އިނގިރޭސިވިލާތުގައި ކުޅިވަރު ހުރިހާ ހަރަކާތްތައް ހުއްޓާލައިފި

ޔޫރަޕުގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ގިނަ މީހުން އެއްވެ އުޅުން މަނާ ކުރުމާއި ގުޅިގެން އެގައުމުގައި ހިންގާ ހުރިހާ ކުޅިވަރު ހަރަކާތްތަކެއް ހުއްޓާލުމަށް ނިންމައިފިއެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވީ މިހާރު އެގައުމުގައި ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އެގައުމުގައި މީހުން އެއްވެ އުޅެ ހިންގާ ހުރިހާ ހަރަކާތެއް ހުއްޓައިލާން ނިންމައިފައިވާ ކަމަށާއި މިއީ އާންމުންގެ ރައްކާތެރިކަމަށް އެޅި ފިޔަވަޅެއް ކަމަށެވެ.

ބޮޑުވަޒީރު ބޮރިސްގެ އެ ނިންމުމާއި ގުޅިގެން އެގައުމުގެ ކުޅިވަރު އެސޯސިއޭޝަންތަކުން ވަނީ އެގައުމުގައި ބާއްވާ ހުރިހާ ކުޅިވަރު ހަރަކާތްތަކެއް ފަސްކުރުމަށް ނިންމައިފައެވެ.

މީގެ ކުރިންވެސް އެގައުމުގެ އެފްއޭއިން ވަނީ ފުޓްބޯޅައިގެ ހުރިހާ ހަރަކާތްތަކެއް ހުއްޓާލާފައެވެ. މި ނިންމުން އެފްއޭއިން ނިންމީ އާސެނަލްގެ ކޯޗު މިކޭލް އާޓެޓާ އާއި ޗެލްސީ ކުޅުންތެރިޔަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވުމާއި ގުޅިގެންނެވެ.

ޔޫރަޕުގެ ބޮޑު ފަސް ލީގު މެދު ކެނޑިފައިވާއިރު ބެލެވޭ ގޮތުގައި ލީގުތައް ފުރިހަމަ ކުރުމަށް ޔޫރޯ ފަސްކުރާނެއެވެ. އަދި ޖަޕާނުގެ ޓޯކިޔޯގައި ބާއްވަން ހަމަޖެހިފައިވާ އޮލިމްޕިކްސް ގޭމްސްވެސް ފަސްކުރާނެއެވެ.

އިނގިރޭސިވިލާތުގައި މިހާތަނަށް 1،543 މީހުން ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާއިރު އެގައުމުން 55 މީހުން ވަނީ މި ބަލީގައި މަރުވެފައެވެ.