ކޮޕަ އެމެރިކާވެސް އަންނަ އަހަރަށް ފަސްކޮށްފި

މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ދެކުނު އެމެރިކާގެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕަ އެމެރިކާ އަންނަ އަހަރަށް ފަސްކުރުމަށް ނިންމައިފި އެވެ.

ރިޕޯޓުތައް ބުނާ ގޮތުން ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލްއިން ވަނީ އަންގާރަ ދުވަހު މުބާރާތް ފަސްކުރުމަށް ނިންމާފައެވެ. ކުރިން މި މުބާރާތް ބޭއްވުމަށް ތާވަލުކޮށްފައިވަނީ ޖޫން މަހުގެ 12 ވަނަ ދުވަހު ފެށިގެން ޖުލައި މަހުގެ 12 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައެވެ.

އެކަމަކު މި މުބާރާތް ފަސްކުރަން ކޮންމެބޯލްއިން ނިންމިއިރު، މި މުބާރާތް އަންނަ އަހަރުގެ ހޫނު މޫސުމުގައި ބޭއްވުމަށް މިހާރު ވަނީ ތާވަލުކޮށްފައެވެ.

ކޮޕަ އެމެރިކާ އަންނަ އަހަރަށް ފަސްކުރިއިރު، ޔުއެފާއިން ވަނީ ޔޫރޯ ފުޓްބޯޅަ މުބާރާތްވެސް އަންނަ އަހަރުގެ ހޫނު މޫސުމަށް ފަސްކޮށްފައެވެ.

ޔޫރަޕްގެ ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ.

ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިރު، މި ވައިރަސް ޖެހުނު މީހުންގެ އަދަދު 188,430 އަށް މިހާރު ވަނީ އަރާފައެވެ. އަދި މި ބަލީގައި 7،499 މީހުން ވަނީ މަރުވެފައެވެ.