މިފްކޯ ޕްރޮމޯޝަން: މަސް ކޭސް ވިއްކަން ރަށްތަކަށް!

މިފްކޯ އިން "ފަސްމީރު މިވަރެއްނެތް"ގެ ނަމުގައި ޕްރޮމޯޝަނެއް ފަށައިފިއެވެ.

މި ޕްރޮމޯޝަން ފަށާފައިވާނީ މާރޗް މަހުގެ 3 ވަނަ ދުވަހުއެވެ. މިފްކޯ އިން ބުނީ މި ޕްރޮމޯޝަނުގެ ދަށުން މަސްދަޅު ކޭސް ޚާއްޞަ އަގުގައި ރާއްޖޭގެ އެކި ރަށްރަށަށް ފޯރުކޮށްދިނުމުގެ ގޮތުން މިފްކޯގެ ޓީމުތައް ދޯނިފަހަރުގައި އެކި ރަށްރަށަށް މަސް ކޭސް ވިއްކުމަށް ގާތްކުރަމުންދާނެ ކަމަށެވެ. އެގޮތުން ގއ އަތޮޅު އަދި ފ އަތޮޅަށް މިފްކޯގެ މެންދޫ 5 އަދި ލޯބޮޑު ނަމަކަށް ކިޔާ ދޯނި ދަނީ ދަތުރު ކުރަމުންދާ ކަމަށެވެ.

ރާއްޖެއެމްވީއަށް މަޢުލޫމާތު ދެއްވަމުން މިފްކޯގެ ސޭލްސް އެންޑް މަރކެޓިންގް މެނޭޖަރ ޢައިޝަތު ރިޔާޒާ ވިދާޅުވީ މި ޕްރޮމޯޝަން ކުރިއަށް ގެންދަން ނިންމާފައިވަނީ ހެޔޮ އަގުގައި ޢާންމުންނަށް މަސް ދަޅު ކޭސް ފޯރުކޮށްދިނުމުގެ ބޭނުމުގައި ކަމަށެވެ. އެގޮތުން ތެޔޮ އަދި ފެން މަސްދަޅު ކޭސްތައް މާލެއިން ވިއްކަން ހުންނަ އަގަށް ލިބިގެންދާނެ ކަމަށް ރިޔާޒާ ވިދާޅުވިއެވެ.

ރިޔާޒާ ވިދާޅުވީ މި ޕްރޮމޯޝަނުގެ ދަށުން އަންގާރަ ދުވަހު ގއ. ކޮލަމާފުށީގެ ރައްޔިތުންނަށް މަސް ކޭސް ވިއްކާފައިވާނެ ކަމަށާއި، ދެން ދޯނި ދަތުރު ކުރާނީ ގދ. ތިނަދޫ އަށާއި ފ. ބިލައްދޫ ކަމަށެވެ. އަދި މީގެ އިތުުރުން ހޮނިހިރު ދުވަހު އުުތުރުގެ އަތޮޅުތަކަށް ދަތުރުތައް ފަށާނެ ކަމަށެވެ.

3000 ކޭސް ދޯންޏަކުން ސްޓޮކް ކުރާނެކަން ފާހަގަކޮށް މިފްކޯ އިން ބުނީ މި ޕްރޮމޯޝަން ކުރިއަށްދާނީ މެއި 30 ގެ ނިޔަލަށް ކަމަށެވެ. މި ޕްރޮމޯޝަނުގެ ދަށުން "ފަސްމީރު މިވަރެއްނެތް" މުޅި ރާއްޖެއަށް ކުރާ ދަތުރުތަކުގެ ޝެޑިއުލްގެ ތަފުޞީލު މިފްކޯގެ ފޭސްބުކް ޕޭޖް އާއި ޓްވިޓަރއިން އަޕްޑޭޓް ކުރެވެމުންދާނެއެވެ. އަދި ޕްރޮމޯޝަނާއި ބެހޭ އިތުރު މަޢުލޫމާތު 3344553 ނަންބަރަށް ގުޅުމުން ލިބޭނެ ކަމަށް މިފްކޯ އިން ހާމަކުރެއެވެ.

ދޯނީގެ އިތުރުން ރާއްޖޭގެ އެކި ޞަރަޙައްދުތަކުގައި ހުރި މިފްކޯގެ އައިސްޕްލާންޓް ތަކުގައި ވެސް މި ޕްރޮމޯޝަން ކުރިއަށްދާއިރު ހެޔޮއަގުގައި މަސް ކޭސް ލިބެން ހުންނާނެ ކަމަށް މިފްކޯ އިން ބުނެއެވެ.