ކައުންސިލް އިންތިހާބު ފަސްކުރުމުގެ މަޝްވަރާއެއް އީސީގައި އަދި ނުކުރެވޭ: އަކުރަމް
އިންތިހާބު ފަސްކުރުމަށް ސަރުކާރުން ކޮމިޝަނަށް ލަފާ އަރުވައިފި ނަމަ، ގާނޫނުގައިވާ ގޮތަށް ނިންމުންތައް ނިންމާނެ: އީސީ
ލޯކަލް ކައުންސިލް އިންތިހާބުގެ އެމްޑީޕީ ޕްރައިމަރީ ވޯޓު
އަންނަ އޭޕްރިލް މަހުގެ ހަތަރު ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ފަސްކުރުމުގެ މަޝްވަރާއެއް އިލެކްޝަންސް ކޮމިޝަން (އީސީ)ގައި އަދި ނުކުރެވޭ ކަމަށް އެ ކޮމިޝަންގެ ނައިބުރައީސް އަޙްމަދު އަކްރަމް ވިދާޅުވެއްޖެއެވެ.
މިހާރު ދުނިޔޭގައި ހަލުވި މިނެއްގައި ފެތުރެމުންދާ ކޮވިޑް-19 ގެ ދެ ކޭސް އެއް ރާއްޖެއިން ފެނުމާއި ގުޅިގެން ކައުންސިލް އިންތިހާބު ފަސްކުރުމުގެ ވިސްނުމެއް ގެންގުޅުއްވަންތޯ ރާއްޖެއެމްވީއިން ކުރި ސުވާލަކަށް ޖަވާބުދެއްވަމުން އަކުރަމް ވިދާޅުވީ އަދި އެފަދަ މަޝްވަރާއެއް ކޮމިޝަނުގައި ނުކުރެވޭ ކަމަށެވެ. ނަމަވެސް އިންތިހާބު ފަސްކުރުމަށް ސަރުކާރުން ކޮމިޝަނަށް ލަފާ އަރުވައިފި ނަމަ، ގާނޫނުގައިވާ ގޮތަށް ނިންމުންތައް ނިންމާނެ ކަމަށް އޭނާ ވިދާޅުވިއެވެ.
އަކުރަމް މިހެން ވިދާޅުވެފައިވާއިރު ޓުއަރިޒަމް މިނިސްޓަރ އަލީ ވަހީދު އާދީއްތަ ދުވަހު ބޭއްވުނު ނޫސްވެރިންގެ ބައްދަލުވުމުގައި ވިދާޅުވީ ލޯކަލް ކައުންސިލް އިންތިހާބު ފަސް ކުރުމާމެދު ސަރުކާރުން ސިޔާސީ ޕާޓީތަކާ އެކު މަޝްވަރާ ކުރާނެ ކަމަށެވެ. އަލީ ވަހީދު ވިދާޅުވީ އިންތިހާބަކީ ސަރުކާރާއި ސަރުކާރުގެ ވާދަވެރި ޕާޓީތަކާއި ހުރިހާ ރައްޔިތުންގެވެސް ހައްގެއް ކަމަށެވެ. ނަމަވެސް އިންތިހާބާއި ގުޅޭ އެންމެ ފަހުގެ ނިންމުން ނިންމާނީ އީސީން ކަމަށް އަލީ ވަހީދު ވިދާޅުވިއެވެ.
ކޮރޯނާ ވައިރަސް އާއި ގުޅިގެން ސިޔާސީ ޕާޓީތަކުން ވަނީ އެ ޕާޓީތަކުގެ ކެމްޕެއިން ހަރަކާތްތައް މަޑުޖައްސާލުމަށް ނިންމާފައެވެ. އެގޮތުން އެމްޑީޕީން އެ ޕާޓީގެ ކެމްޕޭނު ހަރަކާތްތައް ވަގުތީ ގޮތުން މެދުކަނޑާލުމަށް ފަހު، ސޯޝަލް މިޑިއާގައި ކުރިޔަށް ގެންދިޔުމަށް ނިންމާފައިވާއިރު، ޕީޕީއެމް އާއި ޖުމްހޫރީ ޕާޓީން ވެސް ވަނީ އެ ދެ ޕާޓީން ކުރިޔަށް އޮތް ތާނގައި ބޭއްވުމަށް ހަމަޖެހިފައިވާ ބައެއް ޖަލްސާތަކާއި އިވެންޓުތައް ފަސްކޮށްފައެވެ.
