ތާލިބާނުންނާ އެމެރިކާއާ ދެމެދު ވެފައިވާ ސުލްހައިގެ އެއްބަސްވުމުގެ ދަށުން އަފްގާނިސްތާނުގެ ޖަލުތަކުގައި ތިބި ތާލިބާން ޖަމާއަތަށް ނިސްބަތްވާ ކުއްވެރިން ދޫކުރުމަށް އަފްގާނިސްތާނުގެ ރައީސް އަޝްރަފް ޢަނީ ދެކޮޅުހައްދަވައިފިއެވެ.

މިހާރު ވެފައިވާ ސުލްހައިގެ އެއްވަސްވުމުގައިވާ ގޮތުންނަމަ، އަފްގާނިސްތާނު ސަރުކާރާއެކު މަޝްވަރާތައް ފެށުމުގެ ކުރިން ޖަލުތަކުގައި ތިބި 5000 އަށް ވުރެ ގިނަ ކުއްވެރިން ދޫކުރުމަށް ތާލިބާނުން ވަނީ ޝަރުތުކޮށްފައެވެ. އަދި މިކަމަށް އެމެރިކާ ސަރުކާރުން ވަނީ އެއްބަސްވެފައެވެ.

ކާބުލްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޢަނީ ވިދާޅުވީ، ތާލިބާނުންގެ 5000 ކުއްވެރިން ދޫކުރަން އެއްވެސް އިރެއްގައި އަފްގާނިސްތާނު ސަރުކާރުން އެއްބަސްވެފައި ނުވާނެ ކަމަށެވެ. އެމަނިކުފާނު މިހެން ވިދާޅުވީ ސުލްހައިގެ އެއްބަސްވުމުގައި ސޮއިކުރިތާ 24 ގަޑިއިރު ނުވަނީހެވެ.

އިތުރަށް ޢަނީ ވިދާޅުވީ، ކުއްވެރިން ދޫކުރަން އެމެރިކާ ސަރުކާރުން އެއްބަސްވީ ކަމުގައިވީ ނަމަވެސް، އެއީ އަފްގާނިސްތާނު ސަރުކާރުން ބޯލަނބަން ޖެހޭ ކަމެއް ނޫންކަމަށެވެ. އަދި މެދުވެރިއެއްގެ ދައުރު އަދާކުރާ ގައުމެއްގެ ހައިސިއްޔަތުން އެ އިހްތިޔާރު އެމެރިކާއަށް އެއްވެސް އިރެއްގައި ލިބިފައި ނުވާކަމަށެ ވިދާޅުވިއެވެ.

ތާލިބާނުންނާ އެމެރިކާ ސަރުކާރާ ދެމެދު ވެވުނު އެއްބަސްވުމުގެ އެ މާއްދާއަށް ބަލާއިރު، މަސްއޫލުވެރި ހުރިހާ ފަރާތެއްގެ ރުހުމާއެކު އަސްކަރީ ހައްޔަރީންނާއި ސިޔާސީ ހައްޔަރީން ދޫކުރުމަށް މަސައްކަތް ކުރާނެއެވެ. އަދި އަފްގާނިސްތާނުގެ ސަރުކާރަށް ނިސްބަތްވާ 1000 ކުއްވެރިންގެ ބަދަލުގައި މާރިޗު މަހުގެ ދިހަވަނަ ދުވަހުގެ ކުރިން ތާލިބާނުންގެ 5000 ކުއްވެރިން ދޫކުރުނާއެވެ.

އާދިއްތަ ދުވަހު ސޮއިކުރެވުނު ސުލްހައިގެ އެއްބަސްވުމުގައި އެމެރިކާގެ ފަރާތުން ސޮއިކޮށްފައިވަނީ އެމެރިކާގެ ހާއްސަ މުޝީރު ޒަލްމޭ ހަލީލްޒާދެވެ. އަދި ތާލިބާނުންގެ ފަރާތުން އެއްބަސްވުމުގައި ސޮއިކުރެއްވީ އެ ޖަމާއަތުގެ އެންމެ އިސް ސިޔާސީ ފަރާތް ކަމުގައިވާ މުއްލާ އަބްދުލް ޢަނީ ބަރަދާރެވެ. މިއީ 19 އަހަރު ވެފައިވާ އަފްގާން ހަނގުރާމަ ނިމުމަކަށް ގެނައުމަށް އެޅުނު ފުރަތަމަ ފިޔަވަޅު ކަމަށް ގިނަ ފަރާތްތަކަކުން ވަނީ ސިފަކޮށްފައެވެ.