ކޮވިޑް-19: އެންޒައިޓީ އާއި ކުރިމަތިލަމުންދާއިރު ނަފްސާނީ ދުޅަހެޔޮކަން ދެމެހެއްޓުން

ކޮރޯނާވައިރަސް ރާއްޖެއިން ފެނުމާއިވިދިގެން އަޅުގަޑުމެންގެ ހިތްތައް ހާސްކަމެއްގެ ތެރެއަށް ވަނީ ގޮސްފައެވެ. މިވަގުތުގައި ނަފްސާނީގޮތުން ދުޅަހެޔޮކޮށް ހުރުމަށްޓަކައި ސަމާލުކަން ދޭންޖެހޭ ބައެއްކަންތައްތައްވެއެވެ.

މިގޮަތުން މިބަލި ފެތުރުން ހުއްޓުވާ، ހޭލުންތެރިކުރުވާ، ފަރުވާދީ، މިހާލަތާއި ކުރިމަތިލާން ޤައުމުގައި ތިބި ކަމާބެހޭ މުއައްސަސާތައްވަނީ ތައްޔާރުވެފައިކަން ޔަޤީންކުރުން މުހިންމެވެ. ވުމާއިއެކު ރަސްމީކޮށް މި ފަރާތްތަކުން ފޯރުކޮށްދޭ މަޢުލޫމާތުތައް ބަލައި ގަންނާވާށެވެ. ދެއްވާ ލަފައާއި އިރުޝާދުތަކާ އެއްގޮތަށް އަމަލު ކުރައްވަމުން ގެންދަވާށެވެ. މިހެން ކަންތައްތައް ކުރައްވަމުންގެންދަވާއިރު ތިމާގެ ނަފްސާނީ ދުޅަހެޔޮކަން ޤާއިމްކުރުން އެއީ ފަރުދީ ޒިއްމާއެއްކަމުގައި ދެކިލައްވާށެވެ.

މިގޮތުން ކޮރޯނާވައިރަސްއާއި ބެހޭގޮތުން ތިމާ މާބޮޑަށް ވިސްނާ ތިމާގެ ނަފްސާނީ ދުޅަހެޔޮކަމަށް ލޮޅުން އަރާތޯ ބައްލަވާށެވެ. މިބައްޔާމެދު ވިސްނޭ ދަރަޖަ ގިނަވެ، އެހެން މީހުންނާއި އެކަހެރިވެވި، މިޖާޒަށް ބަދަލުއައިސް، ގައިގެ ރިހުން ގިނަވެ މިފަދަ ބަދަލުތަކެއް އާދޭތޯ ސަމާލުވެއްލައްވާށެވެ.

ހަމައެއާއިއެކު، ތަކުރާރުކޮށް، ޓީވީ، އަދި ފޯނު ބޭނުންކޮށް، ތަފާތު މީހުން ސޯޝަލް މީޑިއާގައި ކޮވިޑް-19 އާއި ބެހޭގޮތުންފަތުރާު އާ ޚަބަރުތައް އަބަދުބެލޭނަމަ، އަދި އޭގެސަބަބުން ތިމާއަށް އުނދަގޫ އިހުސާށްކުރެވޭނަމަ، "މީޑިއާ ބްރޭކް" އެއް ނަންގަވާށެވެ. މާނައަކީ މިފަދަ ޚަބަރުތައް ބަލާ ދަރަޖަ މަދުކޮއްލައްވާށެވެ. ނުނީ ވަގުތީ ގޮތުން މިފަދަ ޚަބަރުތައް ބެލުން ހުއްޓާލައްވާށެވެ. އަދި މިވަގުތު އަޑުއަހާނީ ރާއްޖޭގެ ކަމާބެހޭ ފަރާތްތަކުން ދެއްވާ މަޢުލޫމާތުތުތަކެވެ.

މާގިނައިން، މިބައްޔާމެދު ގޫގުލްކޮށް، ޔޫޓިއުބް ބަލާ، ސޯޝަލް މީޑިއާގައި ދައުރުވާ ތަފާތު މަޢުލޫމާތުތަށް ބެލޭނަމަ، އެކަން ކުރެއްވުން މަދުކުރައްވާށެވެ. ނޫނީ ހުއްޓާލައްވާށެވެ. ނަފްސު ބިރުވެރިކަމެއްގެ ތެރެއަށް ދާ ލިޔުންތަށް ބެލުން ހުއްޓާލައްވާ، މިބައްޔާބެހޭ ޕްރޮގްރާމްތައް އެކަނި އިނދެ ނުބައްލަވާށެވެ. ނަމަވެސް އާއިލީ ބޭފުޅުންނާއިއެކު ކޮވިޑް-19 ޚަބަރުތައް ބެއްލެވުން އެންމެރަގަޅެވެ. އަދި މިގޮތުން އަޑުއިވޭ ވާހަކަތަކުގެ ތެރެއިން އޮއްޓަރުހުރި ހަޤީޤީ މަޢުލޫމާތުތައް ފާހަގަކޮށް، ކޮންމެހެން މިވާހަކަ ދައްކަން ބޭނުންފުޅުވާނަމަ މިފަދަވާހަކަތައް އަޑުއިވުމުން އުދަނގޫނުވާނެކަމަށް ޔަޤީންވާ ޢާއިލާ މެމްބަރަކާ ނުވަތަ ރަހުމަތްތެރިއަކާ ވާހަކަ ޙިއްސާކޮއްލިޔަސް އެންމެ ރަގަޅުވާނެއެވެ.

