ކޮވިޑް-19: ސައުދީއަރަބިއާގެ ހުރިހާ ސުކޫލުތަކާއި ޔުނިވަރސިޓީތައް ބަންދުކުރަނީ

މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ނުރައްކާތެރި ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ސައުދީއަރަބިއާގެ ހުރިހާ ސުކޫލުތަކާއި ކިޔަވައިދޭ ތަންތަން ބަންދުކުރަން އެ ޤައުމުގެ ސަރުކާރުން ނިންމައިފިއެވެ.

ސައުދީގެ ތައުލީމީ ވުޒާރާއާ ޙަވާލާދީ އެ ޤައުމުގެ މީޑިއާތަކުން ރިޕޯޓްކުރާ ގޮތުން، ކޮވިޑް-19 އާ ގުޅިގެން އެ ޤައުމުގެ ސުކޫލުތަކާއި ޔުނިވަރސިޓީތަކުގެ އިތުރުން، ކިޔަވައިދޭ ހުރިހާ ތަނެއް މުއްދަތެއް ނެތް ގޮތަށް ބަންދުކުރުމަށް ވަނީ ނިންމާފައެވެ. އެގޮތުން ހޯމަ ދުވަހުން ފެށިގެން ބަންދުކުރާއިރު، އަލުން އެތަންތަން ހުޅުވާނީ ކޮވިޑް-19 ގެ ޙާލަތައް ބެލުމަށްފަހު ކަމަށް ރިޕޯޓްތައް ބުނެއެވެ.

މި ނިންމުމަކީ އެ ޤައުމުގެ ރައްޔިތުންގެ ސަލާމަތާއި ރައްކާތެރިކަމަށްޓަކައި ނިންމާފައިވާ ނިންމުމެއް ކަމަށް އެ ޤައުމުގެ ތައުލީމާ ބެހޭ ވުޒާރާއިން ބުނެފައިވާއިރު، އެޤައުމުގެ ސަރުކާރުން ވަނީ އެޤައުމުގެ އިރުމަތީ ޕްރޮވިންސްގެ ޤާޠިފް ޞަރަޙައްދު "ލޮކްޑައުން"ކޮށް ކަރަންޓީން ކުުރުމަށްވެސް ނިންމާފައެވެ.

އެގޮތަށް ނިންމާފައިވަނީ އެ ޞަރަޙައްދުން 11 މީހުން ކޮވިޑް-19 އަށް ޕޮޒިޓިވްވެ، ވައިރަސް ހިފެހެއްޓުމެއްނެތި ފެތުރިދާނެކަމުގެ ބިރު އޮތުމުންނެވެ.

500،000 މީހުންގެ އާބާދީއެއް އޮންނަ ޤާޠިފް ޞަރަޙައްދުގެ ސަރުކާރު އޮފީސްތަކާއި، ޢާންމު ޚިދުމަތްދެ ތަންތަންވެސް މުއްދަތެއް ނެތްގޮތައް މިހާރު ވަނީ ބަންދުކޮށްފައެވެ. އެހެންނަމަވެސް ވިޔަފާރި ޙަރަކާތްތައް އަދި ހުއްޓުވާފައެއް ނުވެއެވެ.