ފުޓްބޯޅަ އާއި ކްރިކެޓް ހަރަކާތްތައް ހުއްޓާލަން ސައުތު އެފްރިކާއިން ނިންމައިފި

މިހާރު މުޅި ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ އާއި ކްރިކެޓް ހަރަކާތްތައް ހުއްޓާލަން ސައުތު އެފްރިކާއިން ނިންމައިފި އެވެ.

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ދާދި ފަހުން ވަނީ ކޮރޯނާވައިރަސް (ކޮވިޑް-19) އަކީ މުޅި ދުނިޔެ އަށް ފެތުރިފައިވާ ބަލިމަޑުކަމެއް ކަމަށް ނިންމާފައެވެ.

އާދީއްތަ ދުވަހުގެ ވަގުތެއްގައި ސައުތު އެފްރިކާގެ ރައީސް ސިރިލް ރަމަފޯސާ ވަނީ އެގައުމުގައި ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައެވެ. އެއާއެކު ސައުތު އެފްރިކާ ފުޓްބޯލް އެސޯސިއޭޝަނާއި ކްރިކެޓް ސައުތު އެފްރިކާއިން ވަނީ އެ ދެ އެސޯސިއޭޝަނުގެ ހަރަކާތްތައް ހުއްޓާލަން ނިންމާފައެވެ.

ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ އާއި ކްރިކެޓް ހަރަކާތްތައް ހުއްޓާލަން ސައުތު އެފްރިކާއިން ނިންމިއިރު، ދުނިޔޭގެ ގިނަ ކުޅިވަރުތައް ވަނީ ވަގުތީގޮތުން ހުއްޓާލާފައެވެ. އެގޮތުން ދުނިޔޭގެ ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް ކަމަށްވާ އިނގިރޭސި ޕްރިމިއާ ލީގާއި، އިޓާލިއަން ލީގާއި، ސްޕެނިޝް ލީގާއި، ފްރެންޗު ލީގުގެ އިތުރުން ޖަރުމަން ލީގުގެ މެޗުތައް ވަނީ މެދުކަނޑާލާފައެވެ. މީގެ އިތުރުން ޔޫރަޕުގެ އެންމެ ބޮޑު ދެ މުބާރާތް ކަމަށްވާ ޔުއެފާ ޗެމްޕިއަންސް ލީގާއި، ޔުއެފާ ޔޫރޮޕާ ލީގު ޔުއެފާއިން ވަނީ މިމަހުގެ 20 ވަނަ ދުވަހުގެ ނިޔަލަށް ފަސްކޮށްފައެވެ. އަދި ބްރެޒިލް ފުޓްބޯޅަ ކޮންފަޑެރޭޝަނުން ވަނީ ގައުމީ ހުރިހާ މުބާރާތްތަކެއް މެދުކަނޑާލަން އަންގާފައެވެ.

ސައުތު އެފްރިކާގައި މިހާތަނަށް ކޮރޯނާވައިރަސް (ކޮވިޑް-19) ޖެހިގެން 64 މީހަކު ވަނީ ރިޕޯޓުކޮށްފައެވެ.