އިގްތިސާދު ރަނގަޅުކުރުމަށް ދަނީ ގިނަ މަސައްކަތްތަކެއް ކުރަމުން: އައްޑޫ ސިޓީ މޭޔަރު
2 މާރިޗު 2020 | ހޯމަ 14:01ދަނޑުވެރިކަމަށް ޚާއްސަ ޕްރޮގްރާމެއް ފެށިގެންދާނެ
އައްޑޫ ސިޓީގެ މޭޔަރު އަބްދުﷲ ސޯދިގު
އައްޑޫ ސިޓީ ކައުންސިލުން ސަރުކާރާ ގުޅިގެން އިގްތިސާދު ރަނގަޅުކުރުމަށް ގިނަ މަސައްކަތްތަކެއް ކުރަމުންދާ ކަމަށް އެސިޓީގެ މޭޔަރު އަބްދުﷲ ސޯދިގު (ސޯބެ) ވިދާޅުވެއްޖެއެވެ.
ރާއްޖެއެމްވީއަށް ދިން ހާއްސަ އިންޓަވިއުއެއްގައި މޭޔަރު ސޯދިގު ވިދާޅުވީ ސަރުކާރުގެ އެކި މުއައްސަސާތަކާއި ގުޅިގެން މިހާރު ވެސް ގިނަ ޕްރޮޖެކްޓްތަކެއް އައްޑޫގެ ތަރައްގީއަށް ކުރަމުން އަންނަ ކަމަށެވެ. އެގޮތުން އާންމު ޚިދުމަތާއި އާންމުކޮށް ރައްޔިތުންނަށް ދަތިވާ ކަންކަމުގެ އިތުރުން ރަށުގެ ބަނދަރު ހެދުމާއި މަގު ހެދުމުގެ މަސައްކަތައް ކުރިއަށްދާ ކަމަށެވެ. އަދި އިގްތިސާދީ ކަންކަމަށް ފަހިވާ ގޮތަށް އިގްތިސާދު ރަނގަޅުކުރުމަށް މަސްވެރިކަމާއި ފަތުރުވެރިކަމުގެ ދާއިރާއިން މަސައްކަތްތަކެއް ކުރަމުންދާ ކަމަށް ސޯދިގު ވިދާޅުވިއެވެ.
އޭގެއިތުރުން ދާދި އަވަހަށް ދަނޑުވެރިންނަށް ޚާއްސަކޮށްގެން ދަނޑުވެރި ޕްރޮގްރާމެއް ކުރިއަށް ގެންދާނެކަން ސޯދިގު ފާހަގަކުރެއްވިއެވެ.
ގެސްޓްހައުސްގެ މަޝްރޫއަށް އަލިއަޅުއްވާލައްވާ ސޯދިގު ވިދާޅުވީ ސިޓީ ކައުންސިލްއާ ޓޫރިޒަމް މިނިސްޓްރީ ގުޅިގެން ގެސްޓްހައުސްގެ ޕްރޮގްރާމް މިހާރު ފަށާފައިވާ ކަމަށެވެ. ގެސްޓްހައުސް އެޅުމަށްޓަކައި ބިން ދޫކުރުމަށް އިއުލާން ކުރެވިފައިވާ ކަމަށް ސޯދިގު ވިދާޅުވިއެވެ. އަދި ވިދާޅުވީ އެސަރަހައްދުތަކުގެ ލޭންޑް ސްކޭޕް ކުރުމަށް ސިޓީ ކައުންސިލުން ވަރަށް އަވަހަށް އިއުލާން ކުރާނެ ކަމަށެވެ.
