އެޕްރީލް އަދި މެއި މަހުގެ ބިލްތައް ތައްޔާރުކުރާނީ ސަބްސިޑީ ހިމަނައިގެން: ސްޓެލްކޯ
24 މާރިޗު 2020 | އަންގާރަ 16:23ބިލް ދެއްކުމުގައި އެ ކުންފުނީގެ ވެބްސައިޓާއި، އެޕްލިކޭޝަންގެ ބޭނުން ކުރުމަށް ވަނީ އިލްތިމާސްކޮށްފައި
ސްޓެލްކޯގެ މެނޭޖިން ޑިރެކްޓަރު ހަސަން މުގްނީ
އެޕްރީލް އަދި މެއި މަހުގެ ބިލުތައް ތައްޔާރުކުރާނީ ސަބްސިޑީ ހިމަނައިގެން ކަމުގެ ޔަގީންކަން ސްޓެލްކޯއިން ދީފިއެވެ.
އޭޕްރީލް އަދި މެއި މަހުގެ ކަރަންޓުބިލުން 40 އިންސައްތަ ސަރުކާރުން ސަބްސިޑައިޒް ކުރުމަށް ނިންމިކަން ސަރުކާރުން އިއުލާން ކޮށްފައިވަނީ މި މަހުގެ 19 ވަނަ ދުވަހުއެވެ.
އެކަމާއި ގުޅިގެން އަންގާރަ ދުވަހު ސްޓެލްކޯއިން ނެރެފައިވާ ބަޔާނެއްގައި ބުނީ، އެ ކުންފުނިން އަންނަ އެޕްރީލް އަދި މެއި މަހުގެ ބިލުތައް ތައްޔާރުކުރާނީ ސަބްސިޑީ ހިމަނައިގެން ކަމުގެ ޔަގީންކަން ރައްޔިތުންނަށް އަރުވާ ކަމަށެވެ.
މި ދުވަސްވަރަކީ ރާއްޖެއަށް ހޫނު މޫސުމަށްވެފައި، ގޭގައި ގިނަ ވަގުތު ތިބޭނެ ދުވަސްވަރަކަށްވުމާއި އެކު ގިނަ އަދަދަކަށް ކަރަންޓު ބޭނުން ކުރެވެމުންދާނެ ދުވަސްވަރަކަށް ވާތީ އެކަމަށް ސަމާލުވެ، ކަރަންޓުގެ ހަރަދު ކުޑަކޮށް، އިގްތިސާދު ކުރުމަށް އެންމެހާ ފަރާތްތަކަށް ސްޓެލްކޯއިން ވަނީ އިލްތިމާސް ކޮށްފައެވެ. ސްޓެލްކޯ ވަނީ އަދި ބިލް ދެއްކުމުގައި އެ ކުންފުނީގެ ވެބްސައިޓާއި، އެޕްލިކޭޝަންގެ ބޭނުން ކުރުމަށްވެސް އިލްތިމާސްކޮށްފައެވެ.
