ކޮވިޑް-19:ސެނަހިޔާ ފްލޫ ކްލިނިކުން ނެގުނު ހުރިހާ ސާމްޕަލެއްގެ ނަތީޖާ ނެގެޓިވްވެއްޖެ
ފުރަވެރި އައިލެންޑް ރިސޯޓުން ނެގި 2 ބިދޭސީންގެ ސާމްޕަލްގެ ނަތީޖާ ވެސް ނެގެޓިވް
ކޮވިޑް-19އަށް ޝައްކުރެވޭ މީހަކު ގެންދަނީ
ކޮވިޑް-19އަށް ޝައްކުރެވިގެން ސެނަހިޔާގައި ގާއިމްކޮށްފައިވާ ފްލޫ ކްލިނިކުން ޓެސްޓުކުރި ހުރިހާ މީހުންގެ ނަތީޖާ ނެގެޓިވް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ ސެނަހިޔާގައި ގާއިމްކޮށްފައިވާ ފްލޫ ކްލިނިކުން މިމަހުގެ 16 ވަނަ ދުވަހުން ފެށިގެން 18 ވަނަ ދުވަހުގެ ހެނދުނު 11:00 އާއި ހަމައަށް، ކޮވިޑް-19 އަށް ޝައްކު ކުރެވޭ އަލާމާތްތައް ހުރެގެން ނެގުނު ހުރިހާ ސާމްޕަލެއްގެ ނަތީޖާ ނެގެޓިވްފައިވާ ކަމަށެވެ.
މީގެއިތުރުން އެޗްޕީއޭއިން ބުނީ ޝައްކުކުރެވޭ އަލާމާތްތައް ހުރެގެން ފުރަވެރި އައިލެންޑް ރިސޯޓުން ނެގި 2 ބިދޭސީންގެ ސާމްޕަލްގެ ނަތީޖާވެސް ނެގެޓިވް ވެފައިވާ ކަމަށެވެ. އަދި މިހާރު އެ ރިސޯޓު މޮނިޓަރިންގްގެ ހާލަތުން ނެގިފައިވާ ކަމަށެވެ.
ރާއްޖެއިން މިހާތަނަށް 13 މީހަކު ވަނީ ޕޮޒިޓިވްވެފައެވެ. އެއީ ކުރެއްދޫ އައިލެންޑް ރިސޯޓްގެ 05 މީހުން ސޭންޑީސް ބަތަލާ ރިސޯޓުން 02 މީހުން، ކުރަމަތި އައިލެންޑް ރިސޯޓުން 02 މީހުން، އަނަންތަރާ ދިގު ރިސޯޓުން 02 މީހުން އަދި އައިލެންޑް ސަފާރީމް 02 މީހުން ހިމެނެއެވެ.
