ފުޑްކޯޓުތައް ބަންދުކޮށްފައި ހުންނަ މުއްދަތަށް ކުލި މައާފުކޮށްދީފި
24 މާރިޗު 2020 | އަންގާރަ 16:18ފުޑްކޯޓްތަކުގެ ވިޔަފާރި ވެސް މިވަގުތު ހުއްޓުމެއް ވަނީ އައިސްފައި
ފުޑްކޯޓުތައް
ފުޑްކޯޓުތައް ބަންދުކޮށްފައި ހުންނަ މުއްދަތަށް ކުލި އެސްޓީއޯއިން މައާފުކޮށްދީފިއެވެ.
އެސްޓީއޯއިން ބުނީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19ގެ ސަބަބުން ކެފޭ އަދި ރެސްޓޯރަންޓް ފަދަ ތަންތަން ބަންދުކުރުމަށް ސަރުކާރުން ނިންމި ނިންމުމާ ގުޅިގެން އެސްޓީއޯ ފުޑްކޯޓްތަކުގެ ވިޔަފާރިވެސް މިވަގުތު ހުއްޓުމަކަށް އައިސްފައިވާ ކަމަށެވެ.
ފުޑްކޯޓްތައް ހިންގާ ފަރާތްތަކަށް މިދަނޑިވަޅުގައި ލިބޭނެ ގެއްލުން ކުޑަކުރުމަށާއި، އެފަރާތްތަކަށް މިފަދަ ދަނޑިވަޅެއްގައި އެއްބާރުލުންދިނުމަށް އެސްޓީއޯގެ މެނޭޖްމަންޓުން ނިންމާފައިވާ ކަމަށެވެ.
އެސްޓީއޯއިން ބުނީ ސަރުކާރުން ކެފޭ އަދި ރެސްޓޯރަންޓްތައް ބަންދުކުރުމަށް ނިންމާފައިވާ ދުވަހުން ފެށިގެން ސަރުކާރުން މިކަމުގައި އެހެން ގޮތެއް ނިންމަންދެން މިހިނގާ މުއްދަތުގައި ފުޑްކޯޓް ޔުނިޓްތަކަށް ދައްކަން ޖެހޭ ކުލި އެސްޓީއޯއިން މާފުކޮށްދީފައިވާ ކަމަށެވެ.
މިމަހުގެ 21 ވީ ހޮނިހިރު ދުވަހުގެ ރޭ 12:00 އިން ފެށިގެން ގްރޭޓާ މާލޭގެ ހުރިހާ ރެސްޓޯރަންޓްތަކާއި ކެފޭތައް ވަނީ ބަންދުކޮށްފައެވެ. ނަމަވެސް ޑެލިވަރީ އަދި ޓޭކްއަވޭގެ ހިދުމަތް ރެސްޓޯރަންޓްތަކަށް ދެވޭނެ ކަމަށް ސަރުކާރުން ބުނެއެވެ.
ކޮވިޑް-19 އިން ރައްކާތެރިވުމަށް ސަރުކާރުން ގިނި ފިޔަވަޅުތަކެއް ދަނީ އަޅަމުންނެވެ. އެގޮތުން މީހުން އެއްވެ އުޅޭތަންތަނަށް ނުދިއުމަށާއި، ކޮންމެހެން މަގުމައްޗަށް ނުކުންނަންޖެހޭ ހާލަތެއްގައި މެނުވީ ނުނިކުތުމަށް ކަމާބެހޭ މުއައްސަސާތަކުން ތަކުރާރުތައް ދަނީ އިލްތިމާސްކުރަމުންނެވެ.
