ސިޔާސީ މަގާމުތަކަށް މީހުން އައްޔަންކުރުން މަޑު ޖައްސާލައިފި
ރައީސް ޞާލިހު ވިދާޅުވީ، ކޮވިޑް-19ގެ ސަބަބުން ރާއްޖޭގެ އިގްތިޞާދު ހާއްސަކޮށް، ފަތުރުވެރިކަމުގެ ސިނާއަތަށް ބޮޑެތި ގެއްލުންތަކެއް ވަމުންދާ ކަމަށް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ސިޔާސީ މަގާމުތަކަށް ބޭފުޅުން އައްޔަން ކުރުން މިވަގުތަށް މަޑުޖައްސާލާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އާ ގުޅިގެން ދަރުބާރުގޭގައި ގައިމުކޮށްފައިވާ ނޭޝަނަލް އެމަޖެންސީ އޮޕަރޭޝަން ސެންޓަރުގައި ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޞާލިހު ވިދާޅުވީ، ކޮވިޑް-19އާ ގުޅިގެން ދުނިޔޭގެ އިގްތިޞާދީ ހާލަތާއި އަދި ރާއްޖޭގެ އިގްތިޞާދީ ހާލަތު ވަރަށް ބޮޑަށް ދަށަށް ގޮސްފައިވާތީ، މިވަގުތަށް ސިޔާސީ މަގާމުތަކަށް ބޭފުޅުން އައްޔަނު ކުރެއްވުން މަޑު ޖައްސާލާފައިވާ ކަމަށެވެ.
ރައީސް ޞާލިހުގެ ސަރުކާރުގައި ކޯލިޝަން ހަތަރު ސިޔާސީ ޕާޓީއެއް ވެއެވެ. އޭގެ ތެރޭގައި ސަރުކާރު ހިންގާ މައިޕާޓީއަކީ އެމްޑީޕީ އެވެ. މީގެއިތުރުން ޖުމްހޫރީ ޕާޓީއާއި އަދާލަތު ޕާޓީގެ އިތުރުން ދާދިފަހުން ކުރީގެ ރައީސް މައުމޫން އަބްދުލްގައްޔޫމް އުފެއްދެވި އެމްއާރުއެމް ހިމެނެއެވެ.
ކޮވިޑް-19 އާ ގުޅިގެން ސަރުކާރާއި ނޭޝަނަލް އެމަޖެންސީ އޮޕަރޭޝަން ސެންޓަރުން ގެންދަނީ ހަރުދަނާ ފިޔަވަޅުތަކެއް އަޅުއްވަމުން ނެވެ.
ނޫސްވެރިންގެ ބައްދަލުވުމުގައި ވެސް ރައީސް ޞާލިހު ވަނީ ސަރުކާރުން އަޅުއްވާފައިވާ އަދި ކުރިއަށް އޮތްތާނގައި އަޅުއްވާނެ ފިޔަވަޅުތަކާ ގުޅޭގޮތުންވެސް ވާހާކަފުޅު ދައްކަވާފަ އެވެ. އަދި އިގްތިޞާދު ހަޔަކަށް އެޅުއްވުމަށް ކުރައްވާނެ ކަންކަމާއި އަދި ވިޔަފާރިވެރިންނާއި ދިވެހި ރައްޔިތުންގެ ދިމާވެފައިވާ އަޑިގުޑަންތަކުން އަރާގަނެވޭނެ ކަންކަމާގުޅޭ ގޮތުންވެސް ގިނަ ވާހަކަފުޅުތަކެއް ދައްކަވާފައިވެއެވެ.
މިނޫސްވެރިންގެ ބައްދަލުވުން ގާތްގަނޑަކަށް ދެގަޑިއިރަށް ދިގުދެމިގެން ދިޔައިރު، ގިނަ އަދަދެއްގެ ނޫސްވެރިން ބައިވެރިވި އެވެ. އަދި އެހުރިހާ ނޫސްވެރިން ކުރެއްވި ސުވާލުތަކަށް ރައީސް ޞާލިހު ވަނީ ޖަވާބު ދެއްވާފަ އެވެ.
