ޔޫރޯ ފަސްކުރުމަށް އިޓާލިއަން އެފްއޭ އިން ގޮވާލާފި

ޔޫރަޕުގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން އިޓާލިއަން ލީގު މެދުކަނޑާލާން ޖެހުމާއި ގުޅިގެން ޖޫން-ޖުލައި މަހު ބާއްވަން ހަމަޖެހިފައިވާ ޔޫރޯ ފުޓްބޯޅަ މުބާރާތް ފަސްކޮށްދިނުމަށް އިޓާލިއަން ފުޓްބޯޅަ އެސޯސިއޭޝަނުން ގޮވައިލައިފި އެވެ.

ކޮރޯނާވައިރަސް (ކޮވިޑް-19) ގެ ސަބަބުން އިޓާލިއަން ލީގުގެ މެޗުތައް ފަސްކުރަން ޖެހިފައިވާއިރު އިޓަލީއަކީ ޔޫރަޕުން ކޮރޯނާވައިރަސް (ކޮވިޑް-19) އަށް އެންމެ ގިނަ މީހުން ޕޮޒިޓިވްވި ގައުމެވެ.

އިޓާލިއަން އެފްއޭގެ ރައީސް ގެބްރިއަލް ގްރަވީނާ ވިދާޅުވީ އަންގާރަ ދުވަހު ޔުއެފާއިން ބާއްވާ ކުއްލި ބައްދަލުވުމަށް މި މައްސަލަ ވައްދާނެ ކަމަށާއި، މިވަގުތު ޔޫރަޕުގެ ހުރިހާ ގައުމަކަށްވެސް ރަނގަޅުވާނީ ޔޫރޯ ފަސްކުރުން ކަމަށެވެ.

ގްރަވީނާ އިތުރަށް ވިދާޅުވީ އިޓާލިއަން ލީގުގެ މި ސީޒަން ނިންމާނެ ކަމަށާއި ކްލަބުތަކާއި ކުޅުންތެރިން އުފުލި ބުރައިގެ އަގު އެފްއޭ އިން ވަޒަން ކުރާނެ ކަމަށެވެ.

ޔޫރަޕުގެ ގިނަ ގައުމުތަކުން ކޮރޯނާވައިރަސް (ކޮވިޑް-19) ފެނިފައިވާއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ. އެގޮތުން އިޓާލިއަން ލީގުގެ އިތުރަށް އިނގިރޭސި ޕްރިމިއާ ލީގާއި، ސްޕެނިޝް ލީގާއި، ފްރެންޗު ލީގުގެ އިތުރުން ޖަރުމަން ލީގުގެ މެޗުތައް ވަނީ މެދުކަނޑާލާފައެވެ.

މީގެ އިތުރުން ޔޫރަޕުގެ އެންމެ ބޮޑު ދެ މުބާރާތް ކަމަށްވާ ޔުއެފާ ޗެމްޕިއަންސް ލީގާއި، ޔުއެފާ ޔޫރޮޕާ ލީގު ޔުއެފާއިން ވަނީ މިމަހުގެ 20 ވަނަ ދުވަހުގެ ނިޔަލަށް ފަސްކޮށްފައެވެ. އެކަމަކު މި ދެ މުބާރާތްވެސް އިތުރަށް ފަސްކުރަން ޖެހިދާނެ ކަމަށް ރިޕޯޓުތައް ބުނެއެވެ.

ކޮވިޑް-19 ގެ ސަބަބުން ދުނިޔޭގެ ފުޓުބޯޅަ ހުއްޓުމަކަށް އައިސްފައިވާއިރު، މި ވައިރަސް ޖެހުނު މީހުންގެ އަދަދު މިހާރު ވަނީ 169،907 އަށް އަރައިފައެވެ. އަދި މި ބަލީގައި 6،520 މީހުން ވަނީ މަރުވެފައެވެ.