ހުރިހާ ހަރަކާތެއް ކުރިއަށް މިގެންދަނީ މުޅި ރާއްޖޭގައި، މާލޭގަ އެކަންޏެއް ނޫން: އެމްޑީޕީ
1 މާރިޗު 2020 | އާދީއްތަ 08:33އެމްޑީޕީން ލޯންޗިން ޖަލްސާ ބޭއްވީ ރައްޖޭގެ 161 ރަށުގައި އެއް ވަގުތެއްގައި
އެމްޑީޕީގެ ކެމްޕެއިން ސްޕޯކްސް ޕާސަން އަފްޝަން ލަތީފް
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ބާއްވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގެ ކެމްޕެއިން ކުރިހާ ޙަރަކާތެއް ކުރިއަަށް ގެންދަނީ ލާމަރުކަޒީކޮށް، ރާއްޖޭގެ ހުރިހާ ހިސާބެއްގައި ކަމަށް އެމްޑީޕީން ބުނެފި އެވެ.
ކައުންސިލް އިންތިޚާބުގެ ކެމްޕެއިނާ ގުޅޭ އެންމެފަހުގެ މަޢުލޫތު ދެއްވުމަށް އެމްޑީޕީން، އެޕާޓީގެ ކެމްޕެއިން މައި އޮފީހުގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުުގައި، ކެމްޕެއިން ސްޕޯކްސްޕަރސަން އަފްޝަން ލަޠީފު ވިދާޅުވީ، އިދިކޮޅު ޕީޕީއެމް-ޕީއެންސީ ކޯލިޝަނުން މިދިޔަ ހުކުރު ދުވަހުގެ ރޭގެ ޖަލްސާގައި އެކިއެކި ބޭފުޅުން ދެއްކެވި ވާހަކަތަކަށް ބަލާއިރު، އެބޭފުޅުންގެ މައިގަނޑު ސިޔާސަތަކީ ރައީސް ޔާމީން ގެންގުއްޅުވި ސިޔާސަތުތައް ކަމަށެވެ.
އަފްޝަން ވިދާޅުވީ، ލޯކަލް ކައުންސިލްތަކުގެ އިންތިޚާބުގެ ކެމްޕެއިން ލޯންޗިންގއަށް އެމްޑީޕީން ޖަލްސާތައް ބޭއްވީ މުޅި ރާއްޖޭގައި ކަމަށެވެ. އެގޮތުން މާލޭގެ އިތުރުން ރާއްޖޭގެ 161 ރަށެއްގައި އެއްވަގުތެއްގައި ޖަލްސާތައް ބާއްވާފައިވާ ކަމަށެވެ. އަދި 108 ރަށެއްގައި ބޭއްވުނު ޖަލްސާ ލައިވް ޓެލެކާސްޓް ކުރެވިގެން ކަމަށެވެ.
އަފްޝަން ވިދާޅުވީ، އެމްޑީޕީގެ ކެމްޕެއިން ހުރިހާ ޙަރަކާތެއްވެސް ހިނގާނީ ލާމަރުކަޒީކޮށް، މުޅި ރާއްޖޭގައި ކަމަށެވެ. އަދި ކެމްޕެއިން ހަރަކާތްތައްވެސް ހިންގަން ބޭނުންވަނީ ރާއްޖޭގެ ހުރިހާ ރައްޔިތުންނަށް ވެސް ބައިވެރިވެވޭގޮތަށް ކަމަށް ވެސް އަފްޝަން ވިދާޅުވި އެވެ.
