ފްރެންޗް އޯޕަން ސެޕްޓެމްބަރު މަހަށް ފަސްކުރަން ނިންމައިފި

މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ފްރެންޗް އޯޕަން ޓެނިސް މުބާރާތް ސެޕްޓެމްބަރު މަހަށް ފަސްކުރަން ނިންމައިފި އެވެ.

ފްރާންސްގެ ވެރިރަށް ޕެރިހުގައި ބޭއްވުމަށް ހަމަޖެހިފައިވާ މި މުބާރާތް ކުރިން ތާވަލުކޮށްފައި އޮތީ މެއި މަހުގެ 24 އިން ޖޫން މަހުގެ 7 ވަނަ ދުވަހުގެ ނިޔަލަށެވެ. އެކަމަކު މިހާރު މި މުބާރާތް ވަނީ ސެޕްޓެމްބަރު މަހުގެ 20 އިން އޮކްޓޯބަރު މަހުގެ 4 އަށް ފަސްކޮށްފައެވެ.

ކޮންމެ އަހަރަކުވެސް ބާއްވަމުން އަންނަ ފްރެންޗް އޯޕަން ޓެނިސް މުބާރާތަކީ އަހަރުގެ ދެވަނަ ގްރޭންޑް ސްލޭމް މުބާރާތެވެ. ކޮންމެ އަހަރަކުވެސް އެންމެ ފުރަތަމަ ބާއްވާ ގްރޭންޑް ސްލޭމް މުބާރާތަކީ އޮސްޓްރޭލިއަން އޯޕަން ޓެނިސް މުބާރާތެވެ. މިއަހަރުގެ އޮސްޓްރޭލިއަން އޯޕަން ވަނީ ކާމިޔާބުކަމާއެކު ނިންމާލާފައެވެ.

ކޮރޯނާވައިރަސް (ކޮވިޑް-19) ގެ ސަބަބުން ފްރެންޗް އޯޕަން ފަސްކުރިއިރު، އޮގަސްޓް މަހުގެ 31 ވަނަ ދިވަހު އެމެރިކާގައި ބޭއްވުމަށް ހަމަޖެހިފައިވާ ޔޫއެސް އޯޕަން ޓެނިސް މުބާރާތް އަދި ފަސްކޮށްފައެއް ނުވެއެވެ. އެކަމަކު ފްރެންޗް އޯޕަން ފަސްކުރުމާއެކު، ޔޫއެސް އޯޕަންވެސް ފަސްކުރާނެ ކަމަށް ބެލެވެއެވެ.

މުޅި ދުނިޔޭގައި ހަލުވިކަމާއެކު މިހާރު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ގިނަ ކުޅިވަރު ހަރަކާތްތަކެއް އަންނަނީ ފަސްކުރަމުންނެވެ. ކޮރޯނާވައިރަސް (ކޮވިޑް-19) ޖެހުނު މީހުންގެ އަދަދު 202،259 އަށް އަރާފައިވާއިރު، މި ބަލީގައި 8،010 މީހުން ވަނީ މަރުވެފައެވެ.