ހެކިވެރިންނާއި ބަޔާންދޭން ތިބި މީހުން ކަރަންޓީންގައި ތިބުމުން ކުރެއްދޫ ކޭސްގެ ތަހުޤީޤަށް ހުރަހެއް!

ކުރެއްދޫ ރިސޯޓުން ކޮވިޑް-19 އަށް ޝައްކު ކުރެވުނު މީހާއާއި ގުޅިގެން ހިންގާ ޖިނާއީ ތަހުޤީޤުގައި، ހެކިވެރިންނާއި ބަޔާންދޭން ތިބި މީހުން ކަރަންޓީންގައި ތިބުމުން ގޮންޖެހުންތަކެއް ކުރިމަތިވެއްޖެއެވެ.

ޅ ކުރެއްދޫ ރިސޯޓުގައި ކޮވިޑް-19 އަށް ޝައްކު ކުރެވުނު މީހާގެ މަޢުލޫމާތު ކަމާބެހޭ އިދާރާތަކަށް ހާމަ ނުކުރި ކަމަށް ތުހުމަތު ކުރެވޭ މައްސަލައާއި އެ މައްސަލައިގެ ވަށައިގެންވާ ކަންކަމުގައި ޖިނާޢީ އެއްވެސް ކުށެއް ހިމެނޭކަން ނުވަތަ ނޫންކަން ބެލުމަށް ޖިނާއީ ތަހުޤީޤެއް ހިންގުމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އަމުރު ކުރައްވާފައިވަނީ މިހިނގާ މާރޗު މަހުގެ 9 ވަނަ ދުވަހުއެވެ.

އެކަމާ ގުޅޭގޮތުން ބުދަ ދުވަހު ޕީޖީ ކުރެއްވި ޓްވީޓެއްގައި ވިދާޅުވީ، މި ކޭސްއާ ގުޅިގެން ބަޔާންދޭން ތިބި މީހުންނާއި، ހެކިވެރިން ތިބީ ވައިރަސްއަށް ޕޮޒިޓިވްވެ ނޫނީ ކަރަންޓީންގެ ޙާލަތުގައި ކަމަށެވެ. ޖިނާޢީ ތަހުޤީޤުތަކުގައި ބަޔާން ނަގަން ލާޒިމުކުރާއިރު، ބަޔާން ނެގުމަށް އެ ފަރާތްތައް ކައިރިއަށް ފުލުސް އޮފިސަރުން ފޮނުވަންޖެހޭނެކަން ޕީޖީ ފާހަގަކުރެއްވިއެވެ.

ޕީޖީ ވިދާޅުވީ، މި ދަނޑިވަޅުގައި ތަހުޤީޤަށް ބޭނުންވާ ބަޔާން ނެގުމަށްވެސް ފުލުހުންގެ ރައްކާތެރިކަން ޤުރުބާންކޮށް ނުލެވޭނެ ކަމަށެވެ.

މި މައްސަލައާ ގުޅޭ ޖިނާޢީ ތަޙުޤީޤެއް ހިންގުމަށް ޕީޖީ ޢަމުރު ނެރުއްވާފައިވާއިރު، ޕީޖީގެ މަސްއޫލިއްޔަތުތަކާއި ބާރުތަކުގެ ތެރޭގައި ޖިނާޢީ ކުށެއް ކަމަށް ތުހުމަތު ކުރެވޭ ޢަމަލެއް އެއްވެސް ފަރާތަކުން ހިންގައިފިނަމަ ނުވަތަ އެފަދަ މަޢުލޫމާތެއް ލިބިއްޖެނަމަ އެކަން ތަހުޤީޤު ކުރުމަށް ޢަމުރު ނެރުމުގެ އިޚުތިޔާރު ޤާނޫނޫ އަސާސީން ވަނީ ލިއްބައިދީފައެވެ.