ކޮވިޑް-19: 502 ސާމްޕަލް ނެގެޓިވް، މިހާތަނަށް 15 ސާމްޕަލްގެ ނަތީޖާ ނުލިބޭ
19 މާރިޗު 2020 | ބުރާސްފަތި 10:21ޕޮޒިޓިވް ވި 13 ފަރާތުގެ ހާލު ރަނގަޅު
ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު
މިހާތަނަށް ކޮވިޑް-19 އަށް ޓެސްޓު ކުރިއިރު 502 ކޭސް ނެގެޓިވް ވެފައިވާ ކަމަށާއި 15 ކޭސްގެ ނަތީޖާ އަދި ލިބިފައިނުވާ ކަމަށް ސަރުކާރުން ހާމަކޮށްފިއެވެ.
ބުރާސްފަތި ދުވަހު ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ މިހާތަނަށް 517 ސާމްޕަލް ނެގިފައިވާ ކަމަށާއި އެތަނުން 502 ކޭސް ނެގެޓިވް ކަމަށެވެ. 15 ކޭސްގެ ނަތީޖާ ލިބިފައިވާއިރު މިހާތަނަށް 13 ކޭސް ޕޮޒިޓިވް ވެފައިވާކަަމަށް އެންމެ ފަހުގެ މައުލޫމާތު ހިއްސާކުރަމުން މަބްރޫކް ވަނީ ވިދާޅުވެފައެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ރަފީގް ވިދާޅުވީ ރާއްޖެއިން ޕޮޒިޓިވްވި 13 ފަރާތުގެ ހާލު ރަނގަޅުކަމަށާއި އެހެންނަމަވެސް ހާލު އެއްކޮށް ރަނގަޅުކަމަށް ބެލެވޭނީ ވަކި މިންގަނޑުތަކަށް ބެލުމަށްފަހު އެއްވެސް އަލާމާތެއް ނުފެންނަ ކަމުގައިވާނަމައެވެ.
ނުސްވެރިންގެ ބައްދަލުވުމުގައި އިތުރަށް ވާހަކަދައްކަވަމުން، މަބްރޫކް ވިދާޅުވީ، މޮނިޓަރިންގެ ހާލަތުގައި މިވަގުތު ޝެވަލް ބްލޭންކް އާއި ޕެރަޑައިސް އައިލެންޑް ރިސޯޓް އެބައޮތް ކަމަށެވެ. އެގޮތުން ޝެވަލް ބްލޭންކް މޮނިޓަރ ކުރަމުންދަނީ ބިދޭސީއެއްގެ ގައިން ބަލީގެ އަލާމާތެއް ފެނުމުން ކަމަށާޢި ،ޕެރަޑައިސް އައިލެންޑް ރިސޯޓް މޮނިޓަރ ކުރަމުންދަނީ 8 ދިވެހިންނާއި 2 ބިދޭސީން ބަލީގެ އަލާމާތްތައް ހުރިކަމަށް ބެލެވޭތީކަމަށް މަބްރޫކް ވިދާޅުވިއެވެ.
މިހާތަނަށް ރާއްޖެއަށް އެހީ ލިބިފައިވާ ގައުމުތައް ފާހަގަކުރައްވާ މަބްރޫކް ވިދާޅުވީ އިންޑިއާއިން 5 ޓަނުގެ 53 ވައްތަރެއްގެ ބޭސް މާރޗް މަހުގެ 14 ވަނަ ދުވަހު ހަދިޔާކޮށްފައިވާ ކަމަށާއި މި މަހުގެ 13 ވަނަ ދުވަހު މެޑިކަލް ޓީމަކުން ވެސް ރާއްޖެ އައިސްފައިވާ ކަމަށެވެ. ޖަޕާނުން އެހީވެފައިވާކަން ފާހަގަކުރައްވާ މަބްރޫކް ވިދާޅުވީ 9000 ސަރޖިކަލް މާސްކް ފޯރުކޮށްދީފައިވާ ކަމަށެވެ. އަދި އެމެރިކާއިންވެސް ފްރޮންޓް ލައިންގައި މަސައްކަތް ކުރައްވާ ފަރާތްތައް ބޭނުންކުރުމަށް ބޫޓާއި އަންގި ހަދިޔާކޮށްފައިވާކަމަށް މަބްރޫކް ވަނީ ވިދާޅުވެފައެވެ.
ސަރުކާރުން ދަނީ ރާއްޖެއިން ކޮވިޑް-19 ފެނުމާއެކު އެ ވައިރަސް ފެތުރިޔަނުދިނުމަށްޓަކައި ގިނަ މަސައްކަތަކެއް ކުރަމުންނެވެ. އެގޮތުން ސަރުކާރުން އަޅާ ހަރުދަނާ ފިޔަވަޅުތަކުގެ ސަބަބުން މިހާތަނަށް ރާއްޖޭގެ އެއްވެސް ރައްޔިތަކަށް ބަލި ޖެހިފައިނުވެއެވެ.
