ކޮވިޑް-19 އަށް ޕޮޒިޓިވްވި ދިވެހި މީހާ ވެލިދޫއަށް ބަދަލުކޮށްފި
އެމީހާ ވެލިދޫއަށް ގެނެސްފައިވަނީ ރޭ 12:30 ހާއިރު
ވެލިދޫ ރިސޯޓު
ކޮވިޑް-19 އަށް ޕޮޒިޓިވްވި ދިވެހި މީހާ ވެލިދޫއަށް ބަދަލުކޮށްފިއެވެ.
ރާއްޖެއެމްވީއަށް މައުލޫމާތުދެއްވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އަދި ހޮލިޑޭ އައިލެންޑް ރިސޯޓަށް ކަނޑައަޅާފައިވާ ފޯކަލް ޕޮއިންޓް އައްސަދު ރިޒާ ވިދާޅުވީ އެމީހާ މިހާރު ހޮލިޑޭ އައިލެންޑްގެ ކަރަންޓީން ފެސިލިޓީގައި ނެތް ކަމަށާއި އެމީހާ ވެލިދޫ އައިލެންޑް ރިސޯޓުގެ ކަރަންޓީން ފެސިލިޓީއަށް ބަދަލުކުރެވިފައިވާ ކަމަށެވެ. އަދި މިހާރު އެ ރިސޯޓުގައި ކަރަންޓީންގައި ޖުމްލަ ތިބީ 149 މީހުން ކަމަށެވެ.
ދިވެހި މީހާއާ ބެހޭ މައުލޫމާތު އިތުރަށް އޮޅުން ފިލުވަން ވެލިދޫ އައިލެންޑް ރިސޯޓުގެ ފޯކަލް ޕޮއިންޓް އަދި ޓޫރިޒަމް މިނިސްޓްރީގެ ސީނިއަރ ޕޮލިސީ ޑިރެކްޓަރ އިބްރާހީމް ފަރްހާދު ވިދާޅުވީ އެމީހާ ވެލިދޫއަށް ގެނެސްފައިވަނީ ރޭ 12:30 ހާއިރު ކަމަށެވެ. އަދި އުމުރުން 38 އަހަރުގެ އެ ދިވެހި މީހާގެ ހާލު ރަނގަޅުކަމަށް ވެސް އޭނާ ވިދާޅުވިއެވެ.
މިވަގުތު އެ ފެސިލިޓީގައި ތިބި މީހުންގެ މައުލޫމާތު ހިއްސާކުރައްވަމުން ފަރުހާދު ވިދާޅުވީ ކޮވިޑް-19 އަށް ޕޮޒިޓިވް 3 މީހުން މި ވަގުތު އެ ރިސޯޓުގައި އެބަތިބި ކަމަށެވެ. އެއީ ދިވެހި މީހާ އާއި ދެ ބިދޭސީން ކަމަށެވެ. އަދި އަލާމަތްތައް ހުރި ކަމަށް ޝައްކުކުރެވޭ ދެ މީހުންނާއި ފުރަތަމަ ޓެސްޓުން ނެގެޓިވްވި ދެ މީހުންގެ އިތުރުން ދެ ޓެސްޓުން ނެގެޓިވްވި 13 މީހުން އެބަތިބި ކަމަށެވެ. އެހެންކަމުން ޖުމްލަ 20 މީހުން މި ވަގުތު ވެލިދޫ ކަރަންޓީން ފެސިލިޓީގައި އެބިތިއްބެވެ.
ކޮވިޑް-19 އަށް ޕޮޒިޓިވްވި ދިވެހި މީހާ ރާއްޖެ އައިސްފައިވަނީ މި މަހުގެ 22 ވަނަ ދުވަހުއެވެ. އަދި މަހުގެ 25 ވަނަ ދުވަހާއި ހަމައަށް އެ މީހާގެ ގައިން އެއްވެސް އަލާމާތެއް ފެނިފައިނުވާ ކަމަށް ހެލްތް މިނިސްޓަރ އަބްދުﷲ އަމީން ވަނީ ހުކުރު ދުވަހު އޮތް ނޫސްވެރިންގެ ބައްދަލުވުމުގައި ވިދާޅުވެފައެވެ. އެކަމަކު ވެސް އޭނާ ޓެސްޓުކުރިއިރު ކޮވިޑް-19 އަށް ޕޮޒިޓިވްވެފައިވާ ކަމަށާއި އެމީހާއާ ކޮންޓެކްޓްޓްރޭސްވި މީހުން ދެނެގަތުމުގެ މަސައްކަތް ކުރެވެމުންދާ ކަމަށް މިނިސްޓަރ ވިދާޅުވިއެވެ.
ދިވެއްސަކު ކޮވިޑް-19 އަށް ޕޮޒިޓިވްވުމާއި އެކު ރާއްޖޭގައި މި ބައްޔަަށް ޕޮޒިޓިވްވި މީހުންގެ އަދަދު ވަނީ 16 އަރާފައެވެ. އެއީ އިޓަލީގެ އޭގެ ތެރެއިން ނުވަ މީހަކު ވަނީ ބަލިން ފަސޭހަވެފައެެވެ.
ކޮވިޑް-19 އިތުރަށް ފެތުރުނަ ނުދިޔުމަށްޓަކައި ސަރުކާރުން ދަނީ ރާއްޖެއަށް އަންނަ ހުރިހާ އެންމެން 14 ދުވަހުގެ ކަރަންޓީނުގެ މުއްދަތު ފުރިހަމަ ކުރުމަށް އަންގަމުންނެވެ. ހުކުރު ދުވަހުން ފެށިގެން ރާއްޖެއަށް އެތެރެވުމަށް ދޫކުރާ އޮންއެރައިވަލް ވިސާ ދިނުން ވެސް ވަނީ މެދުކަނޑާލާފައެވެ. އަދި ސަރުކާރުގެ އޮފީސްތަކުގެ އިތުރުން ސްކޫލްތައް ވަނީ އިތުރު ހަފްތާއަކަށް ބަންދުކޮށްފައެވެ.
