މިހާރު މިއޮތީ ގެސްޓްހައުސްތައް ބަންދުކުރަން ޖެހޭ ހާލަތުގައި: ގެސްޓްހައުސް އެސޯޝިއޭޝަން

ކޮވިޑް-19 އާ ގުޅިގެން ގެސްޓްހައުސްތަކުގެ ގިނަ ބުކިންތައް ކެންސަލްވާ ކަމަށާއި، މިހާރު މިއޮތީ ގެސްޓްހައުސްތައް ބަންދުރަން ޖެހޭ ހާލަތުގައި ކަމަށް ގެސްޓްހައުސް އެސޯޝިއޭޝަންގެ ނައިބް ރައީސް މުހައްމަދު އިމްތިޔާޒު ވިދާޅުވެއްޖެއެވެ.

ކޮވިޑް-19އާ ގުޅިގެން ރާއްޖެޓީވީގެ ގެނެސްދޭ ލައިވް ކަވަރޭޖްގައި އިމްތިޔާޒު ވިދާޅުވީ ގެސްޓްހައުސްއިން ވިޔަފާރި ބަންދުކުރަން ޖެހޭ ހާލަތު އައިސްފައިވާ ކަމަށާއި، އެ ވިޔަފާރީތައް ބަންދުނުކުރި ނަމަވެސް އޮޓަމެޓިކުން ބަންދުވާ ކަމަށެވެ. އޭނާ ވިދާޅުވީ ގިނަ އަދަދެއްގެ ބުކިންތައް ކެންސަލް ވެގެންދާއިރު، މިހާލަތުގައި މިއީ ގެސްޓްހައުސްތަކުގެ ވިޔަފާރި ހުއްޓާލަންޖެހޭ ކަމަށެވެ.

ގެސްޓްހައުސްތަކަށް ގިނައިން ޗުއްޓީ ހޭދަކުރުމަށް އަންނަ ފަތުރުވެރިންނަކީ ޗައިނާއިން އަދި އިޓަލީއިން އަންނަ ފަތުރުވެރިންކަން ވެސް އިމްތިޔާޒު ފާހަގަކުރެއްވިއެވެ.

އިމްތިޔާޒު ވިދާޅުވީ ރިސޯޓުތަކާ ހިލާފަށް ގެސްޓްހައުސް ތަކަކީ އެންމެ މީހެއް ނުވަތަ ލޯކަލް މީހަކު އިންވެސްޓް ކޮށްގެން ހިންގާ ތަންތަން ކަމަށާއި، މި ވިޔަފާރީގައި މާބޮޑު ބެކަޕެއް ނޯންނާނެ ކަމަށެވެ. އަދި ވިދާޅުވީ ގެސްޓްހައުސްތަކުގެ ވިޔަފާރިތައް ގާތްގަނޑަކަށް ހުއްޓިފައިވާއިރު، ދެން މި ވިޔަފާރިތަކަށް ވާނެގޮތް ބުނަން ދަތި ކަމަށެވެ.

ކުދި އަދި މެދު ވިޔަފާރިތައް ވެއްޓިގެންދަނީ އަނދަވަޅަކަށްކަން ފާހަގަކުރައްވައި އިމްތިޔާޒު ވިދާޅުވީ ކޮވިޑް-19 އިން އަރައިގެނެވުމުން މި ވިޔަފާރިތައް ކުރިއެރުމަށް ސަރުކާރުގެ އެހީތެރިކަން ބޭނުންވާނެ ކަމަށެވެ. އެގޮތުން ލުއި ލޯން ދޫކޮށްގެން ނަމަވެސް މާލީ އެހީތެރިކަން ބޭނުންވާކަން އިމްތިޔާޒު ފާހަގަކުރެއްވިއެވެ.