ކޮރޯނާ ވައިރަސް ބަލިކުރަން ރައްޔިތުން ބަންދު ކުރުމަކުން އެކަނި ނުފުދޭ: ޑަބްލިޔު.އެޗް.އޯ

ކޮރޯނާ ވައިރަސް ބަލިކުރަން ރައްޔިތުން ބަންދު ކުރުމުން އެކަނި ނުފުދޭ ކަމަށް ޑަބްލިޔު.އެޗް.އޯގެ އެންމެ އިސް އިމަރޖެންސީ އެކްސްޕާޓް، ޑރ. މައިކް ރަޔަން ވިދާޅުވެއްޖެއެވެ.

ޑރ. ރަޔަން ވިދާޅުވީ، ލޮކްޑައުންގެ އިތުރުން ބައްޔާ ގުޅޭ ގޮތުން، އާއްމު ސިއްހަތު ރައްކާތެރި ކުރުމާ ބެހޭ ރަނގަޅު ފިޔަވަޅުތައް އެޅުމަކީ ބަލި އަލުން އަށަގަތުމުން ދުރުކުރުމަށް މުހިންމު ކަމެއް ކަމުގައެވެ.

ކޮރޯނާ ވައިރަސް އެންމެ ބޮޑަށް ފެތުރުނު ޗައިނާ އާއި ކޮރެއާ އަދި ސިންގަޕޫރު ފަދަ ގައުމުތަކުގައި ބަލި ކޮންޓްރޯލް ކުރުމަށް ބޭނުން ކުރުމުގައި އެޅި އެންމެ މުހިންމު ފިޔަވަޅަކީ ބަލި އަށަގަތް ސަރަހައްދުތައް މުޅިން ބަންދު ކުރުމެވެ. ޔޫރަޕާއި އެމެރިކާގައިވެސް ބަލި ކޮންޓްރޯލް ކުރުމަށް މިހާރު އަޅަމުންދާ އެންމެ މުހިންމު ފިޔަވަޅަކީ މީހުން ބޭރަށް ނުނިކުތުމަށް ބާރު އެޅުމާއި ސަރަހައްދުތައް އޮފީސްތަކާއި ސްކޫލްތައް ބަންދު ކުރުމެވެ.

ޑރ. ރަޔަން ވިދާޅުވީ، ސިންގަޕޯރާއި ދެކުނު ކޮރެއާ އަދި ޗައިނާގައި ސަރަހައްދުތައް ބަންދު ކުރުމުގެ އިތުރުން ބައްޔަށް ޝައްކު ކުރެވޭ އެންމެން ޓެސްޓް ކުރުން އެ ގައުމުތަކުގައި ހަރުދަނާ ކުރުމުގެ ނަތީޖާ އެއްގެ ގޮތުން، ބަލީގެ އަސަރު އެ ގައުމުތަކުން އިސާހިތަކު ކުޑަވެގެން ދިޔަކަން ފާހަގަ ކުރެވުނު ކަމަށެވެ. އަދި އޭޝިޔާގެ ގައުމުތަކުން މި އަމަލު ކުރި ގޮތް އެއީ ޔޫރަޕް ދެކެންވީ ނަމޫނާ އެއް ކަމުގައިވެސް އޭނާ ވިދާޅުވިއެވެ.

ޑރ. ރަޔަން ވިދާޅުވީ، ބައްޔައް އެތައް ވެކްސިން އެއް އުފެއްދުމުގެ މަސައްކަތް ކުރިއަށް ދިޔަ ނަމަވެސް އަދި އިންސާނުންގެ ހަށިގަނޑުގައި އަޖުމަ ބެލުމަށް ބޭނުން ކުރާ ހިސާބަށް އައިސްފައިވަނީ އެންމެ ވެކްސިނެއް ކަމުގައެވެ.

ވެކްސިން އެއް ލިބެން ކިހާ މުއްދަތެއް ނަގާނެތޯ ދެންނެވި ސުވާލުގެ ޖަވާބުގައި އޭނާ ވިދާޅުވީ، ވެކްސިން އެއް އާއްމުކޮށް ބޭނުން ކުރަން ފެށޭނީ، ވެކްސިނަކީ އިންސާނުންނަށް މުޅިން ރައްކާތެރި އެއްޗެއްކަން ޔަގީން ކުރުމަށް ފަހުގައި ކަމަށާއި، އެކަމަށް އެންމެ މަދުވެގެން އަހަރެއްހާ ދުވަސް ނަގާނެ ކަމަށެވެ.

ދުނިޔޭގައި ކޮރޯނާވައިރަސް ބަލި ޖެހުނު މީހުންގެ އަދަދު މިހާރު ވަނީ ތިން ލައްކަ އަށް ވުރެ މައްޗަށް ގޮސްފައެވެ.