ދުނިޔޭގައި ހަލުވިކަމާއެކު ފެތުރުމެންދާ ކޮވިޑް-19 އަކީ އެމެރިކާއިން އުފައްދާފައިވާ ވައިރަސް އެއް ކަމަށް ޗައިނާއިން ތުހުމަތުކުރުމުން، އެމެރިކާގެ ސްޓޭޓް ޑިޕާޓްމަންޓަށް ޗައިނާއިން އެމެރިކާއަށް ކަނޑައަޅުއްވާފައި ހުންނަވާ ސަފީރު ހާޒިރުވުމަށް އަންގައިފިއެވެ.

ބުރާސްފަތި ދުވަހު ޗައިނާގެ ފޮރިން މިނިސްޓްރީގެ ތަރުޖަމާނު ޒައޯ ލިޖިއަން ވަނީ އެމެރިކާގެ ސެންޓަރ ފޯރ ޑިޒީޒަސް ކޮންޓްރޯލް، ރޮބަރޓް ރޭ ރެޑްފްލްޑް ދެއްކެވި ވާހަކައެއް ހިއްސާކޮށް، އެމެރިކާއިން އިންފްލުއެންޒާ ޖެހިގެން މަރުވި މީހުން، މަރުވުމަށް ފަހު ބަލި ދެނެގަތުމަށް ހެދި ޓެސްޓުން އެމީހުންނަށް ޖެހިފައިވަނީ ކޮރޯނާ ވައިރަސްކަމަށް ދެނެގަނެވިފައިވާކަމަށް ވިދާޅުވެފައެވެ.

އެކަމާއި ގުޅިގެން ސޯޝަލް މީޑިއާގައި ތަރުޖަމާނު ކުރެއްވި އިތުރު ޓްވީޓެއްގައި ވަނީ ވައިރަސްއަކީ އެމެރިކާއިން އުފެއްދި ވައިރަސްއެއް ކަމަށް ތުހުމަތުކުރައްވައި އެ ޤައުމުގެ ސިފައިން ވުހާން އަށް ގެނައި ނުރައްކާތެރި ވައިރަހެއްކަމަށް ވިދާޅުވެފައެވެ. އަދި ތަރުޖަމާނު ވަނީ މިކަމާއި ގުޅިގެން ގިނަ ސުވާލުތަކެއް އުފައްދަވާފައެވެ. މީގެއިތުރުން ކެނެޑާގެ ވެބްސައިޓެއްގައި ޝާއިއު ކޮށްފައިވާ ލިޔުމެއް ހިއްސާ ކުރައްވާ އެ ލިޔުން ވީހާވެސް ގިނަ ބަޔަކު ރީޓްވީޓް ކުރެއްވުމަށް ގޮވާލައްވާފައެވެ. އަދި ކުރިން ޤަބޫލު ނުކުރެވޭ އެތައް ކަމެއް މިހާރު ޤަބޫލު ކުރެވެން ފަށާފައިވާ ކަމަށް ޒައޯ ލިޖިއާން ވަނީ ވިދާޅުވެފައެވެ.

ބައިނަލްއަޤުވާމީ ޚަބަރު ފަތުރާ ވަޞީލަތްތަކުން ރިޕޯޓުކޮށްފައިވާ ގޮތުން ޗައިނާއިން ކޮށްފައިވާ މި ތުހުމަތުތަކާއި ގުޅިގެން އެމެރިކާގެ ސްޓޭޓް ޑިޕާޓްމަންޓުން ވަނީ ޗައިނާއިން އެމެރިކާއަށް ކަނޑައަޅުއްވާފައި ހުންނަވާ ސަފީރު ހާޒިރުވުމަށް އަންގާފައެވެ. މިކަމުގެ ސަބަބުން ދުނިޔޭގެ ގަދަ ބާރުތަކުގެ ތެރޭގައި ހިމެނޭ ދެ ޤައުމުގެ ގުޅުން އިތުރަށް ހީނަރުވަމުންދާކަމަށް ކަމާ ބެހޭ މާހިރުން އަންދާޒާކުރަމުންދާއިރު، ސްޓޭޓް ޑިޕާރޓްމެންޓުން ވަނީ އެގޮތަށް ޙަޤީޤަތެއް ނެތް ވާހަކަތައް ފެތުރުމަކީ ހުރި ވަރަށް ބޮޑު ނުރައްކަލެއްކަމަށް ބުނެފައެވެ، އަދި ސަފީރަށް ހާޒިރުވުމަށް އެންގެވީ، ޗައިނާގެ ސަރުކާރަށް އެމެރިކާއިން އެފަދަ ދެކޮޅު ނުޖެހޭ ވާހަކަ ދެއްކުމުގެ ފުރުޞަތު ނުދޭނެކަން އެންގުމުގެ ގޮތުންކަމަށެވެ.

ޗައިނާގެ އެމްބަސީން އެމެރިކާއިން މިހެން ބުނެފައިވާއިރުވެސް ރައްދެއް ދީފައިނުވެއެވެ. މީގެ ކުރިން އިރާން އިން ވެސް ވަނީ އެ ވައިރަސްއަކީ އެމެރިކާއިން އުފެއްދި ވައިރަސްއެއް ކަމަށް ތުހުމަތުކޮށްފައެވެ.