ކްރިމިނަލް ކޯޓަށް ނުގޮސް، ޕީޖީ އޮފީހުން ފުރަތަމަ ފަހަރަށް ވީޑިއޯ ކޮންފަރެންސް ކޯލް، އަޑުއެހުމެއް ބާއްވައިފި

ޕޮރޮސެކިއުޓަރ ޖެނެރަލް (ޕީޖީ) އޮފީހުގެ ގާނޫނީ ވަކީލުން ކްރިމިނަލް ކޯޓަށް ހާޒިރުވުމުގެ ބަދަލުގައި، އޯޑިއޯ ވީޑިއޯ މެދުވެރިކޮށް، އަޑު އެހުމެއް ފުރަތަމަ ފަހަރަށް ބާއްވައިފި އެވެ.

ޕީޖީ އޮފީހުން ބުނީ، ޕީޖީ އޮފީހުން ކްރިމިނަލް ކޯޓާއެކު ފުރަތަމަ ފަހަރަށް އޯޑިއޯ ވީޑިއޯ ކަނެކްޝަން ގާއިމުކޮށް، ބުރާސްފަތި ދުވަހު ބޭއްވި އަޑުއެހުމަކީ މީހެއްގެ ބަންދާ ގުޅޭ އަޑުއެހުމެއް ކަމަށެވެ.

ޕީޖީ އޮފީހުން ބުނީ، ޝަރީއަތުގެ މަރުހަލާގެ ކުރިން ބާއްވާ އަޑުއެހުންތައް ވީޑިއޯ ކޮންފަރެންސް ކޯލު މެދުވެރިކޮށް ކުރިއަށްގެންދަން ކުރިއަށް އޮތްތާނގައި މަސައްކަތް ކުރަމުންދާ ކަމަށެވެ. އަދި އެއީ ވަގުތާއި އަދި ހަރަދުގެ ގޮތުންވެސް ހުރިހާ ފަރާތްތަކަށްވެސް އެންމެ ރަނގަޅު ގޮތް ކަމަށެވެ.

ޝަރީއަތުގެ މަރުހަލާގެ ކުރިން ބާއްވާ އަޑުއެހުންތަކަށް ދައުލަތުން ސީދާ ހާޒިރުވުމުގެ ބަދަލުގައި ވީޑިއޯ ކޮންފަރެންސް ކޯލު މެދުވެރިކޮށް ބާއްވަން ޖިނާއީ އިޖުރާއަތުގެ ގާނޫނު ތަންދެއެވެ.

ޕީޖީގެ މަގާމަށް ހުސައިން ޝަމީމު އައްޔަން ކުރެއްވިފަހުން، ޕީޖީ އޮފީހުގެ މަސައްކަތްތައް ހަރުދަނާކޮށް، އަދި ޖިނާއީ އަދުލުގެ ނިޒާމުގައި ހުރި ގޮންޖެހުންތައް ނައްތާލުމަށް ގިނަ މަސައްކަތްތައް ދަނީ ކުރައްވަމުން ނެވެ. އެގޮތުން، ބޮޑެތި ކުށްތައް ނުވަތަ މުޖުތަމައުއަށް ނުރައްކާތެރި ކުށުގެ ތުހުމަތު ކުރެވޭ މީހުން (ކޮންމެހެން ބަންދުގައި ތިބެންޖެހޭ މީހުން) ޝަރީއަތް ނިމެންދެން ބަންދުގައި ބޭއްތިއްބުން ފިޔަވާ، ކުށުގެ ތުހުމަތު ކުރެވޭ މީހުން ޝަރީއަތް ނިމެންދެން ބަންދުގައި "ވާނުވާ"ގައި ބެހެއްޓުން ފަދަ ކަންކަން ހުއްޓުމަށް ގެނެސްފައި ވެއެވެ.