އަޅުގަނޑަކީ ރައީސް ޔާމީންގެ ސަޕޯޓަރެއް: މޫސަ
މަޖިލީހުގައި ގާނޫނުއަސާސީއާއި މަޖިލީހުގެ ގައިވާއިދާ ހިލާފަށް އެއްވެސް ކަމެއް ނުހިނގާ
ރައްޔިތުންގެ މަޖިލީހުގެ ނައިބް ރައީސް އަދި ހުޅުހެންވޭރު ދާއިރާގެ މެމްބަރު މޫސާ މަނިކް، މަޖިލީހުގެ އިދާރާގައި ނޫސްވެރިންނަށް މައުލޫމާތު ދެއްވަނީ
ރައީސުލްޖުމްހޫރިއްޔާ އަބްދުﷲ ޔާމީން ރާއްޖޭގެ ތަރައްގީއަށްޓަކައި ބޮޑެތި މަޝްރޫޢުތަކެއް ހިންގަވާ ކަމަށާއި އެހެން ކަމުން ރައީސް ޔާމީނަށް ވަަރަށް ބޮޑަށް ސަޕޯޓްކުރައްވާ ކަމަށް ރައްޔިތުންގެ މަޖިލީހުގެ ނައިބް ރައީސް އަދި ހުޅުހެންވޭރު ދާއިރާގެ މެމްބަރު މޫސާ މަނިކް ވިދާޅުވެއްޖެއެވެ.
މަޖިލީހުގެ ނައިބު ރައީސްކަމުގެ މަގާމުން މޫސަ ދުރުކުރުމަށް ހުށަހަޅާފައިވާ އިތުބާރު ނެތްކަމުގެ މައްސަލައާ ގުޅިގެން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމެއްގައި މޫސަ ވިދާޅުވީ ރައީސް ޔާމީނަކީ އޭނާއާ އެކު ވަރަށް ގިނަ ދުވަސްތަކެއް ވަންދެން ރައްޔިތުންގެ މަޖިލީހުގައި މަސައްކަތް ކުރެއްވި ބޭފުޅެއް ކަމަށާއި އެހެން ކަމުން ރައީސް ޔާމީނަކީ އޭނާގެ ވަރަށް ގާތް ރައްޓެއްސެއް ކަމަށެވެ.
މޫސަ ވިދާޅުވީ މިހާތަނަށް ރައީސް ޔާމީނާއި އޭނާއާ މައްސަލަ ޖެހޭ ފަދަ އެއްވެސް ކަމެއް ދިމާވެފައި ނުވާ ކަމަށާއި އަދި ރައީސް ޔާމީންއާ މައްސަލަ ޖެހޭ އެއްވެސް ކަމެއް ކޮށްފައި ނުވާ ކަމަށާއި އަދި ރައީސް ޔާމީން އެފަދަ ކަމެއް ކުރައްވާފައި ނުވާ ކަމަށެވެ.
ނަމަވެސް މޫސަ ވިދާޅުވީ ރައީސް ޔާމީން އެމަނިކުފާނާ ކިތަންމެ ގާތް ބޭފުޅެއް ކަމަށް ވީނަމަވެސް ސިޔާސީ ގޮތުން ހިޔާލު ތަފާތުވެގެން ވިދާޅުވާން ޖެހޭ ކޮންމެ އެއްޗެއް ވެސް ވިދާޅުވާން ކެރިވަޑައިގަންނަވާނެ ކަމަށެވެ.
މޫސަ ވިދާޅުވީ މަޖިލީހުގެ ނައިބު ރައީސް ކަމުގެ މަގާމުން އޭނާ ބޭރުކުރެވުނު ނަމަވެސް ހަމަޔަގީނުން ވެސް މަޖިލީހުގެ މެމްބަރުކަމުން ބޭރު ނުކުރެވޭނެ ކަމަށާއި މަޖިލީހުގެ ފަސް އަހަރުގެ މި ދައުރު ނިމެންދެން މަޖިލީހުގެ މެމްބަރެއްގެ ގޮތުގައި ދެމިހުންނަވާނެ ކަމަށެވެ.
