ކޮވިޑް-19 އާ ގުޅިގެން އެމެރިކާގައި ޖަނާޒާތައް ލައިވް ސްޓްރީމް ކުރަނީ
ވީހާވެސް މަދު މީހުން ޖަނާޒާތަކަށް ދިއުމަށް އިލްތިމާސްކޮށްފައިވޭ
އާއިލާގެ އެންމެ ގާތް މީހުން ފިޔަވައި އިތުރު މީހުން ޖަނާޒާ އޮންނަ ތަނަށް ދިއުން ބުއްދިވެރިއެއް ނޫންކަމަށް ސީޑީސީން ބުނޭ
ކޮވިޑް-19 އާ ގުޅިގެން އެމެރިކާގައި ޖަނާޒާތައް ލައިވް-ސްޓްރީމް ކުރުމަށް ނިންމައިފިއެވެ.
ސެންޓަރ ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އާ ޙަވާލާދީ ބީބީސީގައި ރިޕޯޓްކޮށްފައިވާ ގޮތުން ސީޑީސީން ވަނީ ވީހާވެސް މަދު މީހުން ޖަނާޒާތަކަށް ދިއުމަށް އިލްތިމާސްކޮށް, ޖަނާޒާތައް ލައިވްސްޓްރީމް ކުރުމަށް އަންގާފައެވެ. އެގޮތުން ޖަނާޒާތައް އިންތިޒާމްކުރާ ފަރާތްތަކަށްވެސް އެގޮތަށް އަމަލު ކުރުމަށް ސީޑީސީން ވަނީ އިރުޝާދު ދީފައެވެ. އަދި އެގޮތަށް އަމަލުކުރަން ނިންމާފައިވަނީ ސޯޝަލް ޑިސްޓެންސިންގއަށް މީހުން އަހުލުވެރިކޮށް، ގިނަ މީހުން އެއްތަނަކަށް އެއްވެ އުޅުން މަނާ ކުރުމުގެ ޤަސްތުގައިކަމަށް ސީޑީސީން ބުނެއެވެ.
އެގޮތުން ސީޑީސީގެ އެޕިޑޮމޮލޮޖިސްޓް ޑރ ޑޭވިޑް ބަރނާންޑަސްއާ ޙަވާލާދީ ބީބީސީގައި ރިޕޯޓްކޮށްފައިވާ ގޮތުން އާއިލާގެ އެންމެ ގާތް މީހުން ފިޔަވައި އިތުރު މީހުން ޖަނާޒާ އޮންނަ ތަނަށް ދިއުން މި ދަނޑިވަޅުގައި ބުއްދިވެރިއެއް ނޫނެވެ.
ޚާއްސަކޮށް، އުމުރުން ދުވަސްވީ މީހެއްނަމަ ގިނަ މީހުން އެއްވެ އުޅޭ ތަންތަނަށް ނުދިއުމަށް އެފަރާތްތަކުން ވަނީ އިލްތިމާސްކޮށްފައެވެ.
އެމެރިކާގައި ކޮވިޑް-19 ފެތުރެމުންދާއިރު، ކޮވިޑް-19 އާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ކުއްލި ނުރައްކަލުގެ ހާލަތު އިއުލާންކޮށްފައިވަނީ ހުކުރު ދުވަހު އެވެ. އެގޮތުން އެމެރިކާއިން 5000 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވާއިރު، 97 މީހަކު ވަނީ ވައިރަސްގައި މަރުވެފައެވެ.
