މިނިމަމްވޭޖް ކަނޑައެޅުމާއެކު ސަރުކާރުގެ ބަޖެޓުން ގާތްގަނޑަކަށް 3.8 ބިލިއަން ރުފިޔާ ހޭދަވާނެ: މިނިސްޓަރު ފައްޔާޒު
6 މާރިޗު 2020 | ހުކުރު 06:55ގިނަ ދިރާސާތަކެއް މިހާރު ދަނީ ކުރެވެމުން
އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން ޢާންމުންގެ ޚިޔާލު ހޯދުމަށް ބޭއްވި ބައްދަލުވުމުގެ ތެރެއިން
މިނިމަމްވޭޖް ކަނޑައެޅުމާއެކު، ގާތްގަނޑަކަށް ސާރުކާރުގެ ބަޖެޓުން 3.8 ބިލިއަން ރުފިޔާ ހޭދަވާނެކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
އެންމެ ކުޑަ އުޖޫރަ ކަނޑައެޅުމާއި ގުޅޭގޮތުން ޢާންމުންގެ ޚިޔާލު ހޯދުމަށް، މިމަހުގެ 04 ވަނަ ދުވަހު ރައްޔިތުންގެ މަޖިލީހުގެ އިދާރާގައި ބޭއްވި ބައްދަލުވުމުގައި މިނިސްޓަރު ފައްޔާޒު ވިދާޅުވީ މިނިމަމްވޭޖް ކަނޑައެޅުމުގެ މަސައްކަތް ކުރަނީ ގިނަ ދިރާސާތަކެއް ހެދިގެން ކަމަށެވެ. އެގޮތުން ވަޒީފާ އަދާކުރާ ފަރާތްތަކާއި، ވަޒީފާ ދޭ ފަރާތްތަކަށް ވެސް ގެއްލުން ނުވޭނެ ގޮތަށް ކަމަށެވެ. އަދި މިނިސްޓަރު ވިދާޅުވީ މިކަމުގެ ސަބަބުން ސަރުކާރުގެ ބަޖެޓުން 3.8 ބިލިއަން ރުފިޔާގެ ހޭދަވާނެ ކަމަށް ލަފާކުރެވޭ ކަމަށެވެ.
މިނިސްޓަރު ފައްޔާޒު ވިދާޅުވީ މިއީ ދައުލަތުގެ ބަޖެޓުން ހޭދަވާ ވަރަށް ބޮޑު އަދަދެއް ކަމަށާއި، ކޮންމެވެސް ގޮތަކުން މިފައިސާ ދައުލަތަށް ހޯދަދޭންޖެހޭ ކަމަށެވެ. އެގޮތުން ރައްޔިތުންގެ މަޖިލީހަށް ހުށަހަޅާގެން ޕީއެސްއައިޕީގެ ބަޖެޓުން އުނިކޮށް ނުވަތަ އިތުރު ޓެކްސް ނަގާގެން ނަމަވެސް އިތުރަށް ފައިސާ ހޯދާނެ ގޮތެއް ހޯދަންޖެހޭ ކަމަށް މިނިސްޓަރު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ ރާއްޖޭގެ އިގްތިސާދުގައި މިނިމަމްވޭޖެއް ކަނޑައެޅުމުގެ ވަރު އެބަހުރި ކަމަށެވެ. އަދި އެއަދަދަކީ ކޮބައިތޯ އާއި، އެވަޒީފާ އަދާކުރާ ފަރާތްތައް ވެސް އެންމެ ބޭނުންވާ އަދަދު ހޯދުމަށް މަސައްކަތްތައް ކުރެވެމުންދާކަން މިނިސްޓަރު ފާހަގަކުރެއްވިއެވެ.
މީގެ އިތުރުން މިނިސްޓަރު ފައްޔާޒު ވިދާޅުވީ ރާއްޖޭގައި މަސައްކަތް ކުރާ ބިނދޭސީންނަށް މިނިމަމްވޭޖެއް ކަނޑައެޅަންޖެހޭ ކަމަށް ގަބޫލުނުކުރައްވާ ކަމަށެވެ. އިންސާނީ ހައްގުގެ ނަޒަރުން ބަލަނީނަމަ ނުރަނގަޅުވި ނަމަވެސް ރާއްޖޭގެ އިގްތިސާދުގައި އެވަރުގެ ކެޕޭސިޓީ ނެތްކަމަށް މިނިސްޓަރު ވިދާޅުވިއެވެ.
