ކޮވިޑް-19: ވިލިމާލޭގައި އިތުރު ފުލޫ ކްލިނިކެއް ހުޅުވައިފި
23 މާރިޗު 2020 | ހޯމަ 10:41އަލަށް ހުޅުވި ފްލޫ ކްލިނިކުން ހިދްމަތް ދެމުންދާނީ ހެނދުނު 10:00 ން ހަވީރު 06:00 ށް
ހުޅުމާލެ ހޮސްޕިޓަލް
ވިިލިމާލޭގައި އިތުރު ފުލޫ ކްލިނިކެއް ހުޅުވައިފި އެވެ.
ނޭޝަނަލް އިމަޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާނު މަބްރޫކް އަޒީޒު ވިދާޅުވީ، އެ ކްލިނިކުން ހެނދުނު 10:00 ން ފެށިގެން ހަވީރު 06:00 އާ ހަމައަށް ހިދުމަތް ލިބޭނެ ކަމަށެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ރާއްޖެއަށްވެސް ފޯރާފައިވާތީ، އެކަމަށް ހާއްސަ ފުލޫ ކްލިނިކްތަކަކުނ ހިދުމަތްތަކެއް މިހާރުވެސް ދެމުން ދެއެވެ. އެގޮތުން، ސެނެހިޔާގައި ފުލޫ ކްލިނިކެއް ހުޅުވާފައިވާއިރު، ޓްރެވަލް ފްލޫ ކްލިނިކެއް މާލޭގައި ހުޅުވާފައިވެއެވެ. އަދި ހުޅުމާލޭގައި އެކްސްޕެޓް ފްލޫ ކްލިނިކެއް ހުޅުވާފައިވެއެެވެ.
އެ ކްލިނިކްތަކުން ދަނީ ކޮންމެ ދުވަހަކުވެސް ހިދުމަތް ދެމުން ނެވެ.
މިދިޔަ ޑިސެމްބަރު މަހުގެ ފަހުކޮޅު، ޗައިނާގެ ވޫހާން ސިޓީން ފެނުނު ކޮވިޑް-19 މިހާރު މުޅި ދުނިޔޭގެ ހުރިހާ ގައުމަކަށްހެން މިވަނީ ފެތުރިފަ އެވެ. އެގޮތުން، ބަލި ޖެހުނު މީހުންގެ އަދަދު ވެސް 345،000 ށް ވުރެ މައްޗަށް ވަނީ އަރާފަ އެވެ. އަދި މިބަލީގައި މިހާތަނަށް 14،900 ށް ވުރެ ގިނަ މީހުން ވަނީ މަރުވެފަ އެވެ.
ރާއްޖޭގައި މިހާތަނަށް 13 މީހަކު ކޮވިޑް-19 އަށް ޕޮޒިޓިވް ވެފައިވާއިރު، އޭގެތެރެއިން 5 މީހަކު މިވަނީ އެބަލިން ރަނގަޅު ވެފައެވެ. މިހާރު ކޮވިޑް-19 ޖެހިގެން ރާއްޖޭގައި ފަރުވާ ދެމުންދަނީ 8 މީހަކަށެވެ.
