ރާއްޖެއިން ބޭރުގައި ހުންނަ ރާއްޖޭގެ ޑިޕްލޮމެޓިކް މިޝަންތަކުގެ އިސް ބޭފުޅުންނާއެކު ވީޑިއޯ ކޮންފަރެންސް މެދުވެރިކޮށް، ފޮރިން މިނިސްޓަރ ޢަބްދުﷲ ޝާހިދު ބައްދަލު ކުރައްވައިފިއެވެ.

އާދިއްތަ ދުވަހުގެ ރޭ ބޭއްވި ވީޑިއޯ ކޮންފަރެންސްގައި ރާއްޖެއިން ބޭރުގައި ޤާއިމުކޮށްފައިވާ 17 ޑިޕްލޮމެޓިކް މިޝަންގެ އިސް ބޭފުޅުންނާ، މިނިސްޓަރ ޝާހިދު ވަނީ މަޝްވަރާ ކުރައްވާފައެވެ. މިބައްދަލުވުމުގައި ޑިޕްލޮމެޓިކް މިޝަންތައް މެދުވެރިކޮށް ދިވެހި ރައްޔިތުންނަށް ފޯރުކޮށްދޭ ޚިދުމަތްތަކާއި ދިމާވާ ދަތިތަކާ ގުޅޭގޮތުން މަޝްވަރާ ކުރައްވާފައިވެއެވެ.

މިނިސްޓަރ ޝާހިދު ވަނީ، ކޮވިޑް-19 ވައިރަަސްއާއި ގުޅިގެން، ރާއްޖެއިން ބޭރުގައި ދަތުރު ނުކުރެވި، ތާށިވެފައި ތިބި ދިވެހިންގެ ޙާލަތު ވަރަށް ގާތުން ބެއްލެވުމަށާއި ފޯރުކޮށްދެވެން އޮތް އެހީތެރިކަން ފޯރުކޮށްދިނުމަށް އެބޭފުޅުންގެ ކިބައިން އެދިވަޑައިގަންނަވާފައެވެ.

ވީޑިއޯ ކޮންފަރެންސް ކޯލް މެދުވެރިކޮށް، ނޫން ގޮތްގޮތައްވެސް މިނިސްޓަރު ޝާހިދު ގެންދަވަނީ ރާއްޖެއިން ބޭރުގައި ތިއްބެވި ދިވެހިންގެ ޙާލަތު ބައްލަވަމުންނެވެ. އަދި އެކިއެކި ޑިޕޮލޮމެޓިކް މިޝަންތަކުގެ އިސް ބޭފުޅުންނަށް ވަކިވަކިން ގުޅުއްވައިގެންވެސް ގިނަ މަޝްވަރާތަކެއް ޝާހިދު ގެންދަވަނީ ކުރައްވަމުންނެވެ.

މީގެއިތުރުން، ރާއްޖެއަށް ބޭނުންވާ ކާބޯތަކެއްޗާއި، ބޭހާއި، ބޭސްވެރިކަމުގެ އެހެނިހެން ވަޞީޅަތްތައް ހޯއްދެވުމުގައި ވެސް ފޮރިން މިނިސްޓަރު ޝާހިދު ގެންދަވަނީ އިސް ދައުރެއް އަދާކުރައްވަމުންނެވެ.