ސްޕެނިޝް ކްލަބުތަކަށް އެހީވާން ފަންޑެއް ހުޅުވައިފި

ޔޫރަޕުގައި ހަލުވިކަމާއިއެކު މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާނެ މާލީ ގޮންޖެހުންތަކުން ކްލަބުތައް ސަލާމާތް ކުރުމަށް ސްޕެއިންގެ ފުޓްބޯޅަ ފެޑަރޭޝަނުން 500 މިލިއަން ޔޫރޯގެ ފަންޑެއް ހުޅުވައިފި އެވެ.

ކޮވިޑް-19 ގެ ނުރައްކާ މިވަގުތު އެންމެ ބޮޑުވެފައިވަނީ ޔޫރަޕަށެވެ. ޔޫރަޕުގެ އެންމެ ވަރުގަދަ ފަސް ލީގު މިހާރު އޮތީ މެދުކަނޑާލާފައެވެ. އަދި ޔޫރަޕުގެ ބޮޑެތި މުބާރާތްތައް ވެސް ވަނީ މެދުކަނޑާލާފައެވެ.

ސްޕެއިންގެ ފުޓްބޯޅަ ފެޑަރޭޝަނުން ބުނީ މި ފަންޑުން އެހީތެރިކަން ލިބިގެންދާނީ ޓީވީ ރައިޓްސް ވިއްކައިގެން ލިބެންޖެހޭ އާމްދަނީ އަނބުރާ ލިބެން ނެތް ޓީމުތަކަށާއި، ސްޕޮންސަރުންގެ ފަރާތުން ލިބެންޖެހޭ ފައިސާގެ ދަތިތަކާއި ކުރިމަތިލާންޖެހޭ ޓީމުތަކަށް ކަމަށެވެ. މީގެ އިތުރުން ސްޕެއިންގެ ފެޑަރޭޝަނުން ވަނީ ޕްރޮފެޝަނަލް ނޫން ގޮތެއްގައިވެސް ފުޓްބޯޅަ ކުރިއެރުވުމަށް މަސައްކަތްކުރާ ޓީމުތަކަށް އެހީވުމުގެ ގޮތުން 4 މިލިއަން ޔޫރޯގެ ލޯން ފެސިލިޓީ އެއް ގާއިމްކޮށްފައެވެ. އަދި މި ހުރިހާ ފައިސާއެއް އަނބުރާ ފެޑަރޭޝަނަށް ދެއްކުމަށް ފަސް އަހަރުގެ މުއްދަތެއް ލިބޭނެ ކަމަށް ފެޑަރޭޝަނުން ބުނެއެވެ.

ޔޫރަޕުގައި ހަލުވިކަމާއެކު ފެތުރެމުން އަންނަ ކޮވިޑް-19 ފެތުރެން ފެށުމާއިއެކު ސްޕެނިޝް ލީގާއި ޔުއެފާ ޗެމްޕިއަންސް ލީގާއި ޔުރޮޕާ ލީގުވެސް ވަނީ މެދު ކަނޑާލާފައެވެ.

ސްޕެނިޝް ލީގު މެދުކަނޑާލާފައިވާއިރު، ލީގުގެ މެޗުތައް ދެން ފަށާނެ ތާރީޚެއް ކަނޑައަޅާނީ ސަރުކާރުން ވަކި ގޮތެއް އެންގުމުން ކަމަށް ސްޕެއިންގެ ފުޓްބޯޅަ ފެޑަރޭޝަނުން ވަނީ ބުނެފައެވެ.

ސްޕެނިޝް ލީގުގެ މެޗުތައް ފެށުން މުއްދަތެއް ނެތް ގޮތަށް ފަސްކުރިއިރު، މިއަހަރުގެ ހޫނު މޫސުމުގައި ބާއްވަން ކުރިން ނިންމި ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ. އެހެންކަމުން ހޫނު މޫސުމުގައި ލީގުގެ ކުޅުން ކުރިއަށް ގެންދިޔުމުގެ ފުރުސަތު ލިބޭނެ އެވެ.