2.1 ބިލިއަން ރުފިޔާ އާއި 6.9 ބިލިއަން ރުފިޔާގެ މިންވަރަކަށް އާމްދަނީ ދަށްވާނެ!

މިއަހަރުގެ ތެރޭގައި ޖީ.ޑީ.ޕީ ކުރިއަރާ މިންވަރު ހުންނާނެ ކަމަށް މިހާރު ބެލެވެނީ، 0.5 އިންސައްތަ އާއި މައިނަސް 5.6 އިންސައްތައާ ދެމެދުގެ މިންވަރެއްގައި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

މިއަހަރުގެ ތެރޭގައި އިގްތިސާދު 7.5 އިންސައްތައިގެ ކުރިއެރުމެއް އަންނާނެކަމަށް ކުރިން ވަނީ އަންދާޒާކޮށްފައެވެ.

ކޮވިޑް-19 ގެ ސަބަބުން، އިޤްތިޞާދަށް އަރާނެ ލޮޅުމަށް ބަލާއިރު، އިގްތިސާދަށް އައިސްފައިވާ ހީނަރުކަމާއި ގުޅިގެން، މި އަހަރުގެ ތެރޭގައި ލިބޭނެ ކަމަށް އަންދާޒާ ކޮށްފައިވާ އާމްދަނީގެ ތެރެއިން، 2.1 ބިލިއަން ރުފިޔާ އާއި 6.9 ބިލިއަން ރުފިޔާގެ މިންވަރެއް ދަށްވާނެ ކަމަށް ރައީސް ވިދާޅުވިއެވެ. މި އަހަރުގެ ތެރޭގައި ދައުލަތުން ލިބޭނެ ކަމަށް އަންދާޒާ ކޮށްފައިވާ އާމްދަނީ އަކީ 29.9 ބިލިއަން ރުފިޔާއެވެ.

ރައީސްގެ ވާހަކަފުޅުގައި ދައުލަތުގެ އާމްދަނީއަށް އަންނަ ހީނަރުކަމަކާއި ގުޅިގެން ސިވިލް ސަރވިސް މުވައްޒަފުންގެ އާމްދަނީން އެއްވެސް ބައެއް އުނިކުރަން ވިސްނާފައި ނުވާ ކަމަށް ރައީސް ވިދާޅުވިއެވެ. އޭގެ އިތުރުން ސަރުކާރުން މި އަހަރުގެ ތެރޭގައި ހިންގަން ނިންމާފައިވާ އެއްވެސް މަޝްރޫއެއް ހުއްޓާލުމުގެ ވިސްނުމެއް ނެތްކަމަށް ވެސް ވިދާޅުވިއެވެ.

އިގްތިސާދަށް މިވަރުގެ ބޮޑު ލޮޅުމެއް އައިސްފައިވަނީ ފަތުރުވެރިކަމަށް އައިސްފައިވާ ހީނަރުކަމާއި ގުޅިގެންނެވެ. އެގޮތުން މި މަހުގެ ފުރަތަމަ ދިހަ ދުވަހުގެ ތެރޭގައި އެކަނިވެސް، ރާއްޖެ އައި ފަތުރުވެރިންގެ ޢަދަދު، މިދިޔަ އަހަރާ އަޅައިބަލާއިރު، 22.8 އިންސައްތަ ވަނީ ދަށަށް ގޮސްފައެވެ. އަދި ޖެނުއަރީ މަހުގެ 26 ވަނަ ދުވަހުން ފެށިގެން މިހާތަނަށް 161740 ބެޑްނައިޓް ވަނީ ކެންސަލްވެފައެވެ.