ކޮވިޑް-19: ރާއްޖެއިން އަމަލުކުރަމުން އަންނަނީ އެމެރިކާއަށް ވުރެ ރަނގަޅަށްކަމަށް ވިދާޅުވެ ޗައިނާ ސަފީރުގެ ތައުރީފު ރާއްޖެއަށް
25 މާރިޗު 2020 | ބުދަ 09:33ޗައިނާ ސަފީރު ޖަންގް ލިޖޮންގް ވިދާޅުވީ ފެށުނީއްސުރެ ދިވެހިރާއްޖެ އިން އަމަލުކުރީ ވަރަށް ތަފާތުކޮށް ކަމަށް
ޗައިނާ ސަފީރާއި ފޮރިން މިނިސްޓަރ ބައްދަލުކުރައްވަނީ
ކޮވިޑް-19 އިން ރައްކާތެރިވުމުގެ ގޮތުން ރާއްޖެއިން އަމަލުކުރަމުން އަންނަނީ އެމެރިކާއަށް ވުރެ ރަނގަޅަށް ކަމަށް ވިދާޅުވެ ރާއްޖޭގައި ހުންނަވާ ޗައިނާގެ ސަފީރު ޒަންގް ލިޒޮންގް ރާއްޖެއަށް ތައުރީފް ކުރައްވައިފި އެވެ.
އެމެރިކާގެ ވޮޝިންޓަން ޕޯސްޓް ނޫހުގައި ބައިނަލްއަގުވާމީ ޚަބަރުތައް ކަވަރުކުރާ ނޫސްވެރިއެއްކަމުގައިވާ އެމިލީ ރައުހަލާ ކުރި ޓްވީޓެއްގައި ބުނެފައިވަނީ މިބައްޔާ ގުޅިގެން ލިބުނު އެންމެ ބޮޑު ފިލާވަޅަކީ ޗައިނާ އިން އިހުސާސްކުރި ހިތްދަތިކަން، އެމެރިކާ އިން ދެނެނުގަނެވި އޮތް މިންވަރުކަމަށެވެ. އެމެރިކާއިން މިހާރު ތަހައްމަލު ކުރަމުންދާ ހުރިހާ ބިރުވެރިކަމެއް ފުރަތަމަ ހިނގީ ވޫހާންގައި ކަމަށާއި އެ އެކަންތައްތައް ކަވަރ ކުރި ނަމަވެސް ގިނަ މީހުން އެކަމާ އަޅައިނުލި ކަމަށް ޓްވީޓްގައި އޭނާ ބުނެފައިވެ އެވެ.
އެމިލީގެ ޓްވީޓް ރިޓްވީޓް ކުރައްވަމުން ޗައިނާ ސަފީރު ޖަންގް ލިޖޮންގް ވިދާޅުވީ ފެށުނީއްސުރެ ދިވެހިރާއްޖެ އިން އަމަލުކުރީ ވަރަށް ތަފާތުކޮށް ކަމަށެވެ. އަދި ރާއްޖެއިން އަމަލުކުރީ ވަރަށް ފުރިހަމައަށް ކަމަށް ޗައިނާ ސަފީރު ވިދާޅުވި އެވެ.
އެމެރިކާގައި ހަލުވިމިނުގައި ކޮވިޑް-19 ފެތުރެމުންދާއިރު އެމެރިކާގެ ރައީސް ޑޮނަލްޑް ޓްރަމްޕް ގެންދަވަނީވީ އެންމެ އަވަހަކަށް އެމެރިކާ އާންމު ހާލަތަކަށް ގެނައުމަށް މަސައްކަތް ކުރައްވަމުންނެވެ. އެގޮތުން އޭޕްރީލް މަހުގެ 12 ވަނަ ދުވަހުގެ ކުރިން އެމެރިކާ އާންމު ހާލަތަށް ގެންނަން ބޭނުންފުޅުވާކަމަށް ޓްރަމްޕް ވަނީ ވިދާޅުވެފަ އެވެ. އެމެރިކާގައި މިހާތަނަށް 54,935 މީހުންނަށް ވައިރަސް ޖެހިފައިވާއިރު 784 މީހުން ވަނީ މިވައިރަސް ޖެހިގެން މަރުވެފަ އެވެ.
ކޮވިޑް-19 ފެތުރުން ހުއްޓުވުމަށް ޓަކައި ރާއްޖެއިން ވަނީ ދުރާލާ ފިޔަވަޅުތައް އަޅާފަ އެވެ. ކަމާބެހޭ ފަރާތްތަކުން ބުނެފައިވަނީ ރާއްޖެއިން މިވައިރަސް އަށް ތައްޔާރުވަމުން އަންނަނީ އެންމެ ނުރައްކާތެރި ހިސާބަށްވެސް ވައިރަސް ގޮސްދާނެކަމަށް ބަލައިގެން ކަމަށެވެ. ރާއްޖޭން ކޮވިޑް-19 ޕޮޒިޓިވް ވި މީހުންގެ އަދަދަކީ 13 އެވެ. އޭގެ ތެރެއިން ފަސް މީހަކު ވަނީ އެބަލިން ފަަސޭހަވެފަ އެވެ.
