ކޮވިޑް-19: މިހާތަނަށް 636 މީހެއްގެ ސާމްޕަލް ނަގައި ޓެސްޓް ކޮށްފި
22 މާރިޗު 2020 | އާދީއްތަ 10:47ނުލިބި އޮތީ ދެ ސާމްޕަލް، ޓެސްޓްކުރުމުގައި މަރުހަލާގައި
ނޭޝަނަލް އެމަޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ދުނިޔޭގައި ހަލުވި ކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އަށް ޝައްކުކުރެވޭ 636 މީހެއްގެ ސާމްޕަލް ނެގިފައިވާ ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފި އެވެ.
އެންއީއޯސީން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ، ރާއްޖޭގައި މިހާތަނަށް 636 މީހެއްގެ ސާމްޕަލް ނެގިފައިވާއިރު، 621 މީހެއްގެ ސާމްޕަލް ނެގަޓިވް ވެފައިވާ ކަމަށެވެ. އަދި ދެ މީހެއްގެ ސާމްޕަލް ޓެސްޓް ކުރެވެމުންދާ ކަމަށެވެ.
މަބްރޫކް ވިދާޅުވީ، ރާއްޖެއިން މިހާތަނަށް ކޮވިޑް-19 އަށް ޕޮޒިޓިވް ވެފައިވަނީ 13 މީހެއްކަމަށާއި އޭގެ ތެރެއިން ތިން މީހެއް ރަނގަޅުވެފައިވާ ކަމަށެވެ.
ރާއްޖެއިން ކޮވިޑް-19 އަށް ޕޮޒިޓިވްވި ކޭސްއެއް ނުފެންނަތާ ހަފްތާއެއް ވެފައިވީނަމަވެސް، މިބަލީގެ ނުރައްކާ މުޅި ދުނިޔެއަށް އަދި ރާއްޖެއަށް ވެސް އަދިވެސް އެބައޮތް ކަމަށެވެ. އަދި މިބަލި ޖެހޭ މީހުންގެ ނިސްބަތަށް ބަލާއިރު ބަލީގެ ނުރައްކާތެރިކަން މިހާރުވެސް ބޮޑުކަން ބަލި ޖެހިފައިވާ މީހުންގެ އަދަދުތަކަށް ބަލާލުމުން އެނގޭ ކަމަށެވެ.
މީގެ ދެ ހަފްތާކުރިން ކޮވިޑް-19 ބަލިޖެހިނު މީހުންގެ އަދުދު އެއްލައްކައިގަ ހުރިނަމަވެސް މިހާރު އެއަދަދު މިވަނީ ތިންލައްކައަށް ވުރެ އިތުރުވެގެން ގޮސްފައެވެ.