މޫސަގެ އިތުރުން މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލައާ ގުޅޭ ގޮތުން ވިދާޅުވީ އެ މައްސަލައިގައި ކަން ހިނގާނެ ގޮތެއް ދަންނަވަން އެނގިވަޑައި ނުގަންނަވާ ކަމަށާއި ނަމަވެސް މަޖިލީހުގެ ރައީސްގެ ހައިސީއްޔަތުން މަސީހު އަދި އޭނާ ވެސް ގާނޫނުއަސާސީ އާއި މަޖިލީހުގެ ގަވާއިދާ ހިލާފަށް އެއްވެސް ކަމެއް ކޮށްފައި ނުވާނެ ކަމަށެވެ.
އެގޮތުން މަޖިލީހުގެ ޖަލްސާތަކާއި މަޖިލީހުގެ ކޮމެޓީތައް ވެސް ކުރިއަށް ގެންދަނީ ރައްޔިތުންގެ މަޖިލީހުގެ މެމްބަރުން ބޭނުންވާ ގޮތަށް ކަމަށާއި އަދި އޭނާއަކީ މަޖިލީހުގެ ރައީސް އަންގަވާ ގޮތަށް ކަންކަން ކުރައްވަން ހުންނަ ބޭފުޅެއް ކަމަށް މޫސަ ވިދާޅުވިއެވެ.
މީގެ އިތުރުން މޫސަ ވިދާޅުވީ އޭނާއަކީ މަގާމުގެ ދަހިވެތި ކަމުގައި އުޅުއްވާ ބޭފުޅެއް ނޫން ކަމަށާއި މަޖިލީހުގެ ތެރެއިން ހުރިހާ ކަމެއް ވެސް ނިމިގެން ދަނީ މެޖޯރިޓީން ކަމަށެވެ. އަދި ގާނޫނު އަސާސީއާ ހިލާފް އެއްވެސް ގާނޫނެއް ވެސް އަދި ގާނޫނުއަސާސީން ރައްޔިތުންނަށް ކަށަވަރު ކޮށްދީފައިވާ އެއްވެސް ހައްގެއް ވެސް މަޖިލީހުގެ ތެރެއިން ނިގުޅައިގަނެފައި ނުވާ ކަމަށާއި އެހެން ކަމުން މަޖިލީހުގެ ރައީސް އާއި އަދި ނައިބު ރައީސްގެ އިތުބާރު ނެތް ކަމުގެ މައްސަލަ ވައްދަން ޖެހޭ ސަބަބެއް ނެތް ކަމަށް މޫސަ ވިދާޅުވިއެވެ.
މީގެ އިތުރުން މޫސަ ވިދާޅުވީ މަޖިލީހުގައި ހުރިހާ ކަމެއް ވެސް ހިނގަނީ ސިޔާސީ ޕާޓީތަކުން ބޭނުންވާ ގޮތަށް ކަމަށާއި އަދި އެ ނޫން ގޮތަކަށް މަޖިލީހުގައި އެއްވެސް ކަމެއް ނުހިނގާ ކަމަށް މޫސަ ވިދާޅުވިއެވެ. އަދި މަޖިލީހަށް ދައުލަތުގެ މުއްސަސާތަކުގައި ތިއްބެވި އިސް ބޭފުޅުންގެ އިތުބާރު ނެތްކަމުގެ މައްސަލަ ހުށަހަޅައިގެން ހަމަނުޖެހުން އުފެއްދުމުގެ ބޭނުމެއް ނެތް ކަމަށާއި އަދި މަޖިލީހުގެ ރައީސްގެ އިތުބާރު ނެތް ކަމުގެ މައްސަލައާ ގުޅިގެން މަޖިލީހުގެ ތަޅުމުގައި އެއްވެސް ހަމަނުޖެހުމެއް ހިންގުމުގެ ޖާގަ ނުދެއްވާނެ ކަމަށް ވެސް މޫސަ ވިދާޅުވިއެވެ.