އަފްޝަން ވިދާޅުވީ ކެމްޕެއިން ލޯންޗިންގ ޖަލްސާ ރާއްޖޭގެ 161 ރަށެއްގައި އެއްވަގުތެއްގައި ބޭއްވިއިރު، އެރަށްތަކުގެ ޖަލްސާތަކުގައިވެސް ކެންޑިޑޭޓުންނާއި، ސަރުކާރުގެ ބައެއް އިސްވެރިންނާއި، ރައްޔިތުންގެ މަޖިލީހުގެ ބައެއް މެންބަރުންނާއި، އެމްޑީޕީގެ ޤައުމީ މަޖިލީހުގެ ބައެއް މެންބަރުން ބައިވެރިވެފައިވާއިރު، މާލޭގައި ބޭއްވި ޖަލްސާއަށް ޢާންމު ރައްޔިތުންގެ ބައިވެރިވުން ދަށް ކަން މީގެކުރިންވެސް ފާހަގަކުރައްވާފައިވާނެ ކަމަށެވެ.
އެމްޑީޕީގެ ރައީސް، ރައީސް މުހައްމަދު ނަޝީދު ވެސް މީގެކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައިވަނީ މަލޭގައި ބޭއްވި ޖަލްސާގައި ބައިވެރިވި މީހުން މަދުވެފައިވަނީ، މާލޭގައި ދިރިއުޅޭ ރަށްޔިތުންގެ ހުރި ކަންބޮޑުވުންތަކަށް އެދެވޭ ހައްލެއް ގެނެސްދެވިނުވާތީކަން ޤަބޫލުފުޅު ކުރައްވާ ކަމަށެވެ.
އެމްޑީޕީން ބުނަނީ، މާލޭގައި ދިރިއުޅޭ ރައްޔިތުންގެ އެންމެ ބޮޑު ކަންބޮޑުވުމަކީ ބޯހިޔާވަހިކަން ކަމަށާއި، އެކަމަށް ޙައްލެއް ގެނައުމަށް ސަރުކާރާއެކު މަޝްވަރާ ކުރަމުންދާ ކަމަށެވެ. އަދި މާލޭގެ ރައްޔިތުންގެ ހުރި ކަންބޮޑުވުންތަކަށް އެދެވޭ ޙައްލެއް ގެނައުމަށް މަސައްކަތް ކުރައްވާނެ ކަމަށް ވެސް ރައީސް ނަޝީދު ވަނީ ވިދާޅުވެފަ އެވެ.
އަފްޝަން ވިދާޅުވީ، ކުރީގެ ރައީސް ޢަބްދުﷲ ޔާމީނުގެ ސަރުކާރުން ކޮންމެ މަޝްރޫޢެއްގައި ސޮއިކުރުމާއި، އެ މަޝްރޫޢުއް ފެށުމާއި، ވަށާފާރު ރޭނުންފަދަ ކޮންމެ ކަމަކަށް ބޮޑެތި ރަސްމިއްޔާތުތަކެއް ބޭއްވިޔަސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން އެގޮތަށް ރައްޔިތުންގެ ފައިސާ އިސްރާފު ނުކުރައްވާނެ ކަމެވެ.
އަފްޝަން ވިދާޅުވީ، ބޮޑެތި ރަސްމިއްޔާތުތަކެއް ނުބޭއްވިޔަސް ރާއްޖޭގެ އެކި ޞަރަޙައްދުތަކުގައި މަޝްރޫޢުތައް ހިންގަމުންދާ ކަމަށާއި ބަނދަރު ހެދުމާއި އެއްދަންފަޅިއަށް ސްކޫލްތައް ބަދަލުކުރުމަށް، ސަކޫލްތަކަށް ގެންނަންޖެހޭ ބަދަލުތަކާއި އިތުރުކުރަންޖެހޭ ކްލާސް ރޫމްތަކާއި، ވަޞީލަތްތައް ޤައިމު ކުރުމާއި، ފެނާއި ނަރުދަމާގެ މަޝްރޫޢުތައްވެސް ހިންގަމުންދާ ކަމަށެވެ.
މީގެއިތުރުން މިހާރުވެސް 5000 ދަރިވަރުން ހިލޭ ޑިގްރީއަށް ކިޔަވަމުންވެސް ގެންދަވާ ކަމަށް އަފްޝަން ވިދާޅުވި އެވެ.
