ކޮވިޑް-19 އާއި ގުޅިގެން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ބިލު ދެން ލިބޭނީ އެސްއެމްއެސްއަކުން ކަމަށް އެ ކުންފުނިން ބުނެފިއެވެ.
ސްޓެލްކޯއިން ބުނީ މޮބައިލް ނަންބަރު ދީފައިވާ ހުރިހާ ކަސްޓަަމަރުންނަށް ވެސް ބިލް ފޮނުވާނީ އެސްއެމްއެސް އާއި ސްޓެލްކޯގެ މޯބައިލް އެޕްލިކޭޝަން މެދުވެރިކޮށް ކަމަށެވެ. އެހެންނަމަވެސް ގުޅޭނެ މޮބައިލް ނަންބަރު ނުދޭ ކަސްޓަމަރުންނަށް ފޮނުވާނީ ޕްރިންޓުކޮށްފައިވާ ބިލު ކަމަށެވެ.
މިގޮތަށް އެ ކުންފުނިން ނިންމާފައިވާއިރު ކޮވިޑް-19 އާއި ގުޅިގެން ސްޓެލްކޯ ގެ އޮންލައިންގެ ޚިދުމަތްތައް ބޭނުން ކުރުމަށް އެ ކުންފުނިން ވަނީ ދާދި ފަހުން އިލްތިމާސްކޮށްފައެވެ.
ސްޓެލްކޯއިން ބުނީ ރާއްޖެއަށް ދިމާވެފައިވާ ހާލަތާއި ގުޅިގެން އެ ކުންފުނީގެ އޮންލައިން ޙިދުމަތްތައް ބޭނުން ކުރުމާއި ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19، މި ބަލި ރާއްޖެއަށް ވެސް މިހާރު އައިސްފައި ވުމާއެކު، މި ނުރައްކާތެރި ވައިރަހުން ސަލާމަތްވުމުގެ ގޮތުން އަދި ދިވެހި ރައްޔިތުންގެ ރައްކާތެރިކަމާއި ސަލާމަތަށްޓަކައި އެ ކުންފުނިން ދެމުންގެންދާ ޚިދުމަތްތައް ހޯދުމަށް ސްޓެލްކޯއަށް ޒިޔާރަތްކުރުމުގެ ބަދަލުގައި، ކުންފުންޏަށް ކަސްޓަމަރުން އެންމެ ގިނައިން ޒިޔާރަތްކުރާ ކަންކަންކަމުގައިވާ ބިލް ދެއްކެވުންފަދަ ޚިދުމަތްތައް ހޯދުމަށް ކުންފުނީގެ ވެބްސައިޓާއި، އެޕްލިކޭޝަން ބޭނުން ކުރުމަށް އިލްތިމާސްކުރާ ކަމަށެވެ.
މިފަދަ ޓެކްނޮލޮޖީގެ ވަސީލަތްތަަކަށް ދިވެހިން އަހުލުވެރިވުމަކީ ބަވަނަވެފައިމިވާ ދުނިޔޭގައި ކަސްޓަމަރަށާއި، ހިދުމަތްދޭ ތަނަށް ވެސް ފަސޭހަތަކެއް ލިބިގެންދާނެ ކަމެއްކަމެއް ކަމަށް ސްޓެލްކޯއިން ބުނެއެވެ. އެހެންކަމުން ސްޓެލްކޯގެ ޚިދުމަތްތައް ހޯދުމުގައި ޓެކްނޮލޮޖީގެ ޒަރިއްޔާތައް ކަމަށްވާ ވެބް ސައިޓާއި، އެޕްލިކޭޝަން ބޭނުން ކުރަމުންގެންދިއުމަށް އެދޭ ކަމަށެވެ.
މީގެ އިތުރުން ސްޓެލްކޯއިން ބުނީ އެޕްލިކޭޝަން ތައްޔާރުކުރެވިފައިވަނީ ބިލްތަކުގެ ތަފްސީލު ބަލާލުމާއެކު، ފަސޭހައިން ބިލް ދައްކާލެވޭ ގޮތަށް ކަމަށެވެ. އަދި ކުންފުނީގެ ޚިދުމަތްތަކާއި ބެހޭ އިތުރު މައުލޫމާތު ހޯދަން ބޭނުންވާނަމަ، ކުންފުނީގެ ނަންބަރު 3314949 އަށް ގުޅުއްވުން އެދޭ ކަމަށް ސްޓެލްކޯ އިން ބުނެއެވެ.
ކޮވިޑް-19 އިން ނައްތާލުމަށް ސަރުކާރުން ކުރަމުންދާ މަސައްކަތްތައް ފާހަގަކޮށް ސްޓެލްކޯއިން ބުނީ މި ހާލަތުގައި ދިވެހި ހުރިހާ ރައްޔިތުން ވެސް ސަރުކާރުން ދެމުންގެންދާ އިރުޝާދުތަކާއި އެއްގޮތަށް އަމަލުކޮށް، ސާފުތާހިރުކަމަށް ލޯބިކުރުމާއެކު، އެކަކު އަނެކަކަށް އަޅާލާ، އެއްބައިވަންތަކަމާއެކު މުޅި ދުނިޔެއަށް ނަމޫނާ ދައްކަމުންގެންދާ ބައެއްކަށްވުމަށް އެދޭ ކަމަށެވެ.
