ކޮވިޑް-19: ސްކްރީންކުރުމަށް ފަހު 37 މީހަކު ރާއްޖެ އެތެެރެވިއަނުދީ ފޮނުވާލައިފި

ދިވެހިރާއްޖެއަށް އެތެރެވާ ބަނދަރުތަކުން ކޮވިޑް-19 އަށް ސްކްރީން ކުރި މީހުންގެ ތެރެއިން 37 މީހަކު ރާއްޖެ ވަނަނުދީ ފޮނުވާލެވިފައިވާ ކަމަށް ސަރުކާރުން ހާމަކޮށްފި އެވެ.

ބުރާސްފަތި ދުވަހުގެރޭ ދަރުބާރުގެގައި ސަރުކާރުން ބޭއްވި ޕްރެސް ކޮންފަރެންސްގައި ސަރުކާރުން އެކުލަވާލާފައިވާ ކޮރޯނާ ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ، ކޮވިޑް-19 އާ ގުޅިގެން މިހާތަނަށް 91 ސާމްޕަލް ނަގާފައިވާ ކަމަށާއި، އަދި 243 މީހެއްގެ ކޮންޓެކްޓް ޓްރޭސިން ހެދުމުގެ މަސައްކަތް ކޮށްފައިވާ ކަމަށެވެ. އަދި އޭގެ އިތުރުން ބަނދަރުތަކުން ދެ ލައްކައަށްވުރެ ގިނަ މީހުން ސްކްރީން ކުރެވިފައިވާ ކަމަށާއި، އޭގެތެރެއިން 37 މީހަކު ރާއްޖެއަށް އައުން މަނާކޮށްފައިވާ ކަމަށެވެ.

Advertisement

ކޮވިޑް-19 އަށް ޕޮޒިޓިވްވި މީހުން ފެނުނު ރިސޯޓުގެ ތެރެއިން މޮނިޓަރިން ގައި ތިބި ތިން ރިސޯޓު ކަމަށްވާ، ކުރެއްދޫ އައިލެންޑް ރިސޯޓް، ބަތަލާ އައިލެންޑް ރިސޯޓްގެ އިތުރުން ކުރަމަތި އައިލެންޑް ރިސޯޓުގައި ތިބި ފަތުރުވެރިން އަނބުރާ ގެންދިޔުމުގެ މަސައްކަތް ފޮރިން މިނިސްޓްރީން ދަނީ ސަރުކާރާއި ގުޅިގެން ކުރަމުންނެވެ. މަބްރޫކް ވިދާޅުވީ، ކުރެއްދޫ އައިލެންޑް ރިސޯޓުގެ 107 ފަތުރުވެރިންނާއި، ސޭންޑީޒް ބަތަލާ އައިލެންޑް ރިސޯޓުން 15 ފަތުރުވެރިންގެ އިތުރުން ކުރަމަތި އައިލެންޑް ރިސޯޓުން 127 މީހަކު މިހާތަނަށް ގައުމަށް ފޮނުވާލެވިފައިވާ ކަމަށެވެ.

އެމީހުން ފުރުވަން ހަމަޖެހިފައިވާ ގޮތުގެ ތަފްސީލު ހަމާކުރައްވަމުން މަބްރޫކް ވިދާޅުވީ، ފަތުރުވެރިން ފުރަން ހަމަޖެހިފައިވާ ފްލައިޓް ގަޑިއާ ކައިރިކޮށް ފުރުމުގެ ކުރިން އެ ރަށްރަށުގައި އެކްޒިޓް ސްކްރީން ހަދަމުން ގެންދާނެ ކަމަށެވެ. އަދި އެއާޕޯޓުން އެ ފަތުރުވެރިންގެ ކަންތައް ބެލެހެއްޓުމަށް ފުލުހުން ތިބޭނެކަން މަބްރޫކް ފާހަގަކުރެއްވިއެވެ.