ދުނިޔޭގެ އެކި ކަންކޮޅުގައި ހަލުވިކަމާއެކު ފެތުރެމުންދާ ކޮވިޑް-19 ގެ ސަބަބުން ޖަރުމަނުވިލާތުގެ 60 ނުވަތަ 70 އިންސައްތަ މީހުންނަށް އެ ބަލި ޖެހޭނެކަމަށް ލަފާ ކުރެވޭކަމަށް އެ ގައުމުގެ ޗާންސެލާ އެންގެލާ މާކެލް ވިދާޅުވެއްޖެއެވެ.

ޖަރުމަނުގެ ބޮޑު އާބާދީއަކަށް ބަލިޖެހޭނެކަމަށް މާކެލް ވިދާޅުވެފައިވަނީ އެގައުމުގެ ކަމާބެހޭ އިދާރާތަކުން ދީފައިވާ މައުލޫމާތު މައްޗަށްކަމަށް އޭނާ ވަނީ ވިދާޅުވެފައެވެ. ބާލިންގެ ކޮރޯނާވައިރަސްގެ ނޫސް ކޮންފަރެންސްގައި އެގައުމުގެ ހެލްތް މިނިސްޓަރު ޖެންސް ސްޕާން އާއެކު ވާހަކަދައްކަވަމުން މާކެލް ވިދާޅުވީ ސިއްހީ ނިޒާމަށް ބުރައެރުވުން މިވަގުތަށް މުހިންމު ނޫން ކަމަށެވެ.

އަދި ޔޫރަޕްގެ ހުރިހާ ގައުމަކުން ކޮވިޑް-19 ފެނިފައިވާތީ އެކަމުގެ ހިތާމަ ފާޅުކުރައްވާ މާކެލް ވަނީ ކޮވިޑް-19 ގެ އެންމެ ބޮޑު އަސަރެއް ކުރަމުންދާ އިޓަލީއަށް ހަމްދަރުދީގެ މެސެޖެއް ރައްދުކުރައްވާފައެވެ.

މާކެލް ވިދާޅުވީ ގައުމުތަކަށް މިވަގުތު އެންމެ އިސްކަމެއްދޭންވީ ކޮވިޑް-19 އާއި ގުޅިގެން ކުރަމުންދާ ދިރާސާތަކަށް އެހީތެރިވުމަށް ކަމަށާއި، ޖަރުމަނުން ކޮވިޑް-19 އާއި ކުރިމަތިލާނީ ލާމަރުކަޒީކޮށް ކަމަށެވެ.

މީގެ އިތުރުން ޖަރުމަނުގެ ގާނޫނު ހަދާ މަޖިލީހުން ބުރާސްފަތި ދުވަހު ކޮވިޑް-19 އާއި ގުޅިގެން ހާއްސަ ބައްދަލުވުމެއް ބާއްވަން ވަނީ ނިންމާފައެވެ.