާވެފައިވާ ނިކަމެތި ޙާލަތުން އަރައިގަތުމަށް އެހީތެރިވެދިނުމުގެ ގޮތުން ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ. އެގޮތުން މިދިއަ ހަފުތާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވަނީ ކޮވިޑް-19 އާ ގުޅިގެން ސަރުކާރުން އަޅާފައިވާ ފިޔަވަޅުތަކާއި އަޅަން ނިންމާފައިވާ ފިޔަވަޅު ތަކާގުޅޭގޮތުން ވާހަކަފުޅު ދައްކަވާފައެވެ.

އެގޮތުން، ކޮވިޑް-19 އާ ގުޅިގެން ރާއްޖެއަށް ދިމާވެފައިވާ އިޤުތިޞާދީ ޙާލަތުން އަރައިގަތުމަށްޓަކައި އެމްއެމްއޭ އާއި ބޭންކުތަކާއި އަދި ކަމާބެހޭ އިދާރާތަކާއެކު މަޝްވަރާކުރައްވަމުން ގެންދަވާ ކަމަށް ރައީސް ޞާލިހު ވަނީ ވިދާޅުވެފައެވެ.

އެމްއެމްއޭ އިން ވެސް ބުނީ ސަރުކާރާއި، ބޭންކުތަކާއި، މާލީ އިދާރާތަކާއި އަދި ކަމާބެހޭ އެންމެހާ ފަރާތްތައް ގުޅިގެން މަސައްކަތްތަކެއް ކުރަމުން އަންނަ ކަމަށެވެ. އެގޮތުން، އެކްސްޗޭންޖް ރޭޓް ދެމެހެޓުމަށްޓަކައި ފޮރިން އެކްސްޗޭންޖް ބާޒާރަށް މިހާރު ފޯރުކޮށްދެމުންދާ ބޭރުފައިސާގެ ޢަދަދު އިތުރުކުުރުމާއި، އެމްއެމްއޭގައި ޤާއިމުވެފައިހުރި އެެކިއެކި ވަޞީލަތްތައް މެދުވެރިކޮށްް ބޭންކުތަކަށް ބޭރުފައިސާ އިތުރަށް ފޯރުކޮށްދެމުންދާކަމަށް އެމްއެމްއޭއިން ބުނެއެވެ.

މީގެއިތުރުން އެމްއެމްއޭއިން ބުނީ، ބޭންކުތަކުން ލިކުއިޓީ ބޭނުންވެއްޖެ ޙާލަތެއްގައި، އެ އޮތޯރިޓީގައި ބަހައްޓަންޖެހޭ މިނިމަމް ރިޒަރވް ރިކުއަމެންޓް %5 އާ ހަމައަށް ދަށް ކުރާނެ ކަމަށާއި، އަދި މާލީ އިދާރާތަކުން ލިކުއިޑިޓީ ބޭނުންވެއްޖެ ޙާލަތެއްގައި އެ އޮތޯރިޓީން ކުރު މުއްދަތުގެ ލޯނު ފެސިލިޓީއެއް ހަމަޖައްސާ ދެވޭނެކަމަށެވެ.

އެމްއެމްއޭއިން ބުނީ، އޮތޯރިޓީ އާއި ރިޒަރވް ބޭންކް އޮފް އިންޑިއާ އާ ދެމެދު ވެފައިވާ 400 މިލިއަން އެމެރިކާ ޑޮލަރުގެ ކަރަންސީ ސްވޮޕް އެއްބަސްވުމުގެ ދަށުން 150 މިލިއަން އެމެރިކާ ޑޮލަރު ހޯދުމާއި، އެމްއެމްއޭ އާއި ސަރުކާރާ ގުޅިގެން އައިއެމްއެފްގެ މާލީ އެހީތެރިކަން ހޯދުންވެސް އިޤުތިޞާދީ ޙާލަތުން އަރައިގަތުމަށް ކުރަމުންދާ މަސައްކަތްތަކުގެ ތެރޭގައި ހިމެނޭކަމަށެވެ.

ޑޮލަރު ލިބުން ތާށިވެފައިވާ ކަމަށްބުނެ، ބައެއް ވިޔަފާރިވެރިން ތަކެތި އަގު ބޮޑުކޮށް ވިއްކަމުންދާކަމަށް ބުނާ ވާހަކަތަކާއި ގުޅިގެން ރައީސް ޞާލިޙު ވިދާޅުވެފައިވަނީ، ތަކެތި އަގު ބޮޑުވާންޖެހޭ އެއްވެސް ސަބަބެއް ނެތްކަމަށާއި، ބޭންކުތަކަށް ކުރިން ދޫކުރި ވަރަށް ޑޮލަރު ދޫކުރި ނަމަވެސް ޑޮލަރަށް ތާށިކަމެއް ނާންނާނެކަމަށެވެ.

އެމްއެމްއޭއިން ބުނީ، ކޮވިޑް-19 އާއި ގުޅިގެން ރާއްޖޭގެ އިޤުތިޞާދީ ޙަރަކާތްތަކަށް މިއައި ކުއްލި ބަދަލާއި ގުޅިގެން ޢާންމުކޮށް ޑޮލަރަށް އޮންނަ ޑިމާންޑަށްވުރެ މިހާރު ޑޮލަރަށް އޮންނަ ޑިމާންޑް ދަށްވާނެ ކަމަށް ބެލެވޭ ކަމަށެވެ. އެމްއެމްއޭއާއި، ސަރުކާރާއި، ބޭންކުތަކާއި، މާލީ އިދާރާތައް ގުޅިގެން އަޅާ ފިޔަވަޅުތަކުގެ ސަބަބުން ރާއްޖޭގެ އިމްޕޯޓަށް ބޭނުންވާ މިންވަރަށް ޑޮލަރު ހުންނާނެކަން އެމްއެމްއޭއިންވަނީ ހާމަކުރައްވާފައެވެ.

ރާއްޖޭގެ ޔޫޒަބަލް ރިޒަރވްގައި ޢާއްމު ގޮތެއްގައި ހުންނަނީ ތިން މަސް ދުވަހުގެ އިމްޕޯޓަށްވާ ވަރުގެ ފައިސާ އެވެ.