ދީނަށް ފުރައްސާރަވާ ގޮތަށް ކަންކުރާ މީހުންގެ މައްޗަށް ދަޢުވާކުރާނެ ކަމަށާއި މީގެ ކުރިންވެސް ވަނީ ކޮށްފައިކަމަށާއި ދެންވެސް ކުރާނެ ކަމަށް ޕްރޮސެކިޔުޓަރ ޖެނެރަލް ހުސައިން ޝަމީމް ވިދާޅުވެއްޖެ އެވެ.

ދީނަ ފުރައްސާރަކުރާ މައްސަލާގައި މިދިޔަ އަހަރު ގދ. ތިނަދޫން ހައްޔަރުކުރި ރުސްތުމް މުޖުތަބާ ބަންދުން ދޫކޮށްލުމާ އެކު ވަނީ އަނެއްކާ ވެސް ދީނަށް ފުރައްސާރަކުރަން ފަށާފަ އެވެ. އެއާއެކު އަނެއްކާވެސް އަލުން އޭނާ ވަނީ ހައްޔަރުކޮށްފަ އެވެ.

ރުސްތުމް ދޫކޮށްލުމަށްފަހު އަނެއްކާވެސް ދީނަށް ފުރައްސާރަ ކުރަން ފެށުމުން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ. އެކަމާގުޅިގެން ޕީޖީ ކުރެއްވި ޓްވީޓެއްގައި ވިދާޅުވީ ރާއްޖޭގެ ދީނަކީ އިސްލާމް ދީންކަމަށެވެ. އަދި ކަމުގެ ޙަޤީޤަތް ނުބަލައި، އެކަމުގެ ވަށައިގެން ފިތުނަ އުފައްދަން މަސައްކަތް ކުރުމަކީ ވަރަށް ދެރަ ކަމެއް ކަމަށް ޕީޖީ ކުރެއްވި ޓްވީޓްގައި ވިދާޅުވެފައިވެ އެވެ.

ރުސްތުމް ހައްޔަރުކުރުމަށްފަހު ފުލުހުން ބުނެފައިވަނީ އިސްލާމް ދީނަށް ތައުހީނު ކުރުމުގެ ނިޔަތުގައި އިސްލާމް ދީނަށް ފާޑުކިޔައި ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރަމުންދާ ކަމަށް ތުހުމަތު ކުރެވޭ މައްސަލާގައި ކޯޓު އަމުރެއްގެ ދަށުން 37 އަހަރުގެ ދިވެހި ފިރިހެނަކު އިއްޔެ ހައްޔަރުކޮށްފައިވާ ކަމަށެވެ.

މިއީ މި މީހާ ހައްޔަރުކުރި ދެ ވަނަ ފަހަރު ކަމަށާއި 2019 ގައި ވެސް ހަމަ މިބާވަތުގެ މައްސަލައެއްގައި އޭނާ ހައްޔަރުކޮށް ދޫކޮށްލާފައިވާ ކަމަށް ފުލުހުން ބުނެފައިވެ އެވެ.

ދީނަށް ފުރައްސާރަ ކުރުމުގެ މައްސަލާގައި ރުސްތުމް ހައްޔަރުކުރުމުން ފުލުހުންނަށް ދިން ބަޔާނުގައި އޭނާ ވަނީ އެކަމަށް އިއުތިރާފުވެފަ އެވެ. އަދި އިސްލާމް ދީނާ ދެކޮޅަށް އެކި ވާހަކަތައް އެ ބަޔާނުގައި ދައްކާފައިވެ އެވެ.