ކޮވިޑް-19: އޮސްޓްރޭލިއާ އަދި އިންޑިއާގައި ދިރިއުޅެމުންދާ ދިވެހިން ސަމާލުވުމަށް އަންގައިފި
އޮސްޓްރޭލިއާގެ ސަރުކާރުން ވަނީ އެ ޤައުމުގެ ރައްޔިތުން ފިޔަވައި، އެހެން ފަރާތްތަކުން އެ ޤައުމަށް އެތެރެވުން މަނާކޮށްފަ
ކޮވިޑް-19
އޮސްޓްރޭލިއާ އަދި އިންޑިއާގައި ދިރިއުޅެމުންދާ ދިވެހިން ސަމާލުވުމަށް ފޮރިން މިނިސްޓްރީން އަންގައިފިއެވެ.
އޮސްޓްރޭލިއާގައި ދިރިއުޅޭ އަދި އެ ޤައުމަށް ދަތުރުކުރާ ދިވެހިން ސަމާލުވުމަށް ގޮވާލާ ފޮރިން މިނިސްޓްރީން ނެރުނު ބަޔާނުގައި ވަނީ މުޅި ދުނިޔޭގައި ކޮވިޑް-19 ހަލުވިކަމާއެކު ފެތުރެމުން އަންނާތީ، އޮސްޓްރޭލިއާގެ ސަރުކާރުން އެ ޤައުމުގެ ރައްޔިތުން ފިޔަވައި، އެހެން ފަރާތްތަކުން އެ ޤައުމަށް އެތެރެވުން 20 މާރިޗު 2020 ން މަނާކޮށްފައިވާކަމަށެވެ. އެގޮތުން އޮސްޓްރޭލިއާގެ ރައްޔިތުންނާއި، ދާއިމީ ރަށްވެހިންނާއި، އެމީހުންގެ ގާތް ޢާއިލީ މީހުން އޮސްޓްރޭލިއާއަށް އެތެރެވުމަށްފަހު، 14 ދުވަހު ގޭގައި ހޯމް އައިސޮލޭޝަންގައި ތިބެން ޖެހޭނެކަމަށް އެޤައުމުން ވަނީ ކަނޑައަޅާފައެވެ.
އިންޑިއާއަށް ދަތުރުކުރާ އަދި އިންޑިއާގައި ދިރިއުޅޭ ދިވެހިން ސަމާލުވުމަށް ގޮވާލާ ފޮރިން މިނިސްޓްރީން ބުނީ ކޮވިޑް-19 ފެތުރެމުން އަންނާތީ، އިންޑިއާ ސަރުކާރުން މި ބަލި އިތުރަށް ފެތުރުނަނުދިމަށްޓަކައި، މި މަހުގެ 22 ން 29 އަށް ފަސިންޖަރުން ގޮވައިގެން ދަތުރުކުރާ ބައިނަލްއަޤުވާމީ ކޮމަރޝަލް އެއަރލައިންތަކުގެ ދަތުރުތައް ވަގުތީގޮތުން ހުއްޓާލަން ނިންމާފައިވާކަމަށެވެ.
އެހެންކަމުން މި ދުވަސްތަކުގައި އޮސްޓްރޭލިއާ އަދި އިންޑިއާއަށް ދަތުރުކުރަން ޤަޞްދުކުރާ ދިވެހިން މިކަންތައްތަކަށް ސަމާލުވުމަށް ފޮރިން މިނިސްޓްރީން ވަނީ އެދިފައެވެ. އަދި މި ފިޔަވަޅުތަކައް ބަދަލުއައުން އެކަށީގެންވުމާއެކު، ދަތުރުކުރުމުގެ ކުރިން މަޢުލޫމާތު ސާފުކުރުމަށްވެސް އެދިފައިވެއެވެ.
މީގެ އިތުރުން، މި ދަނޑިވަޅުގައި ކޮންމެހެން ކުރަންޖެހޭ ދަތުރުތައް ފިޔަވައި، އެހެން ދަތުރުތައް ނުކުރުމަށް ފޮރިން މިނިސްޓްރީން އިލްތިމާސްކޮށްފައިވާއިރު އޮސްޓްރޭލިއާ އަދި އިންޑިއާގައި މި ވަގުތު ދިރިއުޅެމުންދާ ދިވެހި ރައްޔިތުން އެޤައުމުތަކުގެ ސަރުކާރުގެ ނިންމުންތަކާއި އެންގުންތަކަށް ސަމާލުވުމަށްވެސް ވަނީ އިލްތިމާސްކޮށްފައެވެ.
އަދި ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށްވެސް ވަނީ އިލްތިމާސްކޮށްފައެވެ.
ހަމައެހެންމެ، ރާއްޖޭން ބޭރަށް ދަތުރުކުރާ ދިވެހިން ޓްރެވަލް އިންޝުއަރެންސް ހޯދުމަކީވެސް، ޚާއްޞަކޮށް މި ދުވަސްވަރު ވަރަށް ބޭނުންތެރި ކަމެއްގެ ގޮތުގައި ފޮރިން މިނިސްޓްރީން ފާހަގަކުރެއެވެ.
