ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގައި މަސައްކަތްކުރާ ދެ މުވައްޒަފަކު، ކޮވިޑް-19 އަށް ޕޮޒިޓިވްވެފައިވާ ކަމަށް އެ ޖަމިއްޔާއިން ހާމަކޮށްފިއެވެ.

ކޮވިޑް-19 އާ ދެކޮޅަށް ދުނިޔޭގެ އެކި ގައުމުތަކުން ކުރަމުން އަންނަ ހަނގުރާމައިގައި އިސް ދައުރެއް އަދާކުރާ، ޑަބްލިޔުއެޗްއޯއިން ވަނީ މިކަން ކަށަވަރުކޮށްދީފައެވެ. ނޫސްވެރިންނަށް މައުލޫމާތު ދެއްވަމުން އެ ޖަމިއްޔާގެ ތަރުޖަމާނު ކްރިސްޓިއަން ލިންޑްމަޔަރ ވިދާޅުވީ، އޮފީސް ދޫކޮށް ގެއަށް ދިޔަ ފަހުން ބަލީގެ އަލާމާތްތައް ފެނި، ޓެސްޓުކުރުމުން ވައިރަސްއަށް ޕޮޒިޓިވްވެފައިވާ ކަމަށެވެ.

މިއީ މި ވައިރަސް ނައްތާލުމަށް ޑަބްލިޔުއެޗްއޯއިން ކުރާ މަސައްކަތުގައި ސީދާ ބައިވެރިވެފައިވާ ދެ ފަރާތްކަން މިހާތަނަށް އަދި ކަށަވަރުވެފައެއް ނުވެއެވެ. ނަމަވެސް، ވައިރަސް އެހެން ބަޔަކަށް ޓްރާންސްމިޓް ވެދާނެ ކަމުގެ ބިރު އޮތުމާއެކު، އަޅަންޖެހޭ ހުރިހާ ފިޔަވަޅެއް އަޅަމުން އަންނަ ކަމަށް ލިންޑްމަޔަރ ވަނީ ވިދާޅުވެފައެވެ.

އޭގެ އިތުރުން، އެތަނުގައި މަސައްކަތްކުރާ ގިނަ މުވައްޒަފުންނާއި ކޮންސަލްޓަންޓުން، ގެއިން މަސައްކަތް ކުރުމަށް އިރުޝާދުދެވިފައިވާ ކަމަށް ލިންޑްމަޔަރ ވިދާޅުވިއެވެ. ޑަބްލިޔުއެޗްއޯގެ ހެޑްކުއާޓަރުގައި 2400 އެއްހާ ސްޓާފުން މަސަައްކަތްކުރެއެވެ.

ޑަބްލިޔުއެޗްއޯގެ މައިމަރުކަޒު ހުންނަނީ ސްވިޒަލެންޑުގެ ޖެނީވާގައެވެ. ސްވިޒަލެންޑުގައި ވެސް ކޮވިޑް-19 ފެތުރިފައިވާއިރު، މިހާތަނަށް އެ ގައުމުން 2742 ކޭސްއެއް ރިޕޯޓްކޮށްފައިވެއެވެ. އަދި މީގެ ތެރެއިން 27 މީހަކު ވަނީ މަރުވެފައެވެ.

ހޯމަ ދުވަހުގެ ވަގުތެއްގައި އެ ގައުމުން ވެސް ވަނީ ކުއްލި ނުރައްކަލުގެ ހާލަތު އިއުލާންކޮށްފައެވެ. ކުއްލި ހާލަތު އިއުލާންކުރައްވާ ދެއްކެވި ވާހަކަފުޅުގައި އެ ގައުމުގެ ރައީސާ ސިމޮނޭޓާ ސޮމަރޫގާ ވިދާޅުވީ، ވައިރަހާ ހަނގުރާމަކުރަން މިހާރުން މިހާރަށް ވަރުގަދަ ރައްދެއް ބޭނުންވާ ކަމަށެވެ.