ކޮވިޑް-19: މިހާރު ބަލިޖެހިފައިވާ 8 މީހުންގެ ހާލު ރަނގަޅު!
24 މާރިޗު 2020 | އަންގާރަ 10:06އެންމެންގެ ހާލު ރަނގަޅު
ޓާސްކް ފޯހުގެ ތަރުޖަމާނު މަބްރޫކް އަޒީޒް
ކޮވިޑް-19 ރާއްޖެއިން ފެނިފައިވާ މީހުންގެ އަދަދަކަށް ބަދަލެއް ނާންނަ ކަމަށާއި، މިހާރު އެކްޓިވް 8 ކޭސް އޮތް އިރު، ހުރިހާ އެންމެންގެ ހާލު ރަނގަޅުކަމަށް ސަރުކާރުން ހާމަކޮށްފިއެވެ.
ރާއްޖޭއިން ވައިރަސްއަށް ޕޮޒިޓިވްވި 13 މީހުންގެ ތެރެއިން 5 މީހުން ރަނގަޅުވެފައިވާއިރު، ރާއްޖޭގެ ހަލާތާއި ބެހޭ އެންމެ ފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި، ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވީ މިހާރު ވައިރަސްއަށް ޕޮޒިޓިވް ވެފައިވާ ހުރިހާ މީހުންގެ ހާލު ރަނގަޅު ކަމަށެވެ.
ރާއްޖެއިން ކޮވިޑް-19 އަށް ޕޮޒިޓިވް ވެފައިވާ މީހުންގެ އަދަދަށް ބަދަލެއް ނާންނަތާ ހަފްތާއެއް ވެފައިވާއިރު، މަބްރޫކް ވިދާޅުވީ މިހާތަނަށް 732 ސާންޕަލެއް ނަގާފައިވާ ކަމަށާއި، 719 ސާންޕަލް ނެގެޓިވް ކަމަށެވެ. 2 ސާމްޕަލްގެ ނަތީޖާ އަދި ނުލިބޭ ކަމަށް މަބްރޫކް ވިދާޅުވިއެވެ.
މާލެސިޓީގައި ގާއިމްކޮށްފައިވާ ފުލޫ ކްލިނިކުތަކުން ގިނަ ބަޔަކު ފަރުވާ ހޯދާކަން ފާހަގަކުރައްވައި މަބްރޫކް ވިދާޅުވީ ސެނެހިޔާގައި ގާއިމްކޮށްފައިވާ ފުލޫ ކުލިނިކުން 190 ފަރާތެއް، ސިނަމާލެ ފުރަގަހުގައި ހުންނަ ޓްރެވަލް ކުލިނިކަށް 13 މީހުން، ބިދޭސީންގެ ކްލިނިކް 17 މީހުން، ވިލިމާލެ ފުލޫ ކުލިނިކަށް 22 މީހުން ޑޮކްޓަރަށް ދައްކާ ފަރުވާ ހޯދާފައިވާ ކަމަށެވެ.
ފާއިތުވެގެންދިޔަ 24 ގަޑިއިރު ތެރޭގައި، 988 އަށް ކޯލަކަށް އެމެޖެންސީ ރެސްޕޯންސް ޓީމުން އެޓެންޑްކޮށްފައިވެއެވެ.
