ޗައިނާގެ އެހީގެ ފުރަތަމަ ޝިޕްމެންޓް ދިވެހި ސަރުކާރާ ހަވާލުކޮށްފި
27 މާރިޗު 2020 | ހުކުރު 14:08އިތުރު އެހީތައް ލިބިގެންދާނެ
ޗައިނާއިން އެހީގެ ގޮތުގައި ހަދިޔާކުރި ތަކެއްޗާއި، މިނިސްޓަރު ޝާހިދު ހަވާލުވެވަޑައިގަންނަވަނީ
ކޮވިޑް-19 އާ ދެކޮޅަށް ރާއްޖެއިން ކުރާ މަސައްކަތްތަކަށް އެެހީތެރިވެ ދިނުމުގެގޮތުން އެމެޖެންސީ ހާލަތްތަކުގައި ބޭނުންކުރާނެ ވަސީލަތްތައް ޗައިނާ ސަރުކާރުން ދިވެހި ސަރުކާރާ ހަވާލުކޮށްފި އެވެ. އެ ތަކެއްޗަކީ ޗައިނާގެ ޔުނާން ޕްރޮވިންސުން ހަދިޔާކުރި ތަކެއްޗެވެ.
ހުކުރު ދުވަހު ފޮރިން މިނިސްޓްރީގައި ބޭއްވި ރަސްމިއްޔާތެއްގައި ޗައިނާގެ ފަރާތުން އެހީގެ ތަކެތި ހަވާލުކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ޒަންގް ލީ ޒޮންގް އެވެ. އަދި ރާއްޖޭގެ ފަރާތުން ޗައިނާގެ އެހީއާ ހަވާލުވެވަޑައިގެންނެވީ ފޮރިން މިނިސްޓަރު އަބްދުﷲ ޝާހިދުއެވެ.
އެ ތަކެއްޗާއި ހަވާލުވެވަޑައިގެންނެވުމަށްފަހު ނޫސްވެރިންނާ ވާހަކަ ދައްކަވަމުން މިނިސްޓަރު ޝާހިދު ވިދާޅުވީ، ޗައިނާއިން ހަދިޔާކުރި ތަކެއްޗަކީ ރާއްޖޭގެ ސިއްހީ ދާއިރާގައި މަސައްކަތަކުރައްވާ ފަރާތްތަކުން ކޮވިޑް-19 އާ ދެކޮޅަށްކުރާ މަސައްތައް ލިބިގެންދާނެ އިތުރު ކުރިއެރުމަކަށް ވެގެންދާނެ ކަމަށެވެ. ޗައިނާ އަކީ ރާއްޖެއާ އަބަދުވެސް ގާތްގުޅުމެއް ބާއްވަމުން އަންނަ ގައުމެއްކަން ފާހަގަކުރައްވަމުން ޝާހިދު ވިދާޅުވީ، މި ނުތަނަވަސް ދަނޑިވަޅުގައި ރާއްޖެއާ ޗައިނާއާ ދެ ގައުމު އެކީގައި ތިބޭނެކަމުގެ ޔަގީންކަން އެބައޮތް ކަމަށެވެ. ޝާހިދު ވަނީ ޗައިނާއިން ކޮވިޑް-19 އާ ދެކޮޅަށް ކުރާ މަސައްކަތަށް ތައުރީފް ކުރައްވާފައެވެ.
ޗައިނާގެ އެމްބެސެޑަރު ވިދާޅުވީ، ރާއްޖޭގައި ކޮވިޑް-19 އޮތް ހާލަތު ވަރަށް ގާތުން ބައްލަވަމުން ގެންދަވާ ކަމަށާއި، ސަރުކާރުން އަޅާފައިވާ ފިޔަވަޅުތަކަކީ އަވަސް އަދި ރަނގަޅު ފިޔަވަޅުތަކެއް ކަމަށެވެ. ޗައިނާއިން ރާއްޖެއަށް ދިން އެހީގެ ފުރަތަމަ ބެޗް އައިސްފައިވަނީ ހުކުރު ދުވަހުގެ ހެނދުނުގެ ވަގުތެއްގައެވެ. ސަފީރު ވިދާޅުވީ، ޗައިނާގެ ބައެއް ކުންފުނިތަކުން ކުރިޔަށް އޮތްތަނުގައި އިތުރު އެހީތަކެއް ދިނުމަށް ނިންމާފައިވާ ކަމަށެވެ. ނަމަވެސް އެކަށީގެންވާ ރޫޓެއް ނެތުމުން ދަތިތަކާއި ދިމާވާކަން ސަފީރު ފާހަގަކުރެއްވިއެވެ.
