އިންޑިއާއިން ރާއްޖެއަށް 3 މަހުގެ ބޭސް ހަދިޔާކޮށްފި

މިހާރު ފެތުރެމުންދާ ކޮވިޑް-19 ގެ ބަލިމަޑުކަމުން އަރައިގަތުމަށް ކުރަމުންދާ މަސައްކަތްތަކަށް އެހީވުމުގެ ގޮތުން އަވައްޓެރި އިންޑިއާއިން ރާއްޖެއަށް 3 މަހުގެ (5.5 ޓަނުގެ) ބޭހުގެ ސްޓޮކް ހަދިޔާކޮށްފިއެވެ.

ހޮނިހިރު ދުވަހު ފޮރިން މިނިސްޓްރީގައި އޮތް ރަސްމިއްޔާތެއްގައި ރާއްޖޭގެ ފަރާތުން މި ސޮޓްކާ ހަވާލުވެވަޑައިގެންނެވީ ފޮރިން މިނިސްޓަރ އަބްދުﷲ ޝާހިދެވެ. އިންޑިއާގެ ފަރާތުން ބޭހުގެ ސްޓޮކް ހަވާލުކޮށްދެއްވީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު ސަންޖޭ ސުދީރެވެ.

Advertisement

އިންޑިއާގެ މި އެހީއަށް ޝުކުރުއަދާ ކުރައްވައި ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ، އިންޑިއާއިން ފޯރުކޮށްދިން 3 މަހުގެ ބޭހުގެ ސަޕްލައިއަކީ ރާއްޖެއިން ކޮވިޑް-19 އާ ގުޅިގެން ކުރަމުންދާ މަސައްކަތްތަކުގައި ބޮޑު އެހީއަކަށް ވެގެންދާނެ ކަމަށެވެ. އަދި މި ރޯގާއިން ސަލާމަތްވުމަށް ރާއްޖެއިން އެހެން ޤައުމުތަކުގެ އެހީ ބޭނުންވާކަން މިނިސްޓަރު ވަނީ ފާހަގަ ކުރައްވާފައެވެ.

މި ރަސްމިއްޔާތުގައި ދެއްކެވި ވާހަކަފުޅުގައި ހައިކޮމިޝަނަރު ސަންޖޭ ސުދީރު ވަނީ މި ބޭސްތައް ބޭރުކުރުމާ ގުޅޭގޮތުން މިވަގުތު އިންޑިއާއިން ފިޔަވަޅުތަކެއް އަޅާފައިވާއިރު، މިއީ ރާއްޖޭގެ ރައްޔިތުންނަށް ޚާއްސަކޮށް އިންޑިއާއިން ވެދިން އެހީއެއް ކަމަށާއި، ރާއްޖެ އިސްތިސްނާ ކޮށްފައިވަނީ ޙާއްސަ ޙާލަތެއްގައިކަން ފާހަގަކުރައްވާފައެވެ.

ކޮވިޑް-19 އާ ގުޅިގެން ރާއްޖެއަށް ގެނައި ބޭހުގެ ޝިޕްމަންޓު މިހާރު އެމްއެންޑީއެފްގެ އެހީގައި އެސްޓިއޯ ބޭސް ގުދަނުގައި ގުދަން ކުރުމުގެ މަސައްކަތް ވަނީ ކޮށްފައެވެ.

އިންޑިއާއިން ރާއްޖެއަށް ބޭސް ފޯރުކޮށްދީފައިވާއިރު، ހުކުރު ދުވަހު އިންޑިއާ ސަރުކާރުން ރާއްޖެ އަށް އެހީވުމުގެ ގޮތުން ފޮނުވި މެޑިކަލް ޓީމުވެސް ވަނީ ރާއްޖެ އައިސްފައެވެ.