އާސެނަލްގެ ކެޕްޓަން ޕިއޭ-އެމެރިކް އޮބާމަޔަން ހޯދުމުގެ ރޭހުގައި ޗެލްސީވެސް ބައިވެރވެއްޖެ އެވެ.
ގެބޮން އަށް އުފަން އުމުރުން 30 އަހަރުގެ އޮބާމަޔަން ހޯދުމުގެ މަސައްކަތް ޗެލްސީން ފެށިއިރު، އޭނާ ހޯދުމަށް ބާސެލޯނާއިންވެސް އަންނަނީ މަސައްކަތް ކުރަމުންނެވެ.
އޮބާމަޔަން މި ވަގުތު އާސެނަލްގެ އެއްބަސްވުމުގައި ހުރީ 2021 ވަނަ އަހަރުގެ ހޫނު މޫސުމުގެ ނިޔަލަށެވެ. އާސެނަލުން އޮބާމަޔަން އަށް އައު އެއްބަސްވުމެއް ދޭން މިހާތަނަށް ކުރި މަސައްކަތް ކާމިޔާބެއްނުވި އެވެ. އެހެންކަމުން މި ސީޒަނަށްފަހު އޮބާމަޔަން ވިއްކާލަން އާސެނަލުން މިހާރު މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.
މިފަހަރުގެ ޖެނުއަރީ ޓްރާންސްފާ ބާޒާރުގައި އޮބާމަޔަން ހޯދަން ބާސާއިން މަސައްކަތްކުރި ނަމަވެސް އެކަން ކާމިޔާބުވާގޮތެއް ނުވިއެވެ. ނަމަވެސް އޮބާމަޔަންއަށް ބާސާއިން އަދިވެސް ޝައުގުވެރިވާ ކަމަށާއި، މި ސީޒަން ނިމުމުން އޮބާމަޔަން ހޯދަން 50 މިލިއަން ޔޫރޯގެ ބިޑެއް ކުރަން ބާސާ އޮތީ ތައްޔާރަށް ކަމަށް ރިޕޯޓުތައް ބުނެއެވެ.
ބާސާއިން އޮބާމަޔަންއަށް ބިޑުކުރާނެ ކަމަށް ރިޕޯޓުތައް ބުނި ނަމަވެސް، މި ސީޒަން ނިމުމުން ޗެލްސީންވެސް އޭނާއަށް ބިޑްކުރާނެ ކަމަށް ރިޕޯޓުތައް ބުނެއެވެ.
މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯ އަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 96 މެޗުގައި 61 ލަނޑު ޖަހާފައެވެ.
