ކޮވިޑް-19އާ ގުޅޭގޮތުން މިނިސްޓަރު ޝާހިދު ލަންކާ އަދި ނޯވޭގެ ފޮރިން މިނިސްޓަރުންނާ މަޝްވަރާކުރައްވައިފި
24 މާރިޗު 2020 | އަންގާރަ 12:50ލަންކާ ސަރުކާރުން އަޅަމުންދާ ފިޔަވަޅުތަކަށް މިނިސްޓަރ ޝާހިދު ތައުރީފްކުރެއްވި
ފޮރިން މިނިސްޓަރު އަބްދުﷲ ޝާހިދު
ސްރީލަންކާ އަދި ނޯވޭގެ ފޮރިން މިނިސްޓަރުންނާއި ފޯނުން ގުޅުއްވައި، ކޮވިޑް-19 އާއި ދެކޮޅަށް ކުރެވޭ މަސައްކަތްތަކާއި ބެހޭ ގޮތުން މިނިސްޓަރ އޮފް ފޮރިން އެފެއަރޒް އަބްދުﷲ ޝާޙިދު މަޝްވަރާކުރައްވަފިއެވެ.
ލަންކާގެ ޚާރިޖީ ވަޒީރު ދިނޭޝް ގުނަވަރުދަނަ އާއި ފޯނުން ވާހަކަދައްކަވަމުން މިނިސްޓަރ ޝާހިދު ވަނީ ސްރީލަންކާއަކީ ދިވެހިންގެ "ދެވަނަ ވަޒަން" ކަމުގައި ދެކޭ ޤައުމެއްކަން ފާހަގަކުރައްވައި، އެޤައުމުގައި ތިބި ދިވެހިންނަށް ލަންކާއިން ފޯރުކޮށްދޭ މެހުމާންދާރީއަށް ޝުކުރު އަދާކުރައްވާފައެވެ. އަދި ރާއްޖޭގައި މިވަގުތު ތިބި ލަންކާ ރައްޔިތުންގެ ޙާލު ދިވެހި ސަރުކާރުން ބަލަމުން ގެންދާނެކަމުގެ ޔަގީންކަން ލަންކާގެ ފޮރިން މިނިސްޓަރަށް މިނިސްޓަރ ޝާހިދު އެރުވިއެވެ.
މުޅި ދުނިޔޭގައިވެސް އަދި ދެކުނު އޭޝިއާ ސަރަހައްދުގައިވެސް ހަލުވިކަމާއެކު ކޮވިޑް-19 ފެތުރެމުންދާކަން ފާހަގަކުރައްވައި، މިބައްޔާ ދެކޮޅަށް ލަންކާ ސަރުކާރުން އަޅަމުންދާ ފިޔަވަޅުތަކަށް މިނިސްޓަރ ޝާހިދު ތައުރީފްކުރެއްވިއެވެ.
އަދި ޙާލަތު ތަންދިން މިންވަރަކުން މިދަނޑިވަޅުގައިވެސް ދެޤައުމުގެ މެދުގައި ސޮއިކުރެވިފައިވާ ވިސާގެ އެއްބަސްވުންތައް ދަމަހައްޓަމުން ގެންދިޔުމަށް ދެ ބޭފުޅުންވެސް އެއްބަސްވެވަވަޑައިގެންނެވިއެވެ.
ކޮވިޑް-19 އިން ރައްކާތެރިވުމަށް ރާއްޖެއިން އަޅަމުންދާ ފިޔަވަޅުތަކުގެ ތަފްސީލް ލަންކާގެ މިނިސްޓަރާއި ހިއްސާކުރައްވަމުން، ރާއްޖޭގެ ސިއްހީ ނިޒާމުގެ ހުރި ގޮންޖެހުންތައް ފާހަގަކުރައްވައި، ބޭނުންވެއްޖެ ޙާލަތެއްގައި ލަންކާއިން ސިއްހީ ދާއިރާގެ މާހިރުން ރާއްޖެއަށް ފޯރުކޮށްދެއްވުމަށް މިނިސްޓަރ ޝާހިދު އެދިވަޑައިގެންނެވިއެވެ.
އަދި މިފަދަ އެހީތެރިކަމަކަށް ރާއްޖެއިން އެދިއްޖެ ޙާލަތެއްގައި އެ އެހީތެރިކަމެއް ފޯރުކޮށްދެއްވާނެކަމުގެ ޔަގީންކަން ލަންކާގެ ފޮރިން މިނިސްޓަރު ވަނީ ދެއްވާފައެވެ.
ނޯވޭގެ ފޮރިން މިނިސްޓަރީ އިން އެރިކްސަން ސޯރެއިޑާއެކު ފޯނުން ކުރެއްވި މަޝްވަރާތަކުގައި ވެސް މިނިސްޓަރ ޝާހިދު ވަނީ ރާއްޖެއިން ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުތަކުގެ ތަފްސީލް ދެއްވާފައެވެ. އަދި ނޯވޭގެ ފޮރިން މިނިސްޓަރު ވަނީ ކޮވިޑް-19 އާއި ދެކޮޅަށް އެގައުމުން އަޅަމުންދާ ފިޔަވަޅުތަކާ އެގައުމުގެ ތަޖުރިބާ ރާއްޖެއާ ހިއްސާކުރުމަށް އެއްބަސްވެވަޑައިގެންފައެވެ. އަދި ބޭނުންވެއްޖެ ހިނދެއްގައި ނޯވޭއަށް ފޯރުކޮށްދެވުނު އެހީތެރިކަމެއް މިދަނޑިވަޅުގައި ރާއްޖެއަށް ފޯރުކޮށްދެއްވާނެކަމުގެ ޔަގީންކަން އެކަމަނާ ވަނީ މިނިސްޓަރ ޝާހިދަށް އަރުވާފައެވެ.
