ކޮވިޑް-19: ގޭގައި މަޑުކުރަން އެންގި މީހަކު ގޭގައި މަޑުނުކުރި މައްސަލައެއް ބަލަންފަށައިފި
17 މާރިޗު 2020 | އަންގާރަ 15:41މިމައްސަލަ ހުށަހެޅުމާއިއެކު ވިލިމާލެއަށް ގޮސް އެމީހާ ފުލުހުންގެ ބެލުމުގެ ދަށަށް ގެނެސް އެޗްޕީއޭ އާއި ހަވާލުކޮށްފައިވޭ
ވިޑް-19 އަށް ރައްކާތެރިވުމަށް ކުރިޔަށް ގެންދިޔަ ޑްރިލްއެއްގެ ތެރެއިން
ކޮވިޑް-19 އަށް ޝައްކުކުރެވޭ ދިވެހި ފިރިހެނެއް ގޭގައި މަޑުކުރުމަށް އަންގާފައިވަނިކޮށް އެކަމަށް އެއްބާރުލުން ނުދީ އަންގާފައިވާގޮތަށް އަމަލުކޮށްފައިނުވާ މައްސަލައެއް ފުލުހުން ބަލަން ފަށައިފިއެވެ.
ފުލުހުން ބަލަމުން ދަނީ ކޮވިޑް 19 އަށް ޝައްކު ކުރެވޭ ދިވެހި ފިރިހެނެއްގެ ބަލަންޖެހޭ ކަންކަން ބަލައި ޓެސްޓުކުރުމަށްތަކައި ފަރުކޮޅުފުށި އައިސޮލޭޝަން ފެސިލިޓީއަށް ގެންދިއުމަށްޓަކައި ގޭގައި މަޑުކުރުމަށްޓަކައި އަންގާފައިވަނިކޮށް އެކަމަށް އެއްބާރުލުންނުދީ އަންގާފައިވާ ގޮތަށް އަމަލުކޮށްފައި ނުވާ މައްސަލައެވެ.
ފުލުހުން ބުނީ މި މައްސަލަ ހުށަހެޅުމާއިއެކު ވިލިމާލެއަށް ގޮސް އެމީހާ ފުލުހުންގެ ބެލުމުގެ ދަށަށް ގެނެސް، ހެލްތު ޕްރޮޓެކްޝަން އޭޖެންސީއަށް އަންގާރަ ދުވަހުގެ މެންދުރުގެ ވަގުތެއްގައި ހަވާލުކޮށްފައިވާކަމަށެވެ.
ފުލުހުން ބުނީ މައްސަލަ ޕީނަލް ކޯޑުގެ 121 މާއްދާގެ ދަށުން ތަހުގީގުކުރަމުންދާކަމަށެވެ. އަދި ރާއްޖޭގައި އާއްމު ސިއްހަތުގެ ކުއްލި ނުރައްކާ އިއުލާނުކުރުމާއި ގުޅިގެން ޑައިރެކްޓަރ ޖެނެރަލް އޮފް ޕަބްލިކް ހެލްތުހެ އެންގުމާއި ޚިލާފަށް އަމަލުކުރާ މީހުންގެ މައްސަލަ އެ ސަރވިސް އިން ސީރިއަސް މައްސަލައެއްގެ ގޮތުގައި ބަލައި އަޅަންޖެހޭ ފިޔަވަޅުތައް އަޅަމުންދާނެ ކަމަށްވެސް ފުލުހުން ބުންޏެވެ.
ބައްޔަށް ޝައްކު ކުރެވޭ މީހުން އެކަހެރިކޮށް، ކަރަންޓީނު ކުރުމަކީ ރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާއްމު ރައްޔިތުންގެ ސަލާމަތާއި ރައްކާތެރިކަމަށްޓަކައި އާއްމު ސިއްހަތު ރައްކާތެރިކުރުމުގެ ގާނޫނުގެ 33 އަދި 24 ވަނަ މާއްދާގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ބާރުގެ ތެރެއިން ކުރެވޭ މަސައްކަތެކެވެ.
ދިވެހިރާއްޖޭގެ ޤާނޫނުލްޢުޤޫބާތުގެ 120 ވަނަ މާއްދާގެ (ހ) ގައި ބުނަނީ، މީހަކު ފަރުވާލެއްނެތި ކުރާ ޢަމަލެއްގެ ސަބަބުން، (އެހެން) މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިނަަމަ، އެ ޢަމަލު ހިންގި މީހާ އެކުރަނީ ކުށެކެވެ. އެއީ ޖުނަހްގެ އެއް ވަނަ ދަރަޖައިގެ ކުށެކެވެ. މި ކުށުގެ އަދަބަކީ ހަތަރު މަހާއި 24 ދުވަހުގެ ޖަލަށްލުމެވެ.
ޤާނޫނުލްޢުޤޫބާތުގެ 120 ވަނަ މާއްދާގެ (ރ) ގެ 1 ވަނަ ނަންބަރުގައި، ދަރަޖަ ކުރުމުގައި ބުނެފައިވަނީ، އެ ކުށުގެ ޢަމަލު ހިންގީ އިންސާނާގެ ފުރާނައަށް އެއްވެސް ފަރުވާލެއް ނެތް ގޮތުގައިކަމުގައި ރަމްޒުކޮށްދޭ ޙާލަތެއް ކަމުގައިވާނަމަ، އެ ކުށަކީ، ޖިނާޔަތުގެ 4 ވަނަ ދަރަޖައިގެ ކުށެކެވެ.
މިކުށުގެ އެންމެބޮޑު އަދަބަކީ ހަތަރު އަހަރަށް ޖަލަށްލުމެވެ. އަބަދު ކަނޑައެޅުމުގެ އަސާސީ މިންގަނޑަކީ އެއް އަހަރާއި 7 މަހާއި 6 ދުވަހަށް ޖަލަށްލުމެވެ.
