ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އެ އިދާރާގެ މައި އޮފީސް 20 ބުރިއަށް އެޅުމަށް ސައުތު ކޮރެޔާގެ ސްކައި ވިންޑް ކުންފުންޔާއެކު އެއްބަސްވުމުގައި ސޮއި ކޮށްފިއެވެ.
އެފްއޭއެމް ހައުސްގައި ހޯމަ ދުވަހު ބޭއްވި ސޮއި ކުރުމުގެ ރަސްމިއްޔާތުގައި މި އެއްބަސްވުމުގައި އެފްއޭއެމްގެ ފަރާތުން ސޮއި ކުރެއްވީ އެފްއޭއެމްގެ ރައީސް ބައްސާމް އަދީލް ޖަލީލެވެ. އަދި ސްކައި ވިންޑް ކުންފުނީގެ ފަރާތުން މި އެއްބަސްވުމުގައި ސޮއި ކުރެއްވީ އެކުންފުނީގެ ޗެއާމަން ޕާރކް ޗެންޔޮންގް އެވެ.
އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ މި އެއްބަސްވުމުގެ ދަށުން ބޮޑު ތިން މަޝްރޫއެއް ފެށިގެންދާނެ ކަމަށާއި އޭގެ ތެރޭގައި އެފްއޭއެމް ހައުސް 20 ބުރިއަށް އިމާރާތް ކުރުމާއި ހިއްކި ބިން ސަރަހައްދު (ޓާރފް ދަނޑު ފަހަތުގައި އޮންނަ ވެލި ދަނޑު) ގައި ހަތަރު ބުރީގެ ފުޓްސެލް ދަނޑަކާއި، ރާއްޖޭގެ އެކި ސަރަހައްދު ތަކުގައި 20 އާރޓިފިޝަލް ވިނަ ދަނޑު އެޅުން ހިމެނޭކަމަށެވެ.
ބައްސާމް ވިދާޅުވީ އެފްއޭއެމް ހައުސް 20 ބުރިއަށް އިމާރާތް ކުރެވޭއިރު އިމަރާތުގެ ގިނަ ފަންގިފިލާތައް ބޭނުން ކުރެވޭނީ ފުޓުބޯޅައަށް ހަރަދު ކުރުމަށް ފައިސާ ހޯދުމުގެ ބޭނުމުގައި ކަމަށެވެ. މީގެ އިތުރުން ބައްސާމް ވިދާޅުވީ ހިއްކި ބިން ސަރަހައްދުގައި އެޅޭ ހަތަރު ބުރީގެ އިންޑޯ ފުޓުސަލް އިމާރާތުގެ އެއް ފަންގިފިލާގައި އިންޓަރނޭޝަނަލް ފުޓުސަލް މުބާރާތެއް ބޭއްވޭނެ ވަރަށް ތަރައްގީކުރެވޭނެ ކަމަށެވެ. އެފްއޭއެމްގެ އަމާޒަކީ ފުޓުސަލް ލީގެއް ރާއްޖޭގައި ފެށުން ކަމަށާއި، ފުޓުބޯޅަ އާއި ފުޓުސަލް އެކުވެފައި އޮންނަ އޮތުން މި އިމާރާތުގެ ސަބަބުން ބަދަލުވެގެން ދާނެ ކަމަށްވެސް ބައްސާމް ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ވައުދުފުޅުތަކުގެ ތެރޭގައި ހިމެނޭ ރާއްޖޭގެ އެކި ކަންކޮޅުތަކުގައި އާޓީފިޝަލް ވިނައިގެ ފުޓުބޯޅަ ދަނޑުތައް ހެދުމުގެ މަޝްރޫއުގެ ދަށުން އާޓިފިޝަލް ވިނަ 20 ދަނޑު އެޅުންވެސް މި އެއްބަސްވުމުގައި ހިމެނެއެވެ. ބައްސާމް ވިދާޅުވީ އަތޮޅުތެރޭގައި އެޅޭ ދަނޑުތައް ނިންމަވާނީ ސަރުކާރާއި މަޝްވަރާ ކޮށްގެން ކަމަށެވެ.
އެފްއޭއެމްގެ ވިސްނުމަކީ ދިވެހި ޕްރިމިއާ ލީގު މުޅި ރާއްޖެއަށް ފުޅާ ކުރުން ކަމަށާއި އަދި މި ފެށޭ ތިން ޕްރޮޖެކްޓްގެ ސަބަބުން މި ހުވަފެނުގައި ކުލަޖެހުމުގެ ފުރުސަތު ބޮޑު ކަމަށް ބައްސާމް ވަނީ ވިދާޅުވެފައެވެ. އަދި ކޮރެޔާގެ ސްކައި ވިންޑް އެކު ކުރެވޭ މަސައްކަތްތަކުގެ ވިސްނުން ހުރި ގޮތް އޭޕްރީލް 18 ވަނަ ދުވަހު ބާއްވާ އެފްއޭއެމް އެވޯޑް ހަފްލާގައި އިއުލާން ކުރާނެ ކަމަށް އެފްއޭއެމް އިން ބުނެއެވެ.
