އެފްއޭ ކަޕް ބުރާސްފަތި ދުވަހު ފަށަނީ

ދެ އަހަރުގެ މެދުކެނޑުމަކަށްފަހު ރާއްޖޭގެ އެންމެ ދުވަސްވީ އެއް ފުޓްބޯޅަ މުބާރާތް ކަމަށްވާ އެފްއޭ ކަޕް އަންނަ ބުރާސްފަތި ދުވަހު ފަށަން ތައްޔާރުވެއްޖެ އެވެ.

މި އަހަރުގެ އެފްއޭ ކަޕްގައި 8 ޓީމަކުން ވާދަކުރާނެއެވެ. އެއީ ދިރާގު ދިވެހި ޕްރިމިއާ ލީގު ޗެމްޕިއަން މާޒިޔާ ސްޕޯޓްސް އެނެޑް ރެކްރިއޭޝަނާއި، ކްލަބު އީގަލްސް އާއި، ޓީސީ ސްޕޯޓްސް ކްލަބާއި، ކްލަބު ގްރީން ސްޓްރީޓްސް އާއި، ދަ ގްރާންޑޭ ސްޕޯޓްސް ކްލަބާއި، ފޯކައިދޫ ފުޓްބޯލް ކްލަބުގެ އިތުރުން ވިލިމާލެ ޔުނައިޓެޑާއި ކްލަބު އޭދަފުއްޓެވެ.

މުބާރާތުގައި 8 ޓީމު ބައިވެރިވުމުން، މުބާރާތް ފަށާނީވެސް ކުއާޓާ ފައިނަލުންނެވެ. އެގޮތުން މުބާރާތް ހުޅުވާ މެޗު ކަމަށްވާ ކުއާޓާ ފައިނަލުގެ ފުރަތަމަ މެޗުގައި ބުރާސްފަތި ދުވަހު ހަވީރު ބައްދަލުކުރާނީ ޓީސީ އާއި އޭދަފުއްޓެވެ. އަދި އެރޭ ކުޅޭ މެޗުގައި ބައްދަލުކުރާނީ މާޒިޔާ އާއި ކްލަބު ގްރީން ސްޓްރީޓްސް އެވެ. އަދި ހުކުރު ދުވަހު ހަވީރު ފޯކައިދޫ އާއި ދަ ގްރާންޑޭ ކުޅުމަށް ފަހު އެރޭ އޮންނާނީ އީގަލްސް އާއި ވިލިމާލެ ޔުނައިޓެޑުގެ މެޗެވެ.

އެންމެ ފަހުން މި މުބާރާތް ބާއްވާފައިވަނީ 2017 ވަނަ އަހަރު އެވެ. އެއަށްފަހު 2018 ވަނަ އަހަރުގެ ފުޓްބޯޅަ ސީޒަން ދިގުލައިގެން ދިޔުމާއެކު އެ އަހަރު މި މުބާރާތްތައް ކެންސަލްކުރި އެވެ.

1988 ވަނަ އަހަރު ފެށި އެފްއޭ ކަޕްގެ އެންމެ ފަހުގެ ޗެމްޕިއަން ޓީމަކީ ނިއުރޭޑިއަންޓް ސްޕޯޓްސް ކްލަބެވެ. އެ ޓީމުން 2017 ވަނަ އަހަރު ޗެމްޕިއަންކަން ހޯދާފައިވަނީ ފައިނަލްގައި ޓީސީ ސްޕޯޓްސް ކްލަބު އަތުން ޕެނަލްޓީގައި ކުރި ހޯދައިގެންނެވެ.