ކޮވިޑް-19 އާއިމެދު ދެކެވޭ ތޯތޯވާހަކަތައް ފަތުރާމީހަކަށް ތިމާނުވާށެވެ. އަދި މިފަދަ ލިޔުންތައް ސޯޝަލް މީޑިއާގައި ޝެއާ ނުކުރައްވާށެވެ. ބައެއް ތޯތޯ ވާހަކަތަކުގެތެރޭގައި، ކޮވިޑް19 އަކީ އިންސާނީ އުފެއްދުމެއްކަމަށް ބުނާބުނުން، ލޮނުމެދުފެން ފަދަ ގޭގައިދެވޭ ފަރުވާއިން ކޮވިޑް-19 ރަގަޅު ކުރަން ގޫގަލް ބުނާބުނުމަށް މުޅިންހެންބަރޯސާނުވެ، ޑޮކްޓަރީ އިރުޝާދުތައް ޤަބޫލު ކުރައްވާށެވެ.

ބަލި ފެތުރުމުގެ ޒަރިއްޔާތަކާ ބެހޭގޮތުން ޤަބޫލު ކުރައްވަނީ ޒިންމާދާރު ފަރާތްތަކުން ދެއްވަމުން ގެންދަވާ މަޢުލޫމަތުތަކައް (މިސާލަކަށް، އެޗްޕީއޭ، ޑަބްލިޔުއެޗްއޯ) އެވެ.

މިއަދުގެ މިނާޒުކު ޙާލަތުގައި އަޅުގަޑުމެން ތިބިއިރު ކޮންމެ ބޭފުޅަކަށްވެސް އެބޭފުޅެއްގެ ނަފްސާނީ ދުޅަހެޔޮކަން ޤާއިމް ކުރެއްވުމަށް ތަފާތު މަސައްކަތްތަކެއް ކުރެއްވިދާނެއެވެ.

ތިމާއަކީ ނުވަތަ ތިމާގެ ޢާއިލާގެ ބޭފުޅަކީ ޖެނެރަލައިޒްޑް އެންޒަައިޓީ، ޕެނިކް އެޓޭކް، ހެލްތް އެންޒަައިޓީ، ސޯޝަލް އެންޒަައިޓީ، އޯސީޑީ ނުވަތަ ޑިޕްރެޝަންއަށް ބޭސް ކުރަމުން އަންނަ ފަރާތަކަށް ވެފާ، ކޮވިޑް-19 ގެ ވާހަކަތައްއިވި ބަލީގެ އަލާމާތްތައް އިތުރުވާނަމަ ފަރުވާދޭ ޑޮކްޓަރުގެ ލަފާ ހޯއްދަވާށެވެ. މަތީގައި ދެންނެވުނު ހުރިހާކަމެއް ކުރުމަށް ފަހުވެސް ކޮވިޑް-19 އާއި ގުޅިގެން އަންނަަ ހާސްކަން ކުޑަނުވާނަމަ ފަންނިީ ބޭފުޅުންގެ އެހީތެރިކަން ހޯއްދަވާށެވެ.

މިކަމުގެ ކުރީސަފުގައި މަސައްްކަތް ކުރައްވަމުން ގެންދަވާ ހުރިހާ ބޭފުޅުންވެސް، ސިއްހީ ޚިދުމަތްތެރިން، ޕޮލިސް، ސިފައިން، އަދި ޕްރޮގްރާމްތައް ހިންގަވާ ބޭފުޅުންވެސް އެބޭފުޅުންގެ ނަފްސާނީ ދުޅަހެޔޮކަން ރައްކާތެރި ކުރައްވުމަށް ސްޓްރެސް މެނޭޖްކުރެއްވުން މުހިންމެވެ. އެބޭފުޅުންނަށް ދެވެން އޮތް ހުރިހާ އެއްބަރުލުމެއް ދިނުން އެއީވެސް އަޅުގަޑުމެން އެންމެނަށް ކުރެވިދާނެކަމެކެވެ.

ރިފަރެންސް:ސައިކޮލޮޖީޓުޑޭ؛ ޖެކެމީކަރ؛ 5،6 މާރޗް 2020؛ މާގޮޑް ސްޓާރބަކް 3 މާރޗް 2020؛ ޑރ ބަރޫގްފިޝްއޯފް، އޭ.ޕީ.އެލް 2